ރައީސް ޔާމީން މިނިވަން ކުރަން ސީދާ މަގުމަތީ ހަރަކާތަށް ނުކުންނަން އިދިކޮޅު ކޯލިޝަނުން ނިންމައިފި
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިނިވަން ކުރަން ސީދާ ހަރަކާތަށް ނުކުންނަށް އިދިކޮޅު ޕްރޮގްރެސިވް ކޯލިޝަނުން މިއަދު ނިންމައިފިއެވެ.
މިކަމާއި ގުޅިގެން އެ ކޯލިޝަނުން ވަނީ ޤަރާރެއް ފާސްކޮށްފައެވެ. މިޤަރާރަކީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކައުންސިލުތައް އެއްކޮށް ކުރިއަށް ގެންދިޔަ ޖޮއިންޓު ކައުންސިލަށް އެ ކޯލިޝަން ހިންގެވުމާ ވަގުތީ ގޮތުން ހަވާލުވެވަޑައިގެން ހުންނެވި ޕީއެންސީގެ ރައީސް ޢަބްދުއްރަޙީމް ޢަބްދުﷲ (އަދުރޭ) ހުށަހެޅުއްވި ޤަރާރެކެވެ.
މިޤަރާރުގައި ބުނެފައިވަނީ ރައީސް ޔާމީނުގެ މައްޗަށް މަނީލޯންޑަރިންގެ ކުށް ސާބިތުވެއްޖެކަމަށް ކަނޑައަޅައި ކުރިމިނަލް ކޯޓުން އިއްވި ހުކުމަކީ ސިޔާސީ ބޭނުމަށްޓަކައި، އިސްލާމީ ޝަރީޢަތާއި ޤާނޫނުތަކާ ޚިލާފަށް އިއްވި ހުކުމެއް ކަމަށާއި، އަދި އެ ހުކުމް ނަގަހައްޓަން ހައިކޯޓުގައި އެމަނިކުފާނުގެ އިސްތިއުނާފު މައްސަލަ ބެއްލެވި ފަނޑިޔާރުންގެ މަޖިލިހުގެ ދެ ފަނޑިޔާރުންގެ އަގުލަބިއްޔަތުން ނިންމި ނިންމުމަކީވެސް އެފަދައިން ސިޔާސީ ސަބަބުތަކަށްޓަކައި ނިންމާފައިވާ ޤާނޫނާއި ޝަރީޢަތާ ޚިލާފު ނިންމުމެއް ކަމަށެވެ.
މީގެއިތުރުން ހައިކޯޓުގައި މައްސަލަ ބެއްލެވި ފަނޑިޔާރުންގެ ތެރެއިން ފަނޑިޔާރު ޙުސައިން ޝަހީދުގެ ރައުޔަށް ބަލާއިރު، މި މައްސަލައަކީ ފެށުމުގައިވެސް ބާޠިލު ދައުވާއެއްގެ މައްޗަށް ބިނާކޮށް ކުރިއަށް ގެންގޮސްފައިވާ މައްސަލައެއް ކަމާއި، ރައީސް ޔާމީނުގެ މައްޗަށް މައްސަލަ ސާބިތުކުރި ހެއްކަކީ ވެސް ބާޠިލު ހެކިތަކެއްކަން އެނގޭ ކަމަށް ވެސް އެޤަރާރުގައި ބުނެފައިވެއެވެ.
އިދިކޮޅު ކޯލިޝަނުން ފާސްކުރި ޤަރާރުގައި ބުނެފައިވަނީ ކުރީގެ ނައިބުރައީސް އަޙްމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ ޢަބްދުﷲ ޒިޔަތުގެ ހެކި ބަހަކީ ފާސިޤުންގެ ހެކިބަސް ކަމަށާއި އެއީ ބަލައިނުގަނެވޭނެ ހެކިބަސްކަމަށް ދެ ފަނޑިޔާރަކު އިއްތިފާޤުވެފައިވާ ކަމަށާއި، އޭސީސީގެ ކުރީގެ ރައީސް މުޢައްވިޒް ރަޝީދުގެ ހެކިބަސް ބަލައިނުގަނެވެނީ އޭނާ ޝަރީޢަތުގެ މަޖިލިހުގައި ދޮގު ހެދުމުން ކަމަށް ފަނޑިޔާރު ޝަހީދުގެ ރައުޔުން އެނގޭ ކަމަށެވެ.
މިއަދު ފާސްކުރި މިޤަރާރު ނިންމާލާފައި ވަނީ ހައިކޯޓުގެ ނިންމުން ބަލައި ނުގަތުމަށެވެ. އެއީ ޤާނޫނާއި އިސްލާމީ ޝަރީޢަތާ ޚިލާފު ހުކުމެއް ކަމުގައި ދެކޭ ކަމަށާއި ރައީސް ޔާމީން މިނިވަންކުރުމަށް ސީދާ މަގުމަތީ ހަރަކާތް ހިންގުމަށް ނުކުންނަން ކަމުގައިވެސް އެ ޤަރާރުގައި ބުނެފައިވެއެވެ.
ހޭވައްލާ ތައްޔާރު..! މިތިބީ ތިކަމަށް ފެން ބޮވައިގެންފަ..!