ހިމާޔަތް ކޮށްފައިވާ ދޫންޏެއް ބަލަހައްޓަން މީހަކަށް ހުއްދަ ދީފި
ހިމާޔަތްކޮށްފައިވާ ދޫންޏަކަށް އަނިޔާވެގެން، ޙާލު ރަނގަޅު ވަންދެން އެ ދޫނި ބެލެހެއްޓުމުގެ ހުއްދަ އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން މީހަކަށް ދީފިއެވެ.
އެގޮތުން އީޕީއޭ އިން ހުއްދަ ދީފައިވަނީ ފިޔަގަނޑަށް އަނިޔާވެފައިވާ ކުރަނގިއެއް ވަގުތީގޮތުން ބެލެހެއްޓުމަށެވެ. ކުރަނގިއަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުން ޙިމާޔަތް ކޮށްފައިވާ ދޫންޏެކެވެ
އީޕީއޭއިން ބުނެފައިވާ ގޮތުގައި އަނިޔާއިން ރަނގަޅުވަންދެން އެ ދޫނި ބެލެހެއްޓުމަށް އަމިއްލައަށް އެދިފައިވަނީ އަޙުމަދު އައްޒާމް ނާފިޒް ކިޔާ މީހެކެވެ. އެގޮތުން އީޕީއޭއިން އައްޒާމަށް ދީފައި ވަނީ ދޫނި ބެލެހެއްޓުމުގެ ވަގުތީ ހުއްދައެއް ކަމަށް ވެސް ބުނެފައިވެއެވެ. ދޫނި ބެލެހެއްޓުމުގެ ހުއްދަ ދީފައި ވަނީ ދޫނި އަމިއްލައަށް އުޅުމުގެ ޤާބިލުކަން ލިބެންދެންނެވެ.
އައްޒާމަށް ދިން ހުއްދައިގައި އިތުރަށް ބުނެފައިވަނީ ދޫނީގެ ޙާލު ރަނގަޅުވެ، އެކަނި އުޅެވޭ ވަރުވުމުން، ވެޓެރިނަރީ ޑޮކްޓަރުގެ ލަފަޔާއެކު ދޫނީގެ ޤުދުރަތީ މާޙައުލަށް ލަސްވުމެއްނެތި ދޫކުރުމަށާއި، އެކަން އީޕީއޭއަށް އެންގުމަށެވެ.
ތިމާވެށި ޙިމާޔަތްކޮށް ދެމެހެއްޓުމުގެ މަސައްކަތުގައި މިފަދަ ފަރާތްތަކުން ލިބެމުންދާ އެއްބާރުލުން ފާހަގަކޮށް އީޕީއޭއިން ވަނީ ޝުކުރު އަދާކޮށްފައެވެ. އަދި މިފަދަ ހުއްދައެއް ދެއްވީތީ އައްޒާމް ވެސް ވަނީ އީޕީއޭ އަށް ޝުކުރު އަދާ ކޮށްފައެވެ.
އާއްމުކޮށް ފިނޮޅުތަކުގައާއި ގޮނޑުދޮށް ތަކުގައި އުޅޭ ކުރަނގި ދޫންޏަކީ އައިންމަތީ ދޫންޏެކެވެ.
