ގާނޫނުއަސާސީއާ ހިލާފަށް އިންތިހާބު ފަސްކުރުމުގެ ބާރު އެއްވެސް ފަރާތަކަށް ލިބިގެންނުވޭ: ޑރ. ދީދީ
ގާނޫނުއަސާސީއާ ހިލާފަށް ލޯކަލް ކައުންސިލް އިންތިހާބު ފަސްކުރުމުގެ ބާރު އެއްވެސް ފަރާތަކަށް ލިބިގެން ނުވާ ކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވެއްޖެއެވެ.
ޑރ. އަހުމަދު މިހެން ވިދާޅުވެފައި މިވަނީ ކޮވިޑް-19އާ ގުޅިގެން އިއުލާން ކޮށްފައިވާ ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުރުކުރުމުން ލޯކަލް ކައުންސިލް އިންތިޚާބު މާޗު މަހުގައި ނުބޭއްވޭނެ ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވުމާ ގުޅިގެންނެވެ.
ޑރ އަހުމަދު ވިދާޅުވީ ގާނޫނުއަސާސީއާ ހިލާފަށް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު ފަސްކުރުމުގެ ބާރު އެއްވެސް ފަރާތަކަށް ލިބިގެން ނުވާ ކަމަށާއި ރައްޔިތުންގެ ބާރު ކަނޑުވާލުމުގައި ބައިވެރިވާ އެންމެހައި ފަރާތްތައް ޤާނޫނީ ޒިންމާ އުފުލަން ޖެހޭނެ ކަމަށެވެ. ހެލްތު އިމަޖެންސީ ދެމިއޮތަސް، ގައުމު އޮތީލޮކްޑައުންގެ ހާލަތަކު ނޫން ކަމަށާއި އެހެންކަމުން އިންތިހާބު ބޭއްވޭނެ ކަމަށް ވެސް ޑރ.އަހުމަދު ވަނީ ވިދާޅުވެފައެވެ.
އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވެފައިވަނީ ސިއްހީ ކުއްލި ނުރައްކަލުގެ ހާލަތު ދިގުދަންމާލުމާ ގުޅިގެން ކުރިން ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު މާޗު މަހުގެ ހަވަނަ ދުވަހު ދެން ނުބޭއްވޭނެ ކަމަށެވެ.
