ޓްރެވަލް އެޖެންސީތަކުގެ އަހަރީ ރިޕޯޓް ހުށަހަޅަން އަންގައިފި
ރާއްޖޭގައި ހިންގާ ޓްރެވަލް އެޖެންސީތަކުގެ އަހަރީ ރިޕޯޓް މި މަސް ނިމުމުގެ ކުރިން ހުށަހަޅަން ޓޫރިޒަމް މިނިސްޓްރީން އަންގައިފިއެވެ.
ޓޫރިޒަމް މިނިސްޓްރީން ބުނެފައި ވަނީ އަހަރީ ރިޕޯޓު ހުށަނާޅައިފިނަމަ ދޫކޮށްފައިވާ ހުއްދަ ބާތިލް ވާނެ ކަމަށާއި އެހެންކަމުން މި މަސް ނިމުމުގެ ކުރިން ޓްރެވަލް އެޖެންސީތަކުގެ އަހަރީ ރިޕޯޓް ޓޫރިޒަމް މިނިސްޓްރީއަށް ހުށަހެޅުމަށް އަންގާ ކަމަށެވެ.
ކޮންމެ އަހަރަކު ވެސް ޓްރެވަލް އެޖެންސީތަކުގެ އަހަރީ ރިޕޯޓެއް އެ މިނިސްޓްރީއަށް ހުށަހަޅަން ޖެހޭނީ ރާއްޖޭގައި ދަތުރު ރާވާ ހިންގުމާ ބެހޭ ގަވާއިދު (ޓްރެވަލް އެޖެންސީ ހިންގުމާ ބެހޭ ގަވާއިދު) ގެ ދަށުންނެވެ. މި ގަވާއިދުގައި ވާ ގޮތުން އަހަރީ ރިޕޯޓް މި މަހުގެ 31 ގެ ކުރިން އެ މިނިސްޓްރީ އަށް ހުށަހަޅަން ޖެހެއެވެ.
މިއަހަރުގެ ފުރަތަމަ 17 ދުވަހުގެތެރޭގައި ބައިލައްކަ އަށްވުރެ ގިނަ ފަތުރުވެރިން ރާއްޖެއަށް ވަނީ ޒިޔާރަތް ކޮށްފައެވެ. ވަކިވަކި ޤައުމުތަކުން ރާއްޖެއަށް އަންނަ ފަތުރުވެރިންގެ ޢަދަދުތަކަށް ބަލާލާއިރު، މިމުއްދަތުގައި ރާއްޖެއަށް އެންމެ ގިނަ ފަތުރުވެރިން އައިސްފައި ވަނީ ރަޝިޔާއިންނެވެ.
މިހާތަނަށް ފަތުރުވެރިކަން ކުރިއެރުވުމަށް ކުރެވުނު މަސައްކަތްތަކުގެ ސަބަބުން ރާއްޖެއަށް ގިނަ އެވޯޑުތަކެއް ވަނީ ލިބިފައެވެ. ވޯލްޑް ޓްރެވަލް އެވޯޑްސްއިން ދޭ އެންމެ ޝަރަފުވެރި އެވޯޑުކަމުގައިވާ "ވޯލްޑްސް ލީޑިން ޑެސްޓިނޭޝަން" އެވޯޑް ފުރަތަމަ ފަހަރަށް ރާއްޖެއަށް މިދިޔަ އަހަރު ވަނީ ލިބިފައެވެ. އަދި ފަތުރުވެރިންގެ އެންމެ މަގުބޫލުކަން ހޯދާފައިވާ 22 މަންޒިލަކާ ރާއްޖެ ވަނީ ވާދަކޮށްފައެވެ. އެހެން ގައުމުތަކުގެ ތެރޭގައި ދުބާއީ، މެލޭޝިޔާ، ސްޕެއިން، މޮރިޝިއަސް އަދި ސްރީލަންކާ ހިމެނެއެވެ.
