اللهގެ މަތިން ހަނދުމަ ނައްތާލައިފި ބަޔަކު އަމިއްލަ ނަފްސުމަތިން ހަނދުމަ ނެތިކޮށްލައްވާނެ، ފާފަތަކުގެ އަސްލަކީ އެއީ!
اللهގެ މަތިން ހަނދުމަ ނައްތާލައިފި ބަޔަކު އަމިއްލަ ނަފްސުމަތިން ހަނދުމަ ނެތިކޮށްލައްވާނެ، ފާފަތަކުގެ އަސްލަކީ އެއީ!
ހިތާމަޔާއެކު ވެސް ފާހަގަކޮށްލަން ޖެހޭ ކަމަކީ މިއަދު މުޖުތަމައުގެ އެންމެ ނުބައި އެއް އާދައަކީ ނެތިމޮށުމާއި ޣީބަ ބުނުން ފަދަ ޢަމަލުތަކެވެ. މަލާމާތާއި ފުރައްސާރަ ކުރުން ފަދަ ކަންކަމެވެ. އެއީ އެމީހާއަށް އެނގިގެން ވިޔަސް އަދި ނޭނގި ވިޔަސް މެއެވެ.
ކުރިއަރާފައިވާ މި ޒަމާނުގައި މިކަން އަދި މާ ފަސޭހައިން ކުރެވެން އޮތުމުން ، މީހުން ދަނީ މީސްމީޑިއާގައި ފޮރުވި އިނދެ ވަގު އެކައުންޓްތަކާ އެއްޗެހި ހަދާ ނެތި މޮށެމުން ފުރައްސާރަ ކުރަމުންނެވެ. މީސްމީޑިއާގައި ނޫން ނަމަވެސް ދެމީހަކު އެއް ވެއްޖެނަމަ ، މުޅަމަސް ކެއުމަކީި އާދައަކަށް ވެއްޖެއެވެ.
ބައެއް ފަހަރު އެފަދަ ޢަމަލުތައް ކުރާ މީހުންނަކީ ތިމާގެ އެންމެ ގާތް މީހުން ކަމުގައި ވެއެވެ. ލޭގެ ގޮތުން ނުވަތަ ރަޙުމަތްތެރިކަމުގެ ގޮތުންނެވެ. ވިސްނާލައްވާށެވެ. އެފަދަ މީހުން އެކަން އެ ކުރަނީ ކޮންމެހެން ތިމާއާމެދު މާބޮޑު ހަސަދަވެރިކަމެއް ނުވަތަ ނަފްރަތްތެރިކަމެއް އޮވެގެން ނޫނެވެ.
އެފަދަ މީހުން ، ﷲ ތަޢާލާގެ މި ބަސްފުޅާމެދު ވިސްނާލުން ހުއްޓެވެ. ﷲ ތަޢާލާ މަތީން ހަނދުމަ ނައްތާލާ ބަޔަކަށް ، ނިކަމެތި ޙާލަކާ ކުރިމަތިވެއެވެ. އެއީ އެބައިމީހުންނަށް އަންނަ ބަލިމަޑުކަމެއް ނުވަތަ އެފަދަ ކަމެއް ނޫނެވެ. ﷲ ތަޢާލާ އަންގަވާފައި ވަނީ އެ އިލާހު ހަނދުމަ ނައްތައިލި މީހުން ، އެއުރެންގެ އަމިއްލަ ނަފުސްތައް ހަނދުމަ ނެތިކޮށްލައްވާ ވާހަކައެވެ.
وَلَا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ ۚ أُولَٰئِكَ هُمُ الْفَاسِقُونَ
"އަދި اللَّه ހަނދުމަ ނައްތައިލި މީހުން ފަދައިން ތިޔަބައިމީހުން ނުވާށެވެ! ފަހެ، އެކަލާނގެ އެއުރެންގެ އަމިއްލަ نفس ތައް ހަނދުމަނެތި ކޮށްލެއްވިއެވެ. އެއުރެންނީ، ހަމަ فاسق ންނެވެ."
ވިސްނަވާލައްވާށެވެ. އެބައެއްގެ ހިތްތައް ހަރުވެ ، ތިމާމެންނަށް ހަޑިމުޑުދާރު ޢަމަލުތަކުގެ ތެރެއަށް ވަދެގެން ދަނީ ވެސް ފަޚުރުވެރިކަމާއެކުގައެވެ. ކިހާބޮޑު ނިކަމެތި ކަމެއްތޯއެވެ.
މިފަދަ މީހުންނަށް އޮތް ފަރުވާއަކީ ހެޔޮ ޢަމަލުތައް ގިނަ ކުރުމެވެ. ﷲ ތަޢާލާގެ މަގަށް ރުޖޫޢަ ވުމެވެ. މީހުންގެ ނެތިމޮށި ، ޣީބަ ބުނެފައި ވަނީ ޖަމާޢަތެއްގައި ނަމަ އެފަދަ ޖަމާޢަތެއްގައި އެމީހެއްގެ ރަނގަޅު ވާހަކަ ދެއްކުމެވެ. މާފަށް އެދުމެވެ. މިއީ މިކަމުގައި އޮތް ދީނީ އުސޫލެވެ.
ﷲ ތަޢާލާ ވަޙީ ކުރައްވާފައި ވެއެވެ.
فَفِرُّوا إِلَى اللَّهِ ۖ
ފަހެ، ތިޔަބައިމީހުން اللّه އަށް ކިޔަމަންވުމަށް އަވަސްވެގަންނާށެވެ!
އެހެންކަމުން ފާފަތަކުން ކަޅުވެ ހަރުވެފައިވާ އަހަރެމެންގެ ހިތްތައް ސާފުކޮށް ކާމިޔާބުގެ މަގަށް ދެވެން އޮތީ اللهގެ މަގަށް އެނބުރި ރުޖޫޢަވެ ހެޔޮ ޢަމަލުތައް ގިނަ ކޮށްގެންނެވެ.
އިސްލާމީ ދަރުހަކުން
Ads by STO
