ހަގީގީ ހާދިސާ: ކެންސަރު ބަލީގައި މަންމަ ދުނިޔެ ދޫކުރީ އަހަރެންގެ އުމުރުން އެންމެ 3 އަހަރުގައި، ދިރިއުޅުން ވެއްޓުނީ ފުން އަނދަވަޅަކަށް!
ކޮންމެ މީހަކު ވެސް ދުނިޔެއަށް އުފަންވުމުގެ އަސްލަކީ މައިމީހާއެވެ. އަދި ގިނަ ކުދިން އެންމެ ފުރަތަމަ ދަސްކުރާ ލަފްޒަކީ ވެސް "މަންމަ" މި ލަފްޒެވެ. ތަނަކަށް ވެއްޓ ތަދުވީކަމުގައި ވީނަމަވެސް، އަދި ކަމަކާ ބިރުން ސިއްސައިގެން ދިޔަ ނަމަވެސް ބޭއިޚުތިޔާރުގައި ކޮންމެ މީހެއްގެ ދުލުން ވެސް އެންމެ ފުރަތަމަ ނިކުންނަ ލަފުޒަކީ ހަމަ "މަންމަ" އެވެ. ވީއިރު ދުނިޔޭގައި މައިމީހާ ނެތިސް އުފުލަން ޖެހޭ ބުރަ، އެނގޭނީ ވެސް އެފަދަ ހިތްދަތި ދިރިއުޅުމެއް ތަހައްމަލު ކޮށްފައިވާ އަދި ތަޙައްމަލު ކުރަމުން އަންނަ މީހަކަށް ކަން ވެސް ގައިމެވެ.
މިއީ ވެސް ޅަފަތުގައި މަންމަގެ ލޯބިން މަޙުރޫމުވި ދިވެހި އަންހެން ކުއްޖެއްގެ ހިތްދަތި ވާހަކައެކެވެ. ނަން ހާމަ ނުކުރުމަށް އެދި އޭނާ "ދެން"އާ މި ވާހަކަތައް ހިއްސާ ކުރީ ހިތްވަރުކޮށް ނަމަވެސް ފުން އަސަރަކާ އެކީގައެވެ. ކިޔައިދެމުން ދިޔަ ވަގުތު އޭނާގެ އަޑުން ފޮރުވިފައިވާ އެތައް މާޔޫސީ ކަމެއް ފެނިގެން ދިޔަ ފަދައެވެ. ވާހަކަތައް އަޑު އަހައި އަޅުގަނޑުމެންގެ ލޯ، ފެންކަޅިވެ ގައިން ހީބިހި ނެގީ ވެސް އޭނަގެ ތަޖުރިބާ "ދެން"އަށް ހިއްސާ ކުރި ވަގުތު ކުރި ފުން އަސަރަކުންނެވެ.
ފައުޒާ (އަސްލު ނަމެއްނޫން) ގެ މަންމަ މި ފަނާވަނިވި ދުނިޔެއާ އަލްވަދާއު ކީ ފައުޒާގެ އުމުރުން އެންމެ 3 އަހަރުގައެވެ. އަދި އުމުރުން 3 އަހަރުގައި މަންމަ ވަކިވެގެން ދިޔަ ނަމަވެސް، ފައުޒާ މި ދުނިޔެއަށް ފުރަތަމަ ނޭވާ ލީ ހިނދުން ފެށިގެން ވެސް ފައުޒާއަށް މައިވަންތަ ކަމުގެ ލޯތްބާއި ކުލުނުގެ ފޮނި އިހުސާސް ކުރެވިފައެއް ނުވެއެވެ. ސަބަބަކީ އެ މަންމަ އަކީ ލޭގެ ކެންސަރު ޖެހި މަރާ ހަނގުރާމަ ކުރަމުން ދިޔަ ބަލި މީހަކަށް ވާތީއެވެ.
މަންމަގެ ސިއްހީ ހާލަތު ހުރި ގޮތުން ފައުޒާ ޖެހުނީ ގިނަ ދުވަސްތަކެއް މަންމަގެ ލޯތްބާއި އަޅާލުން ތަޖުރިބާ ނުކުރެވި، އެގޮތުގައި އަބަދުމެ އަބަދަށް މަންމައަށް ވަދާޢީ ސަލާމުގެ ސަލާމުން ސަލާމް ކުރާށެވެ. ފައުޒާގެ އުމުރުން އެއް އަހަރުވީ ވެސް މަންމަގެ ބޭސް ފަރުވާއަށް ރާއްޖެއިން ބޭރުގައި ހުއްޓައެވެ. ބޮޑުވަމުން އަންނަ އަންހެން ދަރިއަކަށް މައެއްގެ ލޯތްބާއި ކުލުނަކީ ކިހާ މުހިންމު އެއްޗެއް ކަން އޭރު ފައުޒާއަކަށް ނުވިސްނެއެވެ. އެހެންނަމަވެސް ފައުޒާ މިއަދު އެ މަންމަ ދެކިލުމަށް އެހުރީ ކެތް މަދުވެފައެވެ.
މަންމަ ނިޔާވުމުން ހުދު ފޮތިގަނޑެއް އަޅައިގެން ގެންދިޔަ މަންޒަރު މިއަދު ވެސް ސިފަވާ ކަމަށާއި، އޭރު އުމުރުން ކިތަންމެ ހަގު ނަމަވެސް އެމަންޒަރަކީ ދުވަހަކު ވެސް ހަނދާނުން ފިލައިގެން ދާނެ މަންޒަރެއް ނޫން ކަމުގައި ފެން ކަޅިވެފައިވާ ހާލު ފައުޒާ "ދެން"އާ ހިއްސާ ކުރިއެވެ. އެދުވަހު ފައުޒާ ނިދައިފައި އޮއްވާ އާއިލާ އެހެންމީހަކު އައިސް ފައުޒާ ނެގި ކަމަށާއި، ގޭތެރޭގައި އެންމެން ހަލަބޮލިވެ ރޮމުންދިޔަ މަންޒަރު ފެނުނު ކަމަށް، އެދުވަހު ކަންތައް ހިނގައި ދިޔަ ގޮތް ކިޔައިދެމުން ފައުޒާ ބުންޏެވެ.
ފައުޒާގެ ބައްޕަ އެތައް ދުވަހަކަށް ފަހު ދެވަނަ ކައިވެންޏެއް ކޮށް ފައުޒާއަށް ދޮން މަންމައެއް ގެނެސްދިނެވެ. ފައުޒާ ހީކުރީ މައެއްގެ ލޯތްބާއި ކުލުނު އެހިސާބުން ފައުޒާއަށް ލިބިގެން ދާނެ ކަމަށެވެ. އެހެންނަމަވެސް ކަންތައް ވީ ހީކުރި ގޮތާ މުޅިން ޚިލާފަށެވެ. ފައުޒާ ހުން އައިސް ބަލި އެނދުގައި އޮތް މަންޒަރު އެ ދޮންމަންމަ އަށް ފެނުނަސް ފެންނަ ކަމަށް ވެސް ނުހަދަނީއެވެ. އެންމެ ކުޑަމިނުން ފައުޒާގެ ކިބައިން "ދަރިފުޅާ ބަލީހޭ" ވެސް އަހާ ނުލަނީއެވެ.
އެހިސާބުން ފައުޒާ ކުރިމަތިލާން ޖެހުނީ އިތުރު ގޮން ޖެހުމަކާއެވެ. މަންމަގެ ލޯތްބާއި އަޅާލުން ނުލިބުނު ތަނުގައި ފައުޒާގެ އަމިއްލަ ބައްޕަގެ ލޯތްބާއި އަޅާލުން ވެސް އެ ބައްޕަ ދިރިދުނިޔޭގައި ފައުޒާއަށް ނުލިބުނީއެވެ. އެހެންނަމަވެސް ފައުޒާ ފަހަތަކަށް ނުޖެހެއެވެ. ގިސްލާ ރޮމުން ވެސް ފައުޒާ ނިންމީ ފައުޒާއަކީ ހަރުދަނީ މީހަކަށް ވުމަށް ޓަކައި އަމިއްލައަށް މަސައްކަތް ކުރުމަށެވެ. ސުކޫލުގައި އުޅޭ އިރު އޮންނަ އިތުރު ހަރަކާތްތަކުން ވެސް އެހެން ކުދިންގެ މައިންބަފައިން އައިސް އެކުދިންނަށް ހިތްވަރު ދޭ މަންޒަރު ފެނުނަސް، ރިހޭ ހިތުގައި އަތް އަޅައި ކަރުނަތައް ފޮރުވުމަށް ފަހު ފައުޒާ އިތުރަށް މަސައްކަތް ކުރީއެވެ.
މިއަދު ފައުޒާއަކީ ރަނގަޅު ވަޒީފާއެއްގައި އުޅޭ ހަރުދަނާ އަންހެނެކެވެ. އުމުރުން 21 އަހަރުގެ ފައުޒާ މިހާރު އުޅެނީ ލޯބީގެ ގޮތުން މީހަކާ ގުޅި އެ ގުޅުން ކުރިއަށް އޮތް މަރުހަލާއަށް ގެންގޮސް ކައިވެނި ކުރާށެވެ. ފައުޒާ މީހަކާ އެކު ޒަވާޖީ ޙަޔާތެއް ފެށުމަށް އުޅޭ ޚަބަރު ފައުޒާގެ ބައްޕައަށް ދިނުމުން، އެއީ ކޮންކަހަލަ ކުއްޖެއްތޯ ނޫނީ އެކަމާ ގުޅުވައިގެން އެއްވެސް ބަހެއް ބުނެފައެއް ނުވެއެވެ. މިއަދު ފައުޒާއަކީ އަމިއްލަ ފައި މައްޗަށް ތެދުވެ ހުރި ހިތްވަރު ގަދަ އަންހެނެކެވެ.
ފައުޒާގެ މި ހިތްދަތި ދިރިއުޅުމުގެ ވާހަކަ ލިޔުމަކުން ގެނެސްދިނުމަކީ ފަސޭހަކަމެއް ނޫނެވެ. އެހެންނަމަވެސް ހާމަވެގެންދާ ކަމަކީ ފައުޒާއަކީ ޅަފަތުގައި މަންމަގެ ލޯބިން މަޙުރޫމު ވެފައި ހުރި ކުއްޖެއް ނަމަވެސް، ދަރިން ދެކެ ލޯބިވާނެ ގޮތާއި މިންވަރު ލޮލުން ދެކި އެކަން ދަސްކޮށް، އެހެންމީހެއްގެ އެހީތެރިކަމާ ނުލާ ކުރިއަށް އައިސްފައިވާ ފިސާރި އަންހެނެކެވެ. ފައުޒާގެ ހިތްދަތި ދިރިއުޅުން ކަޑައްތު ކުރި ގޮތް އެންމެ ކައިރިން އެނގޭނެ އެއް ބަޔަކީ ފައުޒާގެ ޅަފަތުގެ އެކުވެރިން ކަމަށާއި، އެމީހުންގެ ފަރާތުން މަދަދުވެރިކަމާއި، ލޯބި ހިފެހެއްޓުމެއް ނެތި އަބަދުވެސް ލިބެމުން ދިޔަ ކަމަށް ފައުޒާ ކިޔައިދިނެވެ. އަދި އެކަމަށް އެމީހުންނަށް އަބަދުވެސް ޝުކުރުވެރިވާނެ ކަމަށް ފައުޒާ ފާހަގަ ކުރިއެވެ.
ފައުޒާގެ އުއްމީދަކީ މިއަދު ފައުޒާގެ މަންމަ ދުނިޔޭގައި ހުރިނަމަ އެމަންމަ މިއަދު ފައުޒާއާ މެދު ފަޚުރުވެރިވުމެވެ. އަދި މަންމަ މަތިން ހަނދާން ވާ ކޮންމެ ފަހަރަކު ފޯނުގެ "ނޯޓްސް" ގައި ލިޔެފައިވާ ނޯޓުތައް މަންމައަށް ކިޔައިދޭނެ ފުރުސަތެއް ލިބިގެން ދިއުމެވެ. އަދި ފައުޒާގެ އަމިއްލަ ދަރިއެއް މިދުނިޔެއަށް ނޭވާ ލާނެ ދުވަހު އެދަރިފުޅުގެ މާމަ މިދުނިޔޭގައި ނުހުންނާނެ ކަމީ އެކަމާ އަބަދުވެސް ހިތާމަ ކުރާނެކަމެއް ކަމުގައި ފައުޒާ ފާހަގަ ކުރިއެވެ. ދުޢާއަކީ ފައުޒާގެ މަންމަ ގެ ފުރާނައަށް ރަޙުމަތް ލައްވާ ސުވަރުގޭގެ ދާއިިމީ ނިޢުމަތް މިންވަރުކޮށްދިނުމެވެ. އާމީން.
