ވިލިނގިލީ ކޮވިޑް ފެސިލިޓީގައި ތިބި ހައި ރިސްކް ދެމީހުން އިތުރު ފަރުވާއަށް މާލެ
ދެއްވަދޫ ކްލަސްޓާގައި ފައްސިވެގެން، ގއ. ވިލިނގިލީ ކޮވިޑް ފެސިލީޓީގައި ފަރުވާ ހޯދަމުން އަންނަ ކޮވިޑް ބަލީގެ ހައި ރިސްކު ދެ މީހުން އިތުރު ފަރުވާއަށް މާލެ ގެނައުމަށް ނިންމައިފިއެވެ.
ދެއްވަދޫ ކްލަސްޓާގެ ތިން މީހަކަށް ވިލިނގިލި ކޮވިޑް ފެސިލިޓީގައި ފަރުވާ ދެމުން އަންނައިރު، އޭގެތެރޭގައި އުމުރުން ދުވަސްވީ ދެ މީހުން ހިމެނެއެވެ. އެއީ އުމުރުން 79 އަހަރުގެ މީހަކާއި 68 އަހަރުގެ މީހެކެވެ. ދެން ހިމެނެނީ 20 އަހަރުގެ ޒުވާނެކެވެ.
20 އަހަރުގެ މީހާގެ ހާލު ސްޓޭބަލް އިރު، އިތުރު ފަރުވާއަށް މާލެ ގެންދަނީ އުމުރުން ދުވަސްވީ ދެ މީހުންނެވެ.
މިމަހުގެ ހަތް ވަނަ ދުވަހު ދެއްވަދޫން ކޮވިޑް-19 އަށް ފައްސިވި މީހަކާ ބައްދަލުވި އިތުރު ހަތް މީހަކު ކޮވިޑް-19 އަށް ފައްސިވުމުން އެރަށަށް އަރައި ފޭބުން މަނާ ކުރިއެވެ. ކޮވިޑަށް ފައްސި ހަތް ކޭސް ފެނުމާއެކު އެރަށް މޮނީޓަރިންގަށް ލެވި، ކޮންޓެކްޓް ޓްރޭސިންގ ހެދުމުގެ މަސައްކަތުގެ ތެރެއިން ރޭންޑަމް ސާމްޕަލް ވެސް ނަގަން ފެށުނެވެ.
މީގެއިތުރުން ދެއްވަދޫން ލ. ފޮނަދޫއަށް ދިޔަ ދެ މީހަކު ވެސް ކޮވިޑަށް ފައްސިވުމުން ފޮނަދޫ އާއި ލ. ގަން ވެސް މޮނީޓަރިންގެ ހާލަތަށް ގެންދެވުނެވެ.
