ކޮވިޑް-19: ތޮއްޑޫގައި ހޯމް ކަރަންޓީނުގައި ހުރި މީހަކު ފައްސިވެއްޖެ
އއ. ތޮއްޑޫގައި ހޯމް ކަރަންޓީނުގައި ތިބި ދެ މީހެއްގެ ތެރެއިން އެކަކު ކޮވިޑް-19 އަށް ފައްސިވެއްޖެއެވެ.
އޮންލައިން ނޫސް "ސީއެންއެމް" އަށް މައުލޫމާތު ދެމުން ތޮއްޑޫ ސިއްހީ މަރުކަޒުން ބުނީ، ތޮއްޑޫގައި ހޯމް ކަރަންޓީނުގައި ތިބީ ދެމަފިރިއެއް ކަމަށެވެ.
އެގޮތުން ކަރަންޓީންގެ މުއްދަތު ހަމަވެ ނެގި ރިލީޒް ސާމްޕަލްތަކުން ފައްސިވެފައި ވަނީ އެދެމަފިރިންގެ ތެރެއިން ފިރިމީހާ ކަމަށް ވެސް މައުލޫމާތު ލިބެއެވެ. އަންހެން މީހާގެ ޓެސްޓު ނަތީޖާ އަދި ލިބިފައެއް ނުވެއެވެ.
އެދެމަފިރިން މާލެއިން ތޮއްޑޫއަށް ދިޔައިރު ހެދި ޓެސްޓުތަކުން ދައްކަނީ ކޮވިޑަށް ނައްސި ކަމަށާއި އެ ކޭސްއާ ގުޅިގެން އިތުރު އެހެން މީހަކު ފައްސިވެ ނުވަތަ ބަލީގެ އަލާމާތް ވެސް ފެނިފައި ނުވާ ކަމަށް ތޮއްޑޫ ސިއްޙީ މަރުކަޒުން މައުލޫމާތު ދެއެވެ.
އެ ކޭސްއާ ގުޅިގެން މިހާރު ދަނީ ބަަލަންޖެހޭ ކަންކަން ބަލަމުންނެވެ. އަދި ކޮންޓެކްޓް ޓްރޭސިންގެ ދަށުން ސާމްޕަލްތައް ނަގަމުންދާކަމަށް ވެސް އެ ހޮސްޕިޓަލުން މައުލޫމާތު ދެއެވެ.
