ނިޝާން މުލީގޭ ޝަރަފުގެ އިއްޒަތާއި ނިޝާން ދިޔަމިގިލީގެ ޝަރަފުގެ އިއްޒަތް 2 ދެބޭފުޅަކަށް އަރުވައިފި
ނިޝާން މުލީގޭ ޝަރަފުގެ އިއްޒަތާއި ނިޝާން ދިޔަމިގިލީގެ ޝަރަފުގެ އިއްޒަތް 2 ބޭފުޅަކަށް ދެއްވައިފިއެވެ.
ނިޝާން މުލީގެ އިއްޒަތާއި ނިޝާން ދިޔަމިގިލީގެ ޢިއްޒަތް މިރޭގެ ގައުމީ އިނާމު ދިނުމުގެ ރަސްމިއްޔާތުގައި އެރުވިފައި ވަނީ ، މ.މަހުމާވިލާ އިބްރާހިމް އިސްމާއިލް އާއި، މއ.ވިލުވެލި ބަދުރުއްނަސީރެވެ.
މި ދެ ޢިއްޒަތް ހާސިލު ކުރި ބޭފުޅެއް ކަމަށްވާ އިބްރާހިމް އިސްމާއިލަކީ، ސަރުކާރަށް 44 އަހަރުދުވަހަށް ވުރެ ގިނަ މުއްދަތަކަށް ޚިދުމަތް ކޮށް، ރާއްޖޭގެ ކުޅިވަރު ތަރައްގީ ކުރެއްވުމަށް ގިނަ މަސައްކަތްތަކެއް ކުރެއްވުމުގެ އިތުރުން ކުޅިވަރުގެ ތާރީހުގައި ފަހުރުވެރި ކާމިޔާބީތަކެއް ހާސިލް ކުރައްވާފައިވާ ބޭފުޅެކެވެ. މީގެ އިތުރުން މި ބޭފުޅާއަކީ ރާއްޖޭގެ ތަޢުލީމީ ދާއިރާގެ އިސް މަޤާމުތަކެއް ވެސް ފުރުއްވާފައިވާ ބޭފުޅެކެވެ. އެމަނިކުފާނުގެ ޚިދުމަތްތަކުގެ ތެރޭގައި ތައުލީމު ފުޅާ ކުރައްވައި، ތަރައްގީ ކުރެއްވުމުގެ ގޮތުން އަތޮޅުތެރެއަށް ވަޑައިގެން ރަށްރަށުގެ ސްކޫލްތަކަށް ބޭނުންވާ ވަސީލަތްތައް ހަމަކޮށްދެއްވުމަށް ގިނަ މަސައްކަތްތަކެއް ކުރެއްވިކަން ފާހަގަ ކޮށްލެވެއެވެ.
މި ދެޢިއްޒަތް ހާސިލު ކުރެއްވި ދެވަނަ ބޭފުޅާ ކަމުގައިވާ، ބަދުރުއްނަސީރަކީ، ބްރޯޑްކާސްޓިން ދާއިރާގައި 40 އަހަރަށްވުރެ ގިނަ ދުވަހު ހިދުމަތް ކުރައްވާ، އަދި "ދިވެހިރާއްޖޭގެ އަޑު" އުފެދުނު ދުވަސްވަރުން ފެށިގެން އެ އިދާރާގައި މުހިންމު މަސައްކަތްތަކެއް ކުރައްވާފައިވާ ބޭފުޅެކެވެ. އަދި އެމަނިކުފާނަކީ ރާއްޖޭގެ ބްރޯޑްކާސްޓިން ކޮމިޝަންގެ އެންމެ ފުރަތަމަ ރައީސް ވެސް މެއެވެ.
ޤައުމީ އެއްބައިވަންތަ ކަމުގެ ދުވަހުގެ މުނާސަބަތުގައި މިރޭ ބޭއްވުނު މި ރަސްމިއްޔާތުގައި ރައީސް ވަނީ ދައުލަތުގެ މި ދެ ޢިއްޒަތް ލިބިވަޑައިގެން، މ.މަހުމާވިލާ އިބްރާހިމް އިސްމާއިލަށާއި، މއ.ވިލުވެލި ބަދުރުއްނަސީރަށް މަރުޙަބާއާއި ތަހުނިޔާ ދަންނަވާފައެވެ.
ނިޝާން މުލީގޭ ޝަރަފުގެ އިއްޒަތާއި ނިޝާން ދިޔަމިގިލީގެ ޝަރަފުގެ އިއްޒަތަކީ ރައީސުލްޖުމްހޫރިއްޔާ ދެއްވާ ދިވެހި ދައުލަތުގެ އިއްޒަތުގެ ގޮތުގައި ކަނޑައަޅާފައިވާ 3 ވަނަ ދަރަޖައިގެ އިއްޒަތަކަށް ވާއިރު، ނިޝާން މުލީގޭ ޝަރަފުގެ އިއްޒަތް ނިސްބަތްވަނީ އައްސުލްތާން މުހައްމަދު ޝަމްސުއްދީނަށެވެ. އަދި ނިޝާން ދިޔަމިގިލީގެ ޝަރަފުގެ އިއްޒަތް ނިސްބަތް ވަނީ އައްސުލްތާން މުހައްމަދު އިމާދުއްދީނަށެވެ.
