ޓިޗަރުންނާއި ފްރަންޓްލައިންގައި މަސައްކަތް ކުރާ އެހެން ފަރާތްތަކަށް ވެކްސިން ދޭން ފަށައިފި
ރާއްޖޭގައި ވެސް ފެތުރިފައިވާ ކޮވިޑް-19 އިން ރައްކާތެރިވުމަށް، މާލެ ސަރަޙައްދުގެ ސްކޫލްތަކުގައި މަސައްކަތްކުރާ ޓީޗަރުންނަށާއި އެނޫން ވެސް ފްރަންޓްލައިނުގައި މަސައްކަތް ކުރާ ބައެއް ފަރާތްތަކަށް ވެކްސިން ދޭން މިއަދު ފަށައިފިއެވެ.
"ދެން" އަށް މައުލޫމާތު ދެއްވަމުން ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) ގެ އޮފިޝަލަކު ވިދާޅުވީ ފްރަންޓްލައިންގައި މަސައްކަތް ކުރައްވާ، ނުވަތަ ޚިދުމަތް ދެއްވާ ބައެއް ފަރާތްތަކަށް މިއަދު ކޮވިޑް-19 އިން ރައްކާތެރިކޮށްދޭ ވެކްސިން ޖަހަން ފަށާފައިވާ ކަމަށެވެ.
"އަޅުގަނޑުމެން މިބަލަނީ ފްރަންޓްލައިން ކޮންމެވެސް ވަރަކަށް ކަވަރ ކުރެވޭތޯ މިހާރު ހުރި ވެކްސިނުން. ޓީޗަރުން ވެސް އަސްލު ވާނީ ފްރަންޓްލައިނަށް. އެއީ ފުދޭވަރެއްގެ ބޮޑު ކްރައުޑަކާ ބައްދަލުވެ ޚިދުމަތް ދޭތީ." އޮފިޝަލު ވިދާޅުވިއެވެ.
މީގެއިތުރުން އެއޮފިޝަލު ވިދާޅުވީ، އެގޮތަށް ބަލައިގެން އެއާޕޯޓުގައި ތިބޭ ފްރަންޓްލައިން ސްޓާފުންނަށް ވެސް މިއަދު ވެކްސިން ދެއްވަން ފަށާފައިވާ ކަމަށެވެ.
"އެމްއޭސީއެލް، އެމްޕީއެލް ތަންތަނުގައި އުޅޭ ސްޓާފުންނަށާ އެއްކޮށް ވެކްސިން ދޭގޮތަށް ހަދައިގެން ކުރިއަށް މިގެންދަނީ."އޮފިޝަލު ވިދާލުވިއެވެ.
މިރޭ އޮންނަ ނޫސްވެރިންގެ ބައްދަލުވުމުގައި މިކަމާ ގުޅޭގޮތުން އިތުރު މައުލޫމާތު ސާފު ކޮށްދެއްވާނެ ކަމަށް އެޗްއީއޯސީގެ އޮފިޝަލު ވިދާޅުވިއެވެ.
އިންސާނުން ނުރައްކަލުން ސަލާމަތްކޮށްދޭނެ ހަމައެކަނި ފަރާތަކީ ﷲ ސުބުހާނަހޫ ވަތައާލާ !