ޖުޑިޝަރީ ކޮމިޓީގެ މުޤައްރިރަކަށް ސައްތާރު އިންތިޚާބުކޮށްފި

ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ މުޤައްރިރުކަމަށް ހޮޅުދޫ ދާއިރާގެ މެންބަރު އަބްދުއްސައްތާރު މުޙައްމަދު އިންތިޚާބުކޮށްފިއެވެ.

މިއަދު ބޭއްވުނު ކޮމިޓީ ބައްދަލުވުމުގައި ޖުޑިޝަރީ ކޮމިޓީގެ މުޤައްރިރަކަށް ސައްތާރު އިންތިޚާބުކޮށްފައި ވަނީ މަނަދޫ ދާއިރާގެ މެންބަރު ހުސްނީ މުބާރިކް މިއަދު އެ ކޮމިޓީން އިސްތިއުފާ ދެއްވުމުންނެވެ.

ހުސްނީ އެ ކޮމިޓީން އިސްތިއުފާދެއްވީ އެ ކޮމިޝަނަށް މަޖިލީހުން ކަނޑައަޅާ މެންބަރުކަމަށް އޭނާ އިންތިޚާބު ކުރުމުންނެވެ. ކުރިން ސައްތާރު ހުންނެވީ އެ ކޮމިޓީގެ ނައިބު މުގައްރިރުގެ މަގާމުގައެވެ. އެހެންކަމުން ޖުޑިޝަރީ ކޮމިޓީގެ ނައިބު މުޤައްރިރުގެ މަޤާމަށް ފުނަދޫ ދާއިރާގެ މެންބަރު މުޙައްމަދު މަމްދޫހު ވަނީ މިއަދުގެ ކޮމިޓީ ބައްދަލުވުމުގައި އިންތިޚާބުކޮށްފައެވެ.

ޖޭއެސްސީގެ މެމްބަރުކަމުގައި ކުރިން ހުންނެވީ މާފުށީ ދާއިރާގެ މެންބަރު ހުސައިން ރިޒާއެވެ. އެމަނިކުފާނު ވަނީ އެ ކޮމިޝަންގެ މެންބަރުކަމުންނާއި ރައީސްކަމުން އިސްތިއުފާ ދެއްވައިފައެވެ. އެއާ އެމކު މަޖިލީހުން ވަނީ ހުސްނީ މުބާރިކް ޖޭއެސްސީގެ މެންބަރުކަމަށް އައްޔަންކުރައްވައިފައެވެ.