ފައުޒާން ނިޔާވުން: އެކުގައި ކިޔެވި ކުދިންނަށް ކޮށްފައިވާ އަސަރުގެ ބޮޑުކަމުން، ކްލާސް ބަދަލުކޮށް ކައުންސިލިން ދެނީ
މިއަހަރު ފެށުމާއެކު މުޅި ރާއްޖެ ސިއްސުވާލި އެންމެ ބޮޑު ޚަބަރަކަށްވީ، ޏ. ފުވައްމުލައް/ޔޫރޯގެ އަޙުމަދު ފައުޒާން ގެނބިގެން ނިޔާވި ޚަބަރެވެ.
އުމުރުން 17 އަހަރުގެ ފައުޒާން އަކީ އެންމެންނާ ވެސް ގުޅޭ ނުހަނު އެކުވެރި މަޖާ މިޒާޖެއްގެ ކުއްޖެއްކަން އޭނާގެ އާއިލާއާ ގާތް އެންމެން ވެސް ފާހަގަ ކުރެއެވެ.
ފައުޒާން ވަކިވެގެން ދިޔުން ވަނީ އެތައް ބަޔަކަށް ފުން އަސަރުތަކެއް ކުރުވާފައިވާ ހާދިސާއެކެވެ. އެފަދައިން އެންމެ ފުން އަސަރެއް ކޮށްފައި ވަނީ އޭނާއާއެކު އެއް ކްލާހެއްގައި ކިޔަވަމުން ދިޔަ ކްލާސް ކުދިންނަށެވެ.
ފުވައްމުލަކު ސްކޫލްގެ ޕްރިންސިޕަލް ޙަސަން ޒަރީރު ވިދާޅުވީ ފައުޒާން ނިޔާވުމާ ގުޅިގެން އެކްލާހު ކުދިންނަށް ކުރި ފުން އަސަރެއްގެ ބޮޑުކަމުން، އެކުދިން އެހެން ކްލާހަކަށް ބަދަލު ކުރުމާއެކު ކައުންސެލިން ވެސް ދޭން ޖެހުނު ކަމަށެވެ.
"އެހާދިސާއާ ގުޅިގެން ސްކޫލް ކިޔެވުން ފެށުނު ފުރަތަމަ ދުވަހު ގްރޭޑް 10 އަށް ކިޔެވުން ބަންދު ކުރިން. އޭގެ ޖެހިގެން އައި ދުވަހު ބޭއްވި ޚާއްސަ އެސެމްބްލީގައި ވެސް ދަރިވަރުން ވަރަށް ބޮޑަށް ރުއި، އެސެމްބްލީ ފަށަން ޤުރްއާން ކިޔެވި ކުއްޖާވެސް ވަރަށް ހިތްވަރު ކޮށްގެން ކިޔެވުން ނިންމާލީ. ފައުޒާންގެ ހަނދާންތަކުގެ ސަބަބުން ދަރިވަރުންނަށް ކުރި ފުން އަސަރުން، ސްކޫލްގެ މެނޭޖްމަންޓުން ނިންމީ އެހެން ކްލާހަކަށް ފައުޒާންގެ ކްލާސް ކުދިން ބަދަލު ކުރަން. ދަރިވަރުން ވެސް އެހަނދާންތަކުން ދުރުވާން މަސައްކަތް ކުރަން ވެގެން" ޒަރީރު ވިދާޅުވިއެވެ.
އެސްކޫލުގެ ޕްރިންސިޕަލް ޒަރީރު ވިދާޅުވި ގޮތުގައި، މިހާދިސާއާއި ގުޅޭގޮތުން ނަފްސާނީ ގޮތުން އަސަރު ކޮށްފައިތިބި ދަރިވަރުންނަށް އެހީތެރިވުމުގެ ގޮތުން އެޑިއުކޭޝަން މިނިސްޓްރީ އާއި، ސްކޫލުން ގުޅިގެން ދަނީ ހަރަކާތްތަކެއް ހިންގަވަމުންނެވެ.
"ދަރިވަރުން ހަމައަކަށް އެޅުވޭތޯ މިނިސްޓްރީ އޮފް އެޑިއުކޭޝަނާއި ރެޑް ކްރެސެންޓް އަދި ވަރަށް ގިނަ ފަރާތްތަކެއް ގުޅިގެން، ކައުންސެލިން ސެޝަންތަކެއް މިހާރު އެބަ ކުރިއަށް ގެންދަން އެދަރިވަރުންނަށް. މީގެއިތުރުން ދީނީ ގޮތުން ވެސް އެކުދިންނަށް އެހީތެރިވުމުގެ ގޮތުން ދަރުސްތައް ވެސް އެބަ ބާއްވަން. އެއީ ކެތްތެރިވުމަކީ ކޮބައިކަމާއި ކެތްތެރިވާން ޖެހެނީ ކީއްވެކަން ވެސް އެކުދިންނަށް ކިޔައިދޭން. ޝެއިޚް ޝިނާން ވަޑައިގަންނަވާ މިއަދު ދަރުހެއް ދެއްވައިފި." ޒަރީރު ވިދާޅުވިއެވެ.
ޒަރީރު ވެސް ފާހަގަ ކުރެއްވި ގޮތުގައި ފައުޒާން އަކީ ވަރަށް ވެސް އަޚްލާޤް ރަނގަޅު ކުއްޖެކެވެ. ކުދިންނާ ގުޅިގެން މަސައްކަތް ކުރަން އެނގުމާއި ފައުޒާންގެ ލީޑަރޝިޕް ރަނގަޅުކަން ވެސް ޒަރީރު ފާހަގަ ކުރެއްވިއެވެ.
ސްކޫލްގެ ފަރާތުން ބެލެނިވެރިންނަށް ދެއްވާ މެސެޖެއްގެ ގޮތުން ޒަރީރު ވިދާޅުވީ ފައުޒާން ވަކިވެގެން ދިޔަ ކަމުގައިވިޔަސް އޭނާގެ ހަނދާންތައް އެންމެން ވެސް ކުރަމުން ދާނެ ކަމަށެވެ.
"ފައުޒާން ގެ ވަކިވެގެން ދިޔަ ކަމުގައި ވިޔަސް އޭނާގެ ހަނދާންތައް މުޅި ޤައުމު ވެސް ކުރަމުން ދާނެ. ބެލެނިވެރިންނަށް ބުނެލަން ބޭނުންވާ ވާހަކައަކީ، ފައުޒާން ވަކިވެގެން ދިޔަޔަސް އެވަރަށް ހިތާމަ ނުކުރުމަށާއި ކެތްތެރިވާން" ޒަރީރު ވިދާޅުވިއެވެ.
މިހިތާމަވެރި ހާދިސާގެ ސަބަބުން ސްކޫލަށް ދިމާވެފައިވާ މާޔޫސްކަމާއި ދަރިވަރުންގެ ހާލު ވަރަށް ގާތުން މިނިސްޓަރ އޮފް އެޑިއުކޭޝަން ޑ. އައިޝަތު ޢަލީ ބައްލަވާކަން ވެސް ފާހަގަ ކުރައްވާ އެސްކޫލުގެ ޕްރިންސިޕަލް ހަސަން ޒަރީރު ވަނީ އެމިނިސްޓްރީއަށާއި މިނިސްޓަރަށް އިޚްލާސްތެރި ޝުކުރެއް އަދާ ކުރައްވާފައެވެ.
