ޒުވާން ބެރުވެރިޔާ ޒާހިލްގެ މިސްރާބު ދާއިރާގެ އެންމެ އުހަށް!
ރާއްޖޭގެ އެންމެ ސަގާފީ އެއް ކަމަކީ ބޮޑުބެރު ޖެހުމެވެ. ކާބަފައިންގެ ޒަމާނުއްސުރެ އަބަދުވެސް ދިވެހީންގެ ހިތްތަކުގައި ބޮޑުބެރަށް ދެވިފައި ވަނީ ހާއްސަ މަގާމެކެވެ. ނަމަވެސް ދިވެހިރާއްޖޭގައި ބޮޑުބެރު ޖެހުން ކޮންމެވެސް ވަރަކަށް ވަޅުޖެހިފައި އޮތުމަށް ފަހު ދެހާހުގެ ކުރީކޮޅުގެ އަހަރުތަކުގައި ބޮޑުބެރަށް އައު ދިރުމެއް ގެނުވީ ޓެލެވިޒަން މޯލްޑިވްސް އިން ގެނެސްދިން ބޮޑުބެރު ޗެލެންޖެވެ. 2010 ވަނަ އަހަރު ވުޖޫދު ވެގެން އައި މި މުބާރާތުން ހުނަރުވެރި އެތައް ބެރުވެރިންނާއި ލަވަކިޔުންތެރިން އަދި ނެށުންތެރިން ވެސް ފެނިގެން ދިޔައެވެ.
ބޮޑުބެރު ޗެލެންޖާއެކު ދިވެހީންގެ ހިތްތަކުގައި ބޮޑުބެރުގެ ފޯރި ގުގުމަން ފެށިއެވެ. ޓީވީން ބޮޑުބެރު ޗެލެންޖު ފެނި ޅަފުރައިގެ ގިނަ ކުދިންތަކެއްގެ ހިތުގައި ބޮޑުބެރު ޖަހަން ދަސްކުރުމުގެ ޝައުގުވެރިކަން އުފެދުނެވެ. މަޖީދިއްޔާ ސުކޫލްގައި އޭރު ތައުލީމް ހާސިލު ކުރަމުން ދިޔަ ޒާހިލް ވެސް ބޮޑުބެރު ޖަހަން ދަސް ކުރީ އެ ދުވަސްވަރުގައެވެ. 2010 ވަނަ އަހަރު ސުކޫލްގައި އުފެދުނު ބޮޑުބެރު ގްރޫޕަކުންނެވެ. އޭރު އޭނާއަށް ބޮޑުބެރު ޖަހާކަށް ހަމަ އެއްގޮތަކަށް ވެސް ނޭނގެއެވެ.
ބޮޑުބެރު ޖަހަން ދަސްކުރުމުގައި އޭނާއަށް ކުރިމަތިވި އެންމެ ބޮޑު ގޮންޖެހުމަކީ ދަސްކޮށްދޭނެ މީހަކު ނެތުމެވެ. އޭނާ ބޮޑުބެރު ޖަހަން ދަސްކުރީ މޭޒުގައި ޖަހައިގެންނެވެ. ދަސްކުރި އިރު އޭނައަށް އެންމެ އުނދަގޫ ބެރަކަށްވީ ނަލަ ބެރެވެ. އަމިއްލައަށް ބެރު ޖަހަން ދަސްކުރި ނަމަވެސް ގާތްގަނޑަކަށް އަހަރެއް ތެރޭގައި އޭނާ ބޮޑުބެރުގެ ގިނަ ފުނަތަކެއް އަދި ހުރިހާ ހަމައެއް ޖަހަން ދަސްކުރިއެވެ. އޭނާ އެންމެ ޖަހާ ހިތްވާ ބެރަކީ ކާސިމަޖާ އެވެ. އެންމެ ކަމުދަނީ ވެސް ކާސިމަޖާ ލަވަތަކެވެ. ބޮޑުބެރުގެ ދާއިރާގައި އޭނާގެ އިންސްޕިރޭޝަން އަކީ ހަރުބީ ބޮޑުބެރު ގުރޫޕްގެ ޝިނާއެވެ.
ޒާހިލް އެންމެ ފުރަތަމަ ބޮޑުބެރު ގްރޫޕަކާ ގުޅުނީ ދަރުމަވަންތަ ސުކޫލުން އުފެދިގެން އައި "ފަރުމާ" ބޮޑުބެރު ގުރޫޕާއެވެ. އެއީ 2010 ވަނަ އަހަރުގައެވެ. އެ ގުރޫޕްގައި ދުވަސްކޮޅަކު އުޅުމަށްފަހު އޭނާ ބޮޑުބެރުން ދުވަސްކޮޅަކަށް ހުރީ ދުރުގައެވެ. އެގޮތަށް ދުވަސްކޮޅަކު ހުރުމަށްފަހު އޭނާ ގުޅުނީ ސިކަންދަރު ބޮޑުބެރު ގުރޫޕަށެވެ. އެއީ އޭނާގެ އެކުވެރި ޝަމްބެ އޭނާއަށް ހޯދައިދިން ފުރުސަތެކެވެ. ބޮޑުބެރުގައި އޭނާއަށް ގިނަ އެއްޗެހިތަކެއް ދަސްވެގެން ދިޔައީ ސިކަންދަރު ބޮޑުބެރު ގުރޫޕުންނެވެ.
ޒާހިލް ސިކަންދަރުގައި
ޒާހިލް ބޮޑުބެރުގެ ދާއިރާގައި އެންމެ ފުރަތަމަ ބައިވެރިވި މުބާރާތަކީ 2013 ވަނަ އަހަރުގެ ބޮޑުބެރު ޗެލެންޖެވެ. ސިކަންދަރު ބޮޑުބެރު ގުރޫޕާއެކު ބައިވެރިވެ އެ މުބާރާތުން އެ ގުރޫޕަށް ލިބުނީ 4 ވަނައެވެ.
ބޮޑުބެރުގެ ދާއިރާގައި ކުރިމަތިވި އަދި ވަމުން އަންނަ އެންމެ ބޮޑު ގޮންޖެހުމަކީ ކޮންމެ ގުރޫޕެއްވެސް ތަފާތު އެކި މައްސަލަތައް ޖެހި ގުރޫޕް އުވުން ކަމުގައި ޒާހިލް ފާހަގަ ކުރެއެވެ. އަދި ބޮޑުބެރުގެ ދާއިރާގައި އުޅެގެން ރާއްޖޭގައި ރަނގަޅު އާމްދަނީއެއް ނުލިބުމަކީ ވެސް މި ދާއިރާއިން ކުރިއަށް ދިއުމަށް ދިމާވި ވަރަށް ބޮޑު ގޮންޖެހުމެއް ކަމުގައި އޭނާ ފާހަގަ ކުރިއެވެ. ޒާހިލް ފާހަގަ ކުރާ ގޮތުގައި ބޮޑުބެރު ޖެހުމަކީ "ކެރިއާރ" އެއް ގޮތުގައި ހަމައެކަނި އެކަމަށް ބަރޯސާވެގެން ކުރެވެން އޮތް ކަމެއް ނޫނެވެ.
ހިޖުރީ ގޮތުން 1438ވަނަ އަހަރު އުފެދިގެން އައި 1438 ބޮޑުބެރު ގުރޫޕަށް ޒާހިލް ގުޅުނީ އައު އުއްމީދު ތަކަކާއެކުގައެވެ. 1438އަށް ބަދަލުވެ ނަޓު ބެރުގައި ޖެހުން އޭނާއަށްވީ ކުރިމަތިވި ގޮންޖެހުމަކަށެވެ. ސަބަބަކަށްވީ އޭނާ ކުރިން ޖަހައި އުޅުނީ ނަނު ބެރުގައި ކަމަށް ވާތީއެވެ. އެކަމަށް ހޭނެން ވަރަށް ދުވަސް ނެގި ކަމުގައި ވެސް އޭނާ ފާހަަގަ ކުރިއެވެ.
ބޮޑުބެރު ޖެހުމަކީ ހުސްވަގުތުގައި ޒާހިލް ކުރާ ކަމެކެވެ. އަދި ބޮޑުބެރު ޖެހުމުގެ ދާއިރާ ދޫކޮށްލަން ދުވަހަކު ވެސް ހިތަށް ނާރާ ކަމުގައި ދިރާގުގައި މަސައްކަތްކުރާ ޒާހިލް ބުންޏެވެ. ނަމަވެސް "ޕްރޮފެޝަން" އެއްގެ ގޮތުގައި ބޮޑުބެރު ޖެހުމަކީ އަދި ކުރެވެން އޮތް ކަމެއް ނޫން ކަމުގައި ޒާހިލް ފާހަގަ ކުރިއެވެ.
ޒާހިލް ވަނީ ސުކޫލްތަކަށް ގޮސް ވެސް ކުޑަކުދިންނަށް ބޮޑުބެރު ޖަހަން ދަސްކޮށް ދީފައެވެ. އަދި އެކުދިން ލައްވާ ޝޯވ ތަކުގައި ޕާފޯމް ކުރުވާފައި ވެސް އެބަހުއްޓެވެ. އަދި ކުރިއަށް އޮތްތަނުގައި ބޮޑުބެރު ސުކޫލެެއް ހުޅުވުމުގެ މަސައްކަތް 1438ގެ ފަރާތުން ކުރުމަށް ވިސްނުމެއް އެބަ ގެންގުޅޭ ކަމުގައި ވެސް އޭނާ ފާހަގަ ކުރިއެވެ.
ޒާހިލް ބޮޑުބެރުގެ ދާއިރާއަށް ނެރެ ދިން ޝަމްބެގެ ނަން ފާހަގަކޮށް އޭނާ ވަނީ ޝަމްބެއަށް ވަރަށް ހާއްސަ ޝުކުރެއް އަދާކޮށްފައެވެ.
ގައުމުތަކުގެ ޘަގާފަތް ދައްކުވައިިދޭ މުބާރާތެއް ކަމަށްވާ އައިއެފްއޭޑަބްލިޔުޕީސީއޭ ކޮންވެކްޝަން 2018ގެ އެއްވަނަ ހޯދި 1438ގެ ޓީމުގައި ވެސް ބެރުވެރިއެއްގެ ގޮތުގައި މުހިންމު ރޯލެއް ޒާހިލް އަދާކުރިއެވެ. އަދި ބޮޑެތި އިވެންޓުތަކުގައި ވެސް ޒާހިލް ވަނީ ބެރު ޖަހާފައެވެ. އޭގެ ތެރޭގައި "މިހާރު" އެވޯޑްސް 2018، ވޯލްޑް ޓްރެވެލް އެވޯޑްސް 2016 އަދި ސައުތު އޭޝިއަން ޓްރެވެލް އެވޯޑްސް 2017 ހިމެނެއެވެ.
ބޮޑުބެރުގެ އަޑުއިވުމަކީ ހަމަ ކޮންމެ ދިވެއްސެއްގެ ގައިން ވެސް ހީބިހި ނަގާނެ ކަމެއްކަން ގައިމެވެ. އަދި ޒާހިލް ފަދަ މޮޅު ބެރުޖެހުންތެރިއަކު ބެރު ޖަހާތަން ބަލާލަން ހުރުމަކީ ބޮޑުބެރުގެ ފޯރި މުޅި ހަށިގަނޑުގައި ގުގުމާލާނެ ކަމެއްކަން ގައިމެވެ.
ޒާހިލްގެ މިހާރުގެ އުއްމީދަކީ 1438އާއެކު ބޮޑުބެރު ޗެލެންޖު ކާމިޔާބު ކުރުމެވެ.
އަޅުގަނޑާއި "ދެން"ގެ ފަރާތުން ޒާހިލްއަށް އެދެނީ ކާމިޔާބީއަށެވެ.
