އިންޑޮނޭޝިއާއަށް ބާރުގަދަ ބިންހެލުމެއް އައިސް، ހަތް މީހަކު މަރުވެ ގިނަބަޔަކަށް އަނިޔާވެއްޖެ!
ޖަކާޓާ، އިންޑޮނޭޝިއާ: ސުލަވެސީ އައިލެންޑް އަށް މިއަދު ހެނދުނު ބާރުގަދަ ބިންހެލުމެއް އައިސް ހަތް މީހަކު މަރުވެ، ގިނަ އަދަދެއްގެ ބަޔަކަށް އަނިޔާވެއްޖެއެވެ.
ރިޕޯޓުތަކުން ބުނާ ގޮތުގައި ސުލަވެސީ އައިލެންޑަށް އަރާފައި ވަނީ 6.2 މެގްނިޓިއުޑްގެ ބިންހެލުމެކެވެ.
އެޤައުމުގެ ޑިޒާސްޓާ މިޓިގޭޝަން އޭޖެންސީން ބުނެފައިވާ ގޮތުގައި މިބިންހެލުމުގެ ދިގުމިނުގައި ހަ ކިލޯމީޓަރު (3.73 މޭލު) ހުރިއިރު، މެޖީން ސިޓީގެ ގާތްގަނޑަކަށް 10 ކިލޯމީޓަރު ފުންމިނަށް ބިންގަނޑު ކަނޑައިގެން ގޮސްފައިވެއެވެ.
މެޖީން ސިޓީގެ ޑިޒާސްޓާ މެނޭޖްމަންޓް އޭޖެންސީން ބުނެފައިވަނީ އެސިޓީން މިހާދިސާގައި ހަތަރު މީހަކު މަރުވެފައިވާ ކަމަށާއި 600 އަށްވުރެ ގިނަ މީހުންނަށް އަނިޔާ ވެފައިވާ ކަމަށެވެ.
މީގެއިތުރުން މަމޫޖޫއިން ތިން މީހަކު މަރުވެފައިވާއިރު، އެ ސަރަހައްދުން 24 އަށް ވުރެ ގިނަ މީހުން ވަނީ ޒަޚަމްވެފައެވެ.
އިންޑޮނޭޝިއާގެ ނޭޝަނަލް ބޯޑް ފޮ ޑިޒާސްޓާ މެނޭޖްމަންޓުން ބުނެފައިވާ ގޮތުގައި ބިންހެލުން އެރި ވަގުތު، 3000 އަށްވުރެ ގިނަ މީހުން ވަނީ ރައްކާތެރިތަނަކަށް ދިޔުމަށްޓަކައި އެމީހުންގެ ގެދޮރުން އަވަހަށް ނިކުމެފައެވެ. ސުލަވެސީ އައިލެންޑުން 62 ގެއެއް މިކާރިސާގައި ހަލާކުވެގެން ދިޔަ ކަމަށް ވެސް ރިޕޯޓު ކޮށްފައިވެއެވެ.
މީގެއިތުރުން، އުސްކޮށް ހަދާފައިހުރި ބައެއް އިމާރާތްތަކަށް ވެސް ވަނީ މިބިންހެލުމުގެ ސަބަބުން ގެއްލުންވެފައެވެ. އޭގެތެރޭގައި މިތުތާ މަނާކަރާ ހޮސްޕިޓަލާއި ސަރުކާރުގެ ބައެއް އިމާރާތްތަކާއި ހޮޓާތައް ވެސް ހިމެނޭ ކަމަށް ރިޕޯޓުތަކުން ބުނެފައިވެއެވެ.
