50 ވަނަ ރިޕެޓްރިއޭޝަން މިއަދު ޑާކާއަށް، މިހާތަނަށް 9،600 މީހަކު ވަނީ އަނބުރާ ޤައުމަށް ފޮނުވާލާފައި
ރާއްޖޭގައި އުޅޭ ބަންގްލަދޭޝް މީހުންގެ ތެރެއިން ސައްހަ ލިޔެކިޔުން ނެތް މީހުންނާއި އެނބުރި ގައުމަށް ދާން ބޭނުން މީހުން ގޮވައިގެން މޯލްޑިިވިއަންގެ 50 ވަނަ ފްލައިޓު ބަންގްލަދޭޝްގެ ޑާކާ އަށް މިއަދު ގޮސްފިއެވެ.
ގައުމީ އެއާލައިން، މޯލްޑިވިއަންއިން ބުނީ، މިއަދު 200 ބަންގްލަދޭޝް މީހުން އަނބުރާ އެމީހުންގެ ރަށަށް ފޮނުވާލާފައިވާ އިރު އެއީ ރިޕެޓްރިއޭޝަން ފްލައިޓްގެ ގޮތުގައި ދަތުރު ކުރި 50 ވަނަ ފްލައިޓް ކަމަށެވެ. އަދި މިހާތަނަށް އެ ފްލައިޓްތަކުން 9633 ބަންގްލަދޭޝް މީހުން ފޮނުވާލާފައިވާ ކަމަށް މޯލްޑިވިއަނުން ބުނެއެވެ.
މޯލްޑިވިއަންގެ ފްލައިޓުގެ އިތުރުން ދިވެހި ސަރުކާރުން ޗާޓަރުކުރި ބިމާން ބަންގްލަދޭޝް އެއާވޭސްގެ ފްލައިޓެއްގައްޔާއި ބަންގްލަދޭޝް އަސްކަރިއްޔާގެ ފްލައިޓެއްގައި ވެސް ދެ ފަހަރެއްގެ މަތިން އެ ގައުމުގެ ރައްޔިތުން ފުރުވާލައިފައި ވެއެވެ.
ރިޕެޓްރިއޭޝަން ފްލައިޓްތަކުން ފޮނުވާލާ ބިދޭސީންގެ ތެރޭގައި ހިމެނެނީ އަމިއްލައަށް އެނބުރި ގައުމަށް ދާން ބޭނުންވާ ބިދޭސީންނާއި ރާއްޖޭގައި ގަވާއިދާ ހިލާފަށް ސައްހަ ލިޔުމެއް ނެތި އުޅޭ ބިދޭސީންނެވެ. މި މަސައްކަތަކީ މިނިސްޓްރީ އޮފް ފޮރިން އެފެއާޒާއި މިނިސްޓްރީ އޮފް އިކޮނޮމިކް ޑިވެލޮޕްމަންޓާއި މޯލްޑިވްސް އިމިގްރޭޝަންއާއި ގައުމީ އެއާލައިން މޯލްޑިވިއަން ގުޅިގެން ކުރިއަށްގެންދާ އޮޕަރޭޝަނެކެވެ.
Ads by STO
