ދަނޑުގައި ހުޅުޖަހައިގެން އާ ޓާފް ދަނޑެއް ސަރުކާރުން އަޅައި ނުދޭނެ: މަހްލޫފް
ހުޅު ޖަހައިގެން ޓާފު ދަނޑު އަޅައި ނުދޭނެ ކަމަށް ކުޅިވަރާ ބެހޭ ވަޒީރު އަހުމަދު މަހްލޫފް ވިދާޅުވެއްޖެ އެވެ.
މަހްލޫފް މިހެން ވިދާޅުވެފައި ވަނީ ގއ. ވިލިނގިލީ ޔޫތު ސެންޓަރު ފުޓްސަލް ދަނޑުގެ މެޓުތަކުގައި އަލިފާން ރޯކޮށްލުމާ ގުޅިގެންނެވެ. ގއ.ވިލިނގިލީ ފުޓްސަލް ދަނޑުގައި ބަޔަކު ރޯކޮށްލާފައި ވަނީ މިދިޔަ އަންގާރަ ދުވަހުގެ ރޭގައެވެ.
މިކަމާ ގުޅިގެން މިނިސްޓަރ ވިދާޅުވީ ހުޅު ޖަހައިގެން އެ ދަނޑުގައި ޓާފު އަޅައި ނުދޭނެ ކަމަށާއި ގއ. ވިލިނގިލީ ޔޫތު ސެންޓަރު ފުޓްސަލް ދަނޑުގެ މެޓުތަކުގައި އަލިފާން ރޯކޮށްލުމަކީ ވަރަށް ޒިންމާދާރުކަން ކުޑަ ކަމެއް ކަމަށެވެ. އަދި ކަމަކާއި ހިތްހަމަ ނުޖެހިގެން ދަނޑުގައި ރޯކޮށްލުމަކީ އެކަމަށް އޮތް ހައްލެއް ނޫން ކަމަށެވެ.
އޮންލައިން ނޫހެއް ކަމަށްވާ “ސަން" އާ ވާހަކަ ދައްކަވަމުން މިނިސްޓަރު މަހްލޫފް ވިދާޅުވީ، އެހެން ކަންތައް ކުރި ނަމަވެސް ސަރުކާރުން އެކަމުގެ ޕްރެޝަރެއް ނުނަގާނެ ކަމަށެވެ. އަދި ދަނޑުގައި ހުޅު ޖަހައިގެން އާ ޓާފެއް ލިބޭނެ ކަމަށް ހީކުރުމަކީ ގޯސް ވިސްނުމެއް ކަމަށް މަހްލޫފް ވިދާޅުވި އެވެ.
"އެގޮތަށް ކަންތައް ކޮށްގެން އިތުރު ޓާފެއް ސަރުކާރުން އަޅައި ނުދޭނެ. މީގެ ކުރިން ވެސް ބައެއް ރަށްރަށުގައި ދަނޑުތައް ގަސްތުގައި ހަލާކު ކުރުމުން ސަރުކާރުން އާ ދަނޑެއް އަޅައިދީފައި ނުވާނެ،" މިނިސްޓަރު މަހުލޫފް ވިދާޅުވި އެވެ.
ވިލިނގިލީގައި އަޅަމުންދާ ބޮޑު ފުޓުބޯޅަ ދަނޑާ ބެހޭ ގޮތުން ވާހަކަ ދައްކަމުން މަހްލޫފް ވިދާޅުވީ އެ ދަނޑުގެ ސަބްބޭސް ހަދަން ހަވާލު ކުރި ފަރާތުން ކޮށްފައިވާ މަސައްކަތް އެންމެ ރަނގަޅު ނޫންކަމަށް ފެންނާތީ އަލުން އެކަން ރަނގަޅުކުރަން ދިޔަ ވަގުތާ އެކަން ލަސްވެގެން ދިޔަ ކަމަށެވެ.
