މިހާލަތުގައި ވެސް ދިވެހިން ބަނޑަށް މަރުނުވެ މިތިބީ މަސްވެރިންގެ ސަބަބުން: އާދަމް ޝަރީފު
ކޮވިޑް-19ގެ މިހާލަތުގައި ވެސް ދިވެހިން ބަނޑަށް މަރުނުވެ މިތިބީ ދިވެހި މަސްވެރިންގެ ސަބަބުން ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަދި ކުރީގެ ޑިފެންސް މިނިސްޓަރު އާދަމް ޝަރީފު އުމަރު ވިދާޅުވެއްޖެއެވެ.
މަސްވެރިންގެ ދުވަހާ ދިމާކޮށް މަސްވެރިން ކުރާ ބުރަ މަސައްކަތްތައް ފާހަގަކޮށް ކުރެއްވި ޓްވީޓެއްގައި އާދަމް ޝަރީފު ވިދާޅުވީ ކޮވިޑް-19ގެ މިހާލަތުގައި ވެސް ދިވެހިން ބަނޑަށް މަރުނުވެ މިތިބީ ދިވެހި މަސްވެރިންގެ ސަބަބުން ކަމަށެވެ.
"މަސްވެރިން ބާނާ މަސްކޮޅު ތާޒާކަމާއެކު ކިރި، އޭގެ ލާރިކޮޅު ވަގުތުން ލިބެން ޖެހޭ" އާދަމް ޝަރީފު ވިދާޅުވިއެވެ.
މަސްވެރިންގެ ދުވަހާ ގުޅިގެން މިއަދު ރައީސް އިބްރާހިމް މުޙައްމަދު ޞާލިޙު ދެއްވި ޚިތާބުގައި ވިދާޅުވެފައި ވަނީ މަސްވެރިންނަށް ކޮވިޑު 19 އާ ގުޅިގެން ކުރިމަތިވެފައިވާ ދަތިތަކުން އަރައި ގަތުމަށް 460 މިލިއަން ރުފިޔާއަށްވުރެ އަގުބޮޑު މަޝްރޫއުތަކެއް އަންނަ އަހަރުތެރޭގައި ހިންގުމަށް ތައްޔާރުވަމުންދާ ކަމަށެވެ.
އެގޮތުން ޅ. ފެލިވަރާއި ގއ. ކޫއްޑޫގައި ހުރި މިފްކޯގެ މަސް ކާރުހާނާ އިތުރަށް ތަރައްގީކޮށް މަސް ރައްކާކުރެވޭ މިންވަރު 3050 ޓަނުން 8000 ޓަނަށް އިތުރުކުރުމުގެ އަމަލީ މަސައްކަތް މި އަންނަ އަހަރުގެ ތެރޭގައި ފެށޭނެ ކަމަށް ވެސް ރައީސް ވިދާޅުވެފައިވެއެވެ.
Ads by STO
