ކޮވިޑް-19: ކަރަންޓީނުގައި ހުރި އިތުރު މީހަކު މަތިވެރިން ފައްސި ވެއްޖެ
އއ، މަތިވެރީގައި ކަރަންޓީނުގައި ހުރި އިތުރު މީހަކު ކޮވިޑް-19 އަށް ފައްސި ވެއްޖެއެވެ.
މަތިވެރި ކައުންސިލު ރައީސް އިސްމާއިލް އާތިފު "ދެން" އަށް މައުލޫމާތު ދެއްވަމުން ވިދާޅުވީ، މިއަދު ފައްސި ވެފައި ވަނީ މީގެ ކުރިން އެރަށުން ފައްސިވީ ކުޑަ ދެކުދިންނާ އެއް ގެއެއްގައި ދިރިއުޅޭ އަންހެނެއް ކަމަށެވެ.
އެއީ ކަރަންޓީނު ކޮށްފައިވާ ގެއަކަށް ވީ ނަމަވެސް، އޭގެ ކުރިން އެއަންހެން މީހާ ކޮންޓެކްޓު ވެފައި ތިބި މީހުން ވެސް މިހާރު ހޯދުމުގެ މަސައްކަތް ވެސް ކުރަމުންދާ ކަމަށް އާތިފު ވިދާޅުވިއެވެ.
"ފައްސިވެފައި ވަނީ ކުރީ ދުވަހު ފައްސިވީ ދެ ކުދިންގެ އާއިލާ މީހެއް، އެއީ ހަތަރު ކުދިންގެ މަންމައެއް. އޭނަގެ ކޮންޓެކްޓުތައް ކުރިންވެސް ބަލާފަ ހުރީ، މިހާރު ނެގި 48 ސާމްޕަލްގައި އެބަ ހިމެނޭ އޭނައާ ވާހަކަ ދެއްކި މީހުން ވެސް. އެމީހުންގެ ސާމްޕަލްގެ ނަތީޖާ ވެސް ނައްސި" އާތިފު ވިދާޅުވިއެވެ.
މަތިވެރިން މިހާތަނަށް ކޮވިޑަށް ޓެސްޓު ކުރަން 48 ސާމްޕަލެއް ނަގާފައިވާއިރު، އެހުރިހާ ސާމްޕަލެއް ވެސް ވަނީ ނައްސި ވެފައެވެ.
