އިންތިހާބު ބޭއްވުމުގެ ހުއްދަ ވަރަށް އަވަހަށް އެޗްޕީއޭ އިން ދޭނެ: ޝަރީފް
ކުރިޔަށް އޮތް ލޯކަލް ކައުންސިލް އިންތިހާބު ބޭއްވުމުގެ ހުއްދަ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަރަށް އަވަހަށް އިލެކްޝަންސް ކޮމިޝަނަށް ދޭނެ ކަމަށް އެ ކޮމިޝަނުގެ ރައީސް އަހުމަދު ޝަރީފް ވިދާޅުވެއްޖެއެވެ.
އޮންލައިން ނޫހެއް ކަމަށްވާ "އަވަސް" އަށް މައުލޫމާތު ދެއްވަމުން ޝަރީފް ވިދާޅުވީ ކައުންސިލް އިންތިހާބު ބޭއްވުމުގެ ހުއްދަ ދިނުމުގެ އިޝާރާތެއް އެޗްޕީއޭ އިން ދީފައިވާ ކަމަށެވެ. އަދި އެޗްޕީއޭއިން ކޮވިޑް އަޕްޑޭޓް ދިނުމަށް ބާއްވާ ސިލްސިލާ ނޫސްވެރިންގެ ބައްދަލުވުމުގައި ދެން އޮންނަ ބައްދަލުވުމެއްގައި އެކަން އިއުލާނު ކުރާނެ ކަމަށް ބެލެވޭ ކަމަށެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިހާބު ބާއްވަން ހަމަޖައްސާފައި ވަނީ މި އަހަރުގެ އެޕްރީލް މަހުގައެވެ. އެހެން ނަމަވެސް އިންތިހާބު ފަސްކޮށްފައި ވަނީ މުޅި ދުނިޔޭގައި ވެސް މިހާރު ފެތުރެމުންދާ ކޮވިޑް-19ގެ ހާލަތާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާނު ކުރުމާ ގުޅިގެންނެވެ.
"އަޅުގަނޑުމެން މަސައްކަތް މި ކުރަނީ ގާނޫނުގައި ބުނާ ހުރިހާ ޝަރުތެއް ފުރިހަަމަވާ މިިނިވަން އަދި ހުޅުވާލެވިފައިވާ އިންތިހާބެއް ބޭއްވުމަށް. އެ ފުރުސަތު ލިބޭނެ އިނގޭތޯ،" ޝަރީފް ވިދާޅުވިއެވެ.
ޝަރީފް ވިދާޅުވި ގޮތުގައި ކައުންސިލް އިންތިހާބަށް ޖުމްލަ 71 މިލިއަން ރުފިޔާ ބޭނުންވެއެވެ. އެހެންނަމަވެސް އީސީން މަޖިލީހަށް ހުށަހެޅުމުން ކޮވިޑްގެ ދުވަސްވަރަށް ދިމާވުމާއެކު ބަޖެޓު ފާސްވިއިރު އޮތީ، 51 މިލިއަން ރުފިޔާއަށް ކުޑަކޮށްފައެވެ.
މިކަމާ ގުޅިގެން ޝަރީފު ވިދާޅުވީ، އެޗްޕީއޭއިން ހުއްދަދިނަސް އިންތިހާބު ބޭއްވޭނީ ބަޖެޓަށް އިތުރު 13.3 މިލިއަން ރުފިޔާ ލިބިގެން ކަމަށެވެ. އެގޮތުން، ހަރަދު ކުޑަ ކުރެވޭނެ ގޮތްތަކާމެދު ސެކްޝަންތަކާ މަޝްވަރާ ކުރުމަށް ފަހު، އިންތިހާބު ބޭއްވުމަށް 64.3 މިލިއަން ރުފިޔާ ބޭނުންވާ ކަމަށް ޝަރީފު ވިދާޅުވިއެވެ.
Ads by STO
