ކޮވިޑް-19: ފުވައްމުލަކުން ފައްސިވީ އެކަކުގެ ނަތީޖާ ނައްސި ވެއްޖެ
ފުވައްމުލަކު ސިޓީން ކޮވިޑް-19 އަށް ފައްސިވީ އެކަކުގެ ނަތީޖާ ނައްސި ވެއްޖެއެވެ.
"ދެން" އަށް މައުލޫމާތު ދެއްވަމުން ފުވައްމުލަކު ސިޓީގެ ޑެޕިއުޓީ މޭޔަރ މުޙައްމަދު ޝިރާރު ވިދާޅުވީ އެސިޓީން ނެގި ރޭންޑަމް ސާމްޕަލްގެ ތެރެއިން ފައްސިވީ ދެ މީހުންގެ ތެރެއިން އެކަކުގެ ނަތީޖާ މިހާރު ނައްސި ވެފައިވާ ކަމަށެވެ.
"ފުވައްމުލަކު ހޮސްޕިޓަލުން ބުނެފައިވަނީ 7 ފެބްރުއަރީ 2021 ގައި ނެގުނު 150 ސާމްޕަލްގެ ތެރެއިން ދެމީހަކު ފައްސި ވެފައިވާ ކަމަށާއި ނަމަވެސް އޭގެ ތެރެއިން އެކަކުގެ ސާމްޕަލްގައި މައްސަލައެއް އުޅޭކަން އެޗްޕީއޭއަށް ފާހަގަ ވެގެން އެފަރާތުގެ އެންގެވުމަކަށް އެމީހާގެ ދެވަނަ ސާމްޕަލެއް ނެގި ކަމަށާއި އެސާމްޕަލްގެ ނަތީޖާ ނައްސި ވެފައިވާ ކަމަށް" ޝިރާރު ވިދާޅުވިއެވެ.
ޝިރާރު ވިދާޅުވީ ނެގި ރޭންޑަމް ސާމްޕަލުން ފައްސިވެ، މިއަދު ކޮވިޑް-19 އަށް ނައްސިކަން އެނގިފައި ވަނީ އަންހެނެއްގެ ސާމްޕަލް ކަމަށެވެ. އަދި އެރަށް އަދިވެސް އޮތީ މޮނީޓަރިންގެ ހާލަތުގައި ކަމަށް ވެސް ޝިރާރު ވިދާޅުވިއެވެ.
ފުވައްމުލަކުގައި ކޮވިޑަށް ފައްސި ވެފައި ވަނީ އައްޑޫސިޓީ ހިތަދޫން ކަރަންޓީނުގައި ނެތް ދެމީހަކު ފައްސިވެ، އުފެދުނު ކްލަސްޓާއިންނެވެ.
