ސައީދުގެ ސުވާލެއް އިމްރާންއަށް: ސިޔާސީ ޕާޓީއަކުން ޕޮލިސް ބޯޑު އައްޔަން ކުރާނަމަ، ފުލުހުންގެ އިދާރާ މިނިވަން ވާނެތޯ؟
ސިޔާސީ ޕާޓީއަކުން ޕޮލިސް ބޯޑު އައްޔަން ކުރާނަމަ، ފުލުހުންގެ އިދާރާ މިނިވަން ވާނެތޯ މިނިސްޓަރު އިމްރާނު އަބްދުالله އާ މާވަށު ދާއިރާގެ މެންބަރު މުހައްމަދު ސައީދު ސުވާލު ކުރައްވައިފިއެވެ.
ދިވެހި ފުލުހުންގެ ހިދުމަތުގެ ބިލް ރައީސް އިއްޔެ ތަސްދީގު ކުރައްވާފައިވާއިރު، ޕޮލިސް ބޯޑް އެކުލަވާލާ އައްޔަން ކުރުމަށް ބޮޑެތި ބަދަލުތަކެއް ވަނީ ގެނެސްފައެވެ.
މިކަމާ ގުޅިގެން ސައީދު ކުރެއްވި ޓްވީޓުގައި ވަނީ މިނިސްޓަރު އިމްރާން ގެ މައްޗަށް އެމްޑީޕީން ފެބްރުއަރީ 7 ގެ ދައުވާތައް ކޮށް މަގާމުން ދުރުކުރުމުން، ފުލުހުންގެ ބިލާމެދު ދެކޭނީ ކިހިނެއްތޯ ސުވާލު ކުރައްވާފައެވެ.
އަދި ޕޮލިސް ބޯޑު އައްޔަން ކުރުމުގެ ބާރު ސިޔާސީ ޕާޓީއަކަށް ދިނުމުން، ފުލުހުން މިނިވަން ވެދާނެތޯ ވެސް ސައީދު ސުވާލު އުފެއްދެވިއެވެ.
ފުލުހުންގެ ބިލަށް އަމަލު ކުރަން ފެށުމާއެކު ދިވެހި ރާއްޖޭގެ ދާޚިލީ ހަމަޖެހުން ގާއިމްކޮށް، ރައްޔިތުންގެ ސަލާމަތާ ރައްކާތެރިކަން ކަށަވަރު ކުރުމަށް ފުލުހުންގެ ހިދުމަތަށް ގެންނަން ޖެހޭ ބަދަލުތައް އަންނާނެ މިނިސްޓަރު އިމްރާން ވަނީ ވިދާޅުވެފައެވެ.
ފުލުހުންގެ ބިލް ފާސްކޮށްފައި ވަނީ ލާއިންސާނީ އަނިޔާވެރި އަމަލުތަކާ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތު ކުރެވޭ ނުވަތަ އެފަދަ މައްސަލައެއް ދައުލަތުގެ އިދާރާތަކާއި ކޮމިޝަންތަކަށް ހުށަހަޅާފައިވާ ފުލުހުންނާ މެދު ގާނޫނަށް އަމަލުކުރަން ފަށާތާ ހަތަރު މަސް ދުވަހުގެ ތެރޭގައި ފިޔަވަޅު އަޅަން ޖެހޭ ގޮތަށެވެ. މި ފިޔަވަޅު އަޅަން ޕޮލިސް ކޮމިޝަނަރަށް ލަފާ ދޭނީ، މި ގާނޫނަށް އަމަލުކުރަން ފަށާތާ ދެ ހަފުތާ ތެރޭގައި އެކުލަވާލަން ޖެހޭ ފުލުހުންގެ ބޯޑުންނެވެ.
ފުލުހުންގެ ސިޔާސަތުތައް ކަނޑައެޅުމުގައި ވަޒީރަށް ލަފާ ދޭ އެންމެ އިސް ފަރާތަކީ ވެސް އާއްމު މެމްބަރުންގެ މައްޗަށް އެކުލެވިގެންވާ އެ ބޯޑެވެ.
ފުލުހުންގެ ބޯޑު އެކުލަވާލަން ޖެހެނީ އާއްމު ހަތް މެމްބަރުންގެ މައްޗަށެވެ. މި ބޯޑުގައި ރައީސް ޢައްޔަންކުރައްވާ ބޭފުޅުންނާއި އާންމުންގެ ތެރެއިން ރައްޔިތުން މަޖިލިހުން އައްޔަން ކުރައްވާ ބޭފުޅުން ހިމެނިގެން ދާނެއެވެ.
ފުލުހުންގެ ޤާނޫނަކީ ފުލުހުންގެ ތެރެއިން ވަކިވަކި އޮފިސަރުންނަށް އަމާޒުކޮށް ފާސްކޮށްފައިވާ ބިލެއް ކަމުގައި އިދިކޮޅު ފަރާތްތަކުން ސިފަކުރެއެވެ. އަދި އެ ބިލަކީ ބަދަލުހިފުމުގެ ރޫޙު އޮވެގެން އެކުލަވައިލި ބިލެއް ކަމުގައިވެސް ބައެއް ފަރާތްތަކުން ސިފަ ކޮށްފައި ވެއެވެ.
Ads by STO
