ފުވައްމުލަކުން ގެއްލުނު ކުއްޖާ ނިޔާވެއްޖެ
މޫދަށް އެރި އުޅެނިކޮށް ގެއްލުނު ފުވައްމުލަކު ކުއްޖާ، ފަރުވާ ދެމުންދަނިކޮށް ނިޔާ ވެއްޖެއެވެ.
ފުލުހުން ވަނީ ފުވައްމުލަކު ހޮސްޕިޓަލާ ހަވާލާދީ ކުއްޖާގެ މަރުގެ ޚަބަރު ޔަގީން ކޮށްދީފައެވެ.
"ކުއްޖާ ހޮސްޕިޓަލަށް ގެންގޮސް ފަރުވާ ދެމުން ދަނިކޮށް ދާދި އެންމެއަކު ނިޔާވެފައިވާ ކަމަށް ހޮސްޕިޓަލުން މައުލޫމާތު ދޭ،" ފުލުހުން ނޫސްވެރިންނަށް ފޮނުވި މެސެޖްގައި ވިދާޅުވެފައިވެއެވެ.
ފުލުހުންގެ މީޑިއާ އޮފިޝަލަކު ވިދާޅުވީ، ފުވައްމުލަކު މާނޭރެ އަތިރި ސަރަހައްދަށް މޫދަށް އެރި އުޅުނު އުމުރުން 17 އަހަރުގެ ފިރިހެން ކުއްޖަކު ގެއްލިފައިވާ ކަމުގެ މައުލޫމާތު މިއަދު ހަވީރު 4:47 ހާއިރު ފުލުހުންނަށް ވަނީ ހުށަހަޅާފައިކަމަށެވެ. އަދި އެމައުލޫމާތު ލިބުމާއެކު އެ ކުއްޖާ ހޯދުމަށް އެ ސަރަހައްދުގައި ފުލުހުންނާއި އެ ރަށު ރައްޔިތުން ވަނީ ހަރަކާތްތެރިވެފައެވެ.
ފުލުހުން ވިދާޅުވީ، އެ ކުއްޖާގެ ހަށިގަނޑު ފެނިފައިވަނީ މިއަދު ހަވީރު 5:50 ހާއިރު މާނޭރެ އަތިރި ސަރަހައްދުގެ މޫދު އަޑިން ކަމަށެވެ.
އެކުއްޖާ ނިޔާވެއްޖެ ކަމުގެ ޚަބަރު ފުލުހުން ދީފައިވަނީ 18:45 ހާއިރުއެވެ.
