ގެއްލިގެން ހޯދަމުން ދިޔަ މީހާ ފެނިއްޖެ، ހުރީ ފުރިހަމަ ސިއްޙަތުގައި
ރިޔަލު ދޯންޏެއްގައި، އެކަނި މަހަށް ގޮސް އުޅެނިކޮށް ގެއްލިގެން ހޯދަމުން ދިޔަ މީހާ ފެނިއްޖެއެވެ.
އެމްއެންޑީއެފް ގެ ތަރުޖަމާނު މޭޖަރ އިބްރާހިމް އާޒިމް ވިދާޅުވީ 18:26 ގައި އެމީހާ ކޯސްޓްގާޑުގެ ލޯންޗު އެފްއައިސީ އަށް ފެނިއްޖެ ކަމަށާއި ކޯސްޓް ގާޑު ލޯންޗަށް މިހާރު އެމީހާ ނަގައިފައިވާ ކަމަށެވެ.
އެމީހާ ފެނިފައި ވަނީ ރަންނާޅި ރިސޯޓުގެ އިރުމަތިންނެވެ. އެމްއެންޑީއެފް އިން ބުނީ ކޯސްޓްގާޑު ލޯންޗުގައި އޭނާ މާފުއްޓަށް މިހާރު ގެންދާ ކަމަށެވެ.
މާފުށި ކައުންސިލުގެ ރައީސް އުސްމާން ރަޝީދު "ދެން" އަށް މައުލޫމާތު ދެއްވަމުން ވިދާޅުވީ، ގެއްލިގެން ހޯދަމުން ދިޔަ މީހާގެ ހާލު ރަނގަޅު ކަމަށާއި ހުރީ ފުރިހަމަ ސިއްޙަތުގައި ކަމަށެވެ.
"އެމީހާ މާފުއްޓަށް ގެނައުމުގެ މަސައްކަތް ދަނީ ކުރިއަށް. އިރާދަ ކުރެއްވިއްޔާ ހުރީ ފުރިހަމަ ރަނގަޅު ސިއްޙަތުގައި" އުސްމާން ވިދާޅުވިއެވެ.
މިއަދު ފަތިހު 5:30 ހާއިރުން ފެށިގެން ގެއްލިގެން ހޯދަމުން ދިޔައީ ކ. މާފުށީ/ ޝޭޑީގްރޯ އަހުމަދު އާދަމް މަނިކު އެވެ. އޭނާއަކީ ޚާއްސަ އެހީއަށް ބޭނުންވާ މީހެއް ކަމަށް ވެސް މައުލޫމާތު ލިބިފައިވެއެވެ.
