އއ. މަތިވެރިއަށް އަރާ ފޭބުން މަނާ ކޮށްފި
އއ. މަތިވެރިއަށް އަރާ ފޭބުން މަނާ ކޮށްފިއެވެ.
އެރަށަށް އަރާ ފޭބުން މަނާ ކުރިކަން އެޗްޕީއޭއިން ވަނީ މަތިވެރީ ކައުންސިލަށް އަންގާފައެވެ.
އެޗްޕީއޭއިން އެކައުންސިލަށް ފޮނުވި ލިޔުމުގައި ބުނެފައި ވަނީ، ކޮވިޑް-19 އާ ގުޅިގެން އިތުރަށް ބަލަން ޖެހޭ ކަންތައްތައް ބެލުމަށް އެރަށް މޮނިޓަރިންގ ހާލަތަށް ލާފައިވާ ކަމަށާއި އަދި މިހާލަތުގައި އެރަށުން އިތުރު ރަށަކަށް ދަތުރު ކުރުން މަނާ ކުރާ ކަމަށެވެ.
މަތިވެރި އަށް އަރާ ފޭބުން މިއަދު މަނާ ކޮށްފައިވާ އިރު، އެރަށުން ދެ ކުއްޖަކު މިއަދު ވަނީ ކޮވިޑް-19 އަށް ފައްސިވެފައެވެ. މަޢުލުމާތު ލިބިފައިވާ ގޮތުގައި އެރަށުން ފައްސިވެފައި ވަނީ މިމަހު 21 ވަނަ ދުވަހު ހޯމް ކަރަންޓީން ނިންމާ ނެގި ރިލީޒް ސާންޕަލްއިން ފައްސިވި ދެމަފިރިންގެ ކާފަ ދަރިންނެވެ.
މަތިވެރި ކައުންސިލު ރައީސް އިސްމާއިލް އާތިފު "ދެން" އަށް މައުލޫމާތު ދެއްވަމުން ވިދާޅުވީ އެރަށުން ފައްސި ވެފައިވަނީ އުމުރުން ދެ އަހަރުގެ ކުޑަ ކުއްޖަކާއި 12 އަހަރުގެ ކުއްޖެއް ކަމަށެވެ. އަދި އެރަށް މޮނީޓަރިންގަށް ލާފައި ވަނީ މިރޭ 8:30 ހާއިރު ކަމަށް ވެސް ކައުންސިލު ރައީސް މައުލޫމާތު ދެއްވާފައިވެއެވެ.
"ފައްސިވީ ދެކުދިންގެ ކާފަޔާ މާމަޔާ މީގެ ހަފްތާއެއް ކުރިން ފައްސިވީ، ހޯމް ކަރަންޓީނުގައި ތިއްބާ. ކައުންސިލުގެ ބެލުމުގެ ދަށުގައި ހުރި އިމާރާތަކަށް އެދެމަފިރިންލާފަ، އެ ގެ ކަރަންޓީނު ކުރީ. ކަރަންޓީނު ކޮށްގެން އިއްޔެ ދެ ކުދިންގެ ގައިން އަލާމާތްތައް ފެނިގެން ސާމްޕަލް ނެގީ. މިއަދު ނަތީޖާ ލިބުނީ ދެ ކުދިން ފައްސި ކަމަށް." އާތިފު ވިދާޅުވިއެވެ.
ކޮވިޑަށް އެދެކުދިން ފައްސިވީއިރު، ދެ ކުދިންވެސް ތިބީ ކަރަންޓީނުގައި ކަމަށާއި ކަރަންޓީނަށް ލީ އެކުދިންގެ މާމައާއި ކާފަ ފައްސިވީ ފަހުން ކަމަށް ވެސް އާތިފު ވިދާޅުވިއެވެ.
"ނަމަވެސް ކަރަންޓީނު ކުރުމުގެ ކުރިން އެކުދިން ވަނީ ސްކޫލަަށް ވެސް ގޮސްފަ، ގިނަ ކުދިންނާ ޑައިރެކްޓް ކޮންޓެކްޓުވެސް ވެފައިވަނީ. އެހެންވެ ރަށް މޮނީޓަރިންގަށްލީ" ކައުންސިލު ރައީސް ވިދާޅުވިއެވެ.
