ކައުންސިލް އިންތިހާބު ނުބާއްވަން އުޅެނީ ގަދަބާރުން ރައްޔިތުންގެ މައްޗަށް ވެރިކަން ކުރަން- ޖަމީލް
ކައުންސިލް އިންތިހާބު ނުބާއްވަން އުޅެނީ ގަދަބާރުން ރައްޔިތުންގެ މައްޗަށް ވެރިކަން ކުރަން ކަމަށް ކުރީގެ ނައިބު ރައީސް އަދި އިދިކޮޅު ޕްރޮގްރެސިވް ކޮންގްރެސް ކޯލިޝަންގެ އެޑްވައިޒަރު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިހެން ވިދާޅުވެފައި މިވަނީ ކޮވިޑް-19އާ ގުޅިގެން އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުރުކުރުމުން ލޯކަލް ކައުންސިލް އިންތިޚާބު މާޗު މަހުގައި ނުބޭއްވޭނެކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވުމާ ގުޅިގެންނެވެ.
މިދިޔަ އަހަރު ބާއްވަން މަސައްކަތް ކުރި ލޯކަލް ކައުންސިލް އިންތިހާބު ފަސްކުރުމަކީ ސަރުކާރު ހިންގާ މައި ޕާޓީ ދިވެހި ރައްޔިތުންގެ ޑިމޮކްރަޓިކް ޕާޓީ އެމްޑީޕީއިން ރައްޔިތުންނާ ދެކޮޅަށް ކުރާ ބަޣާވާތެއް ކަމަށް ޖަމީލް ވިދާޅުވިއެވެ. އަދި ކައުންސިލް އިންތިހާބު ނުބާއްވަން އުޅެނީ ގަދަބާރުން ރައްޔިތުންގެ މައްޗަށް ވެރިކަން ކުރަން ކަމަށެވެ.
އެމްޑީޕީއަކީ ރައްޔިތުންގެ ވޯޓްގެ ހައްގަށް ކަމޭހިތާ ކަމަށް ވަރަށް ބޮޑަށް ދައުވާކުރި ޕާޓީއެއް ކަމަށް ވިދާޅުވެ ޖަމީލް ވަނީ ހުރިހާ ޑިމޮކްރަސީތަކުގައި ވެސް އިންތިހާބުތައް ކުރިއަށްދާ ކަމަށް ވިދާޅުވެފައެވެ.
https://twitter.com/mjameelahmed/status/1346431663727734785?s=21
އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވެފައި ވަނީ ސިއްހީ ކުއްލި ނުރައްކަލުގެ ހާލަތު ދިގު ދަންމާލުމާ ގުޅިގެން ކުރިން ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު މާޗު މަހުގެ ހަވަނަ ދުވަހު ދެން ނުބޭއްވޭނެ ކަމަށެވެ. ސިއްހަތުގެ ކުއްލި ނުރައްކަލުގެ ހާލަތު އަންނަ މަހުގެ ތިންވަނަ ދުވަހަށް މިއަދު ވަނީ އިތުރު ކޮށްފައެވެ. އެ ނިންމުމާއެކު އަންނަ މާޗް މަހުގެ ހަވަނަ ދުވަހު އިންތިހާބު ނުބޭއްވޭނެ ކަމަށް އިލެކްޝަންސް ކޮމިޝަނުން ވެސް ވަނީ ބުނެފައެވެ.
