ކޮވިޑް-19: ކެލައިން ކުޑަ ކުއްޖަކު ފައްސި ވެއްޖެ
ހއ. ކެލައިން ކުޑަ ކުއްޖަކު ކޮވިޑް-19 ފައްސި ވެއްޖެއެވެ. އެނގިފައިވާ ގޮތުގައި ފައްސިވެފައި ވަނީ މާލެއިން އެރަށަށް ގޮސް ކަރަންޓީނު ވެފައި ތިބި އާއިލާއެއްގެ ކުއްޖެކެވެ.
ކެލައިން ކުޑަ ކުއްޖަކު ކޮވިޑަށް ފައްސި ވެފައިވާކަން އެރަށު ކައުންސިލަރ އައިޝަތު މިޒްނާ ވަނީ "ދެން" އަށް ކަށަވަރު ކޮށްދެއްވާފައެވެ.
ކެލާ ސިއްޙީ މަރުކަޒު ހިންގުމާ ހަވާލު ހުންނެވި އިބްރާހިމް ރުޝްދީ "ދެން" އަށް މައުލޫމާތު ދެއްވަމުން ވިދާޅުވީ، ކެލައިން ފައްސި ވެފައިވަނީ އުމުރުން ދެ އަހަރުގެ ކުޑަ ފިރިހެން ކުއްޖެއް ކަމާއި އެއީ ކަރަންޓީނުގައި ހުރި ހަތް މީހުން ހިމެނޭ އާއިލާއެއްގެ ކުއްޖެއް ކަމަށެވެ.
އެކުއްޖާ ކޮވިޑަށް ފައްސި ނަމަވެސް އެއާއިލާގެ ކޮވިޑް ނަތީޖާ އަދި ނުލިބޭ ބައެއް މީހުން ތިބިކަމަށް ފޯކަލް ޕޮއިންޓުން މައުލޫމާތުދޭ ކަމަށް ވެސް ރުޝްދީ ވިދާޅުވިއެވެ.
"ފޯކަލް ޕޮއިންޓުން މައުލޫމާތު ދީފައި ވަނީ ފައްސި އަކާއި ނައްސި ނަތީޖާއެއް ކަމަށް އަދި ލިބިފައިވަނީ. ނަތީޖާ ނުލިބޭ އަދި އެބަތިބި ފަސް ސާމްޕަލް ޕެންޑިންގަ. އެހެންވީމަ ދެން ތިބި އެންމެންގެ ނަތީޖާ ނައްސި އެކޭ އަޅުގަނޑުމެންނަށް ދަންނަވާކަށް އަދި ނޭނގޭނެ" ރުޝްދީ ވިދާޅުވިއެވެ.
