ދެ ލޯންޗު ޖެހިގެން ހިނގި އެކްސިޑެންޓެއްގައި ބައެއް މީހުންނަށް އަނިޔާވެއްޖެ
މ. މުލިން ފުރައިގެން މާލެ ދަތުރުކުރި ލޯންޗަކާއި، މާލެއިން ފުރައިގެން ދަތުރުކުރި ލޯންޗެއް ޖެހި ކަނޑުމަތިން އެކްސިޑެންޓެއް ވެގެން، އޭގައި ތިބި ބައެއް މީހުންނަށް އަނިޔާ ވެއްޖެއެވެ.
އެމްއެންޑީއެފް ގެ ތަރުޖަމާނު މޭޖަރ އިބްރާހިމް އާޒިމް މިއެކްސިޑެންޓާ ގުޅޭގޮތުން މައުލޫމާތު ދެއްވަމުން ވިދާޅުވީ މ. މުލިން ފުރައިގެން މާލެ ދަތުރުކުރި ސީ އެމްބިއުލޭންސް ލޯންޗަކާއި މާލެއިން ފުރައިގެން ދަތުރުކުރި ލޯންޗެއް ކަނޑުމަތިން ޖެހި، އެކްސިޑެންޓުވެ ދެ ލޯންޗުގައި ތިބި ބައެއް މީހުންނަށް އެކި ވަރުގެ އަނިޔާ ލިބިގެން އެމްއެންޑީއެފް މާލެ އޭރިއާ ކޯސްޓްގާޑު ސްކޮޑްރޮން އިން ހަރަކާތްތެރިވާން ފަށައިފި ކަމަށެވެ.
މިހާދިސާގެ ރިޕޯޓު ލިބިފައިވަނީ 1:00 ހާއިރު ކަމަށް ވެސް އެމްއެންޑިއެފް އިން ބުނެއެވެ.
"މި ހާދިސާ ހިނގި އިރު ސީއެމްބިއުލަންސް ލޯންޗުގައި 8 މީހުން ތިބި. މީގެ ތެރެއިން 2 މީހަކައަށް އެކިވަރުގެ އަނިޔާ ލިބިފައިވާއިރު އެކްސިޑެންޓްވި އަނެއް ލޯންޗުގައި 2 މީހުން ތިބި. އޭގެ ތެރެއިން އެ ލޯންޗު ދުއްވަން ހުރި ކެޕްޓަނަށް އެކިވަރުގެ އަނިޔާ ލިބިފައިވާކަމުގެ މަޢުލޫމާތު ލިބިފައިވޭ." އެމްއެންޑީއެފްއިން ބުނެފައިވެއެވެ.
މި ހާދިސާގައި އަނިޔާވި މީހުން މިހާރު މާލެ ގެނައުމަށްޓަކައި އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންގެ ލޯންޗެއް ދަނީ ހަރަކާތްތެރިވަމުންނެވެ.
މިއެކްސިޑެންޓު ހިނގާފައިވަނީ އިތާފުށި ކައިރިން ކަމަށް އެމްއެންޑީއެފްއިން މައުލޫމާތު ދެއެވެ.
