ޓީސީގެ މައްޗަށް ކުރިހޯދައި ދަ ގްރޭންޑޭއަށް ފުރިހަމަ ފެށުމެއް!
ދިރާގު ދިވެހި ޕްރިމިއާރ ލީގުގައި ދަ ގްރޭންޑް ސްޕޯރޓްސް ކްލަބް މިއަދު ހަވީރު ޓީސީ ސްޕޯރޓްސް ކްލަބާ ދެކޮޅަށް ކުޅެ 3-0ގެ ނަތީޖާ އަކުން ކުރި ހޯދައިފިއެވެ.
މިއަދުގެ މެޗުގައި ދަ ގްރޭންޑޭން ވަނީ މޮޅު ކުޅުމެއް ދައްކާފައެވެ. އަދި ޓީސީގެ ގޯލަށް ގިނަ ހަމަލާތަކެއް ވެސް ފޮނުވާލާފައެވެ.
މެޗުގެ ފުރަތަމަ ހާފުގައި ދަ ގްރޭންޑަށް ޕެނަލްޓީއެއް ލިބުނެވެ. މެޗުގެ 29 ވަނަ މިނެޓުގައި ލިބުނު މި ޕެނަލްޓީ ދަ ގްރޭންޑޭގެ ގާސިމް ސައްމާހު ޖެހުމުން ޓީސީގެ ބިދޭސީ ގޯލް ކީޕަރު މަމަދޯޕް އާޒާދް ވަނީ މަތަ ކޮށްފައެވެ.
ދަ ގްރޭންޑޭގެ ފުރަތަމަ ގޯލް މެޗުގެ 35 ވަނަ މިނެޓުގައި ކާމިޔާބު ކުރީ އެ ޓީމުގެ ކެޕްޓަން ޔަސްދާފް ހަބީބް (މުލަކޭ) އެވެ. ދަ ގްރޭންޑޭ އަށް ދެވަނަ ގޯލެއް ކާމިޔާބު ކޮށްދީ ފުރަތަމަ ހާފުގެ ފަހު މިނެޓުގައި ލީޑު ފުޅާ ކޮށްދިނީ އިބްރާހިމް ނޫރައްދީން އެވެ.
މެޗުގެ 81 ވަނަ މިނެޓުގައި ޓީސީގެ ކީޕަރު ކުރި ފައުލަކާ ގުޅިގެން ދަ ގްރޭންޑޭ އަށް ޕެނަލްޓީއެއް ލިބުނެވެ. މި ޕެނަލްޓީ ކާމިޔާބުކޮށް މެޗުގައި ދަ ގްރޭންޑޭގެ 3 ވަނަ ލަނޑު ކާމިޔާބު ކޮށްދިނީ ބިދޭސީ ކުޅުންތެރިޔާ ހައިދަރޯފްއެވެ. މެޗުގެ މޮޅު ކުޅުންތެރިޔާގެ މަގާމު ވެސް ހޯދީ އޭނާއެވެ.
