މަސްތުވާތަކެތީގެ ވަބާ ނައްތާލެވޭނީ މުޖުތަމަޢުގެ ބައިވެރިވުމާއެކު، ވަށައިޖެހޭ އުސޫލަކުން: ޖެންޑާ މިނިސްޓަރ
މަސްތުވާތަކެތީގެ ވަބާ ނައްތާލެވޭނީ އާއްމު ރައްޔިތުންނާއި މުޖުތަމަޢުގެ ބައިވެރިވުމާއެކު ވަށައިޖެހޭ އުޞޫލެއްގެ ތެރެއިން ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދުދީދީ ވިދާޅުވެއްޖެއެވެ.
ގއ.ވިލިނގިލީގައި "ދަގެނާ" އައުޓްޕޭޝަންޓް ކޮމިއުނިޓީ ޓްރީޓްމެންޓް އެންޑް ރިހެބިލިޓޭޝަން ސަރވިސަސް ސެންޓަރ ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޖެންޑާ މިނިސްޓަރު ވިދާޅުވީ މިއީ ވަރަށް ހެޔޮ ނިޔަތެއްގައި ފަށާ މަސައްކަތެއް ކަމަށާއި، ނަމަވެސް މިކަން ކާމިޔާބު ކުރެވެން އޮތީ މުއައްސަސާތަކުން ކުރާ މަސައްކަތްތަކަށް ރައްޔިތުންގެ ފަރާތުން ފުރިހަމަ ބައިވެރިވުމާއި އެއްބާރުލުން ލިބިގެން ކަމަށެވެ.
ވިލިނގިލީގައި އަލަށް ހުޅުވި މި ކޮމިއުނިޓީ ރިހެބިލިޓޭޝަން ސެންޓަރުން، މަސްތުވާތަކެތި ބޭނުންކުރާ މީހުންނާއި ކުދިން އަލުން އަނބުރާ މުޖުތަމަޢުއަށް ގެނައުމަށްޓަކާ އެ ފަރާތްތަކަށް ޞިއްޙީ ގޮތުންނާއި، އިޖްތިމާޢީ އަދި ނަފްޞާނީ ގޮތުން ބޭނުންވާ އެހީތެރިކަން ފޯރުކޮށްދޭނެ ކަމަށާއި މިތަނުގައި ފަރުވާގެ ކަންކަން ކުރިއަށް ދާނީ ތަފާތު 3 ކެޓެގަރީއަކަށް ބަހާލައިގެން ކަމަށް ވެސް މިނިސްޓަރ ވިދާޅުވިއެވެ.
"މިތަނަށަށް އަންނަ ކޮންމެ މީހެއްގެވެސް އެސެސްމެންޓެއް ހެދޭނެ. އޭގެން ފާހަގަ ކުރާނެ އެއީ ހައި ރިސްކް، މީޑިއަމް ރިސްކް ނުވަތަ ލޯ ރިސްކު މީހެއްތޯ. އެއަށް ފަހު ފަރުވާގެ ކަންކަން ކުރިއަށް ދާނީ. ހައި ރިސްކުވިއްޔާ ޑްރަގް ކޯޓު މެދުވެރިގެން ނުވަތަ އަމިއްލައަށް ވޮލެންޓިއަރ ކޮށްގެން ފަރުވާގެ ކަންކަން ކުރިއަށް ދާނެ. މީޑިއަމް ރިސްކުވިއްޔާ ހޮސްޕިޓަލައިޒް ކޮށްގެން ފަރުވާގެ ކަންކަން ކުރިއަށްދާނެ. އަދި ލޯ ރިސްކްވިއްޔާ އެމީހުންނާއި ގުޅިގެން ކޮށްލާ ކުޑަކުޑަ އެހެން ނަމަވެސް ބުރަ މަސައްކަތަކުން އެމީހުން ރަނގަޅު ކުރެވިދާނެ" ޖެންޑަރ މިނިސްޓަރ ވިދާޅުވިއެވެ.
މި ސެންޓަރު ރަސްމީކޮށް މިއަދު ހުޅުއްވައިދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ.
Ads by STO
