ރަށަށް ބަދަލުވާން ބޭނުންވާ 500 އާއިލާއަކަށް 26.7 މިލިޔަން ރުފިޔާ ޚަރަދުވާނެ: ޖެންޑަރ މިނިސްޓްރީ
މާލޭގައި ދިރިއުޅޭ އަތޮޅުތަކުގެ ރައްޔިތުންގެ ތެރެއިން އަމިއްލައަށް ރަށަށް ބަދަލުވާން ބޭނުންވާ މީހުންނަށް ފުރުޞަތު ފަހި ކޮށްދިނުމަށް ކުރިއަށް ގެންދާ ޕްރޮގްރާމުގެ ދަށުން 500 އާއިލާއަކަށް އަހަރެއްގެ މައްޗަށް 26.7 މިލިޔަން ރުފިޔާ ޚަރަދުވާނެކަމަށް ޖެންޑަރ މިނިސްޓްރީން ވިދާޅުވެއްޖެއެވެ.
ކޮވިޑް-19 ގެ މިހާރުގެ ހާލަތާ ގުޅިގެން މާލޭގައި އުޅެން ދަތިވާ ފަރާތްތަކުގެ ތެރެއިން އާއިލާއާއެކު ރަށަށް ބަދަލުވާން ބޭނުންވާ ފަރާތްތަކަށް ސަރުކާރުން އެހީތެރިކަން ފޯރު ކޮށްދެއްވާނެ ކަމަށް ޖެންޑާ މިނިސްޓަރު ޑރ. އައިޝަތު މުހައްމަދު ދީދީ މިއަދު ވަނީ ވިދާޅުވެފައެވެ.
ޖެންޑަރ މިނިސްޓްރީން މިހާރު އަންނަނީ ސަރުކާރުގެ އެކި އިދާރާތަކާ ގުޅިގެން "އަމިއްލަ ރަށަށް ބަދަލުވާން ބޭނުންވާ ފަރާތްތަކަށް ފުރުޞަތު ދިނުން" މިނަމުގައި އުސޫލެއް އެކުލަވާލައި އަންނަ މަހުގެ ތެރޭގައި ގެޒެޓް ކުރުމަށް މަސައްކަތް ކުރަމުންނެވެ.
ކޮވިޑާ ގުޅިގެން ޖެންޑާ މިނިސްޓްރީން ދަނީ މާލޭގައި މަގުމަތިވެފައި ތިބި މީހުންނަށް ބޯހިޔާވަހިކަން ފޯރު ކޮށްދިނުމަށާއި މަސްތުވާތަކެތި ބޭނުންކުރާ ފަރާތްތަކަށް ބޭނުންވާ ފަރުވާ ހޯދައިދިނުމުގެ މަސައްކަތް ކުރަމުންނެވެ. އަދި ރައްޔިތުންނަށް ދިމާވެފައިވާ ދަތިތަކަށް އެކި ގޮތްގޮތުން އެހީތެރިކަން ފޯރު ކޮށްދެމުން ދާކަމަށް ވެސް އެ މިނިސްޓްރީން ބުނެއެވެ.
