ހިޔާ ފްލެޓްތައް އެންމެ ގިނައިން ލިބުނީ އެމްޑީޕީ މީހުންނަށް ، މި ސަރުކާރުން އެންމެ ގިނައިން އުނިކުރީ ޕީޕީއެމް މީހުން: މުޢިއްޒު
މިހާތަނަށް ދިވެހިރާއްޖޭގައި ހިންގި އެންމެ ބޮޑު ހިޔާވަހި ކަމުގެ މަޝްރޫޢު ކަމަށްވާ ހިޔާ މަޝްރޫއުގެ ދަށުން ރައީސް ޔާމީންގެ ޒަޢާމަތުގައި އެންމެ ގިނަ ފްލެޓް ލިބުނީ އެމްޑީޕީގެ މީހުންނަށް ކަމަށާއި ، މި ވެރިކަމުގައި އެންމެ ގިނައިން އުނިކުރީ ޕީޕީއެމް މީހުން ކަމަށް ކުރީގެ ހައުސިން މިނިސްޓަރ ޑރ.މުޙައްމަދު މުޢިއްޒު ވިދާޅުވެއްޖެއެވެ.
މިހެން ވިދާޅުވެ މިއަދު އެމަނިކުފާނު ޓްވީޓް ކުރެއްވިއިރު ، ފްލެޓް ލިބޭ މީހުންގެ ފައިނަލް ލިސްޓް މި ސަރުކާރުން އިއުލާން ކުރެއްވުމުން މުއިއްޒު ވަނީ މިދިޔަ ބުދަ ދުވަހު ޕީޕީއެމްއިން ބޭއްވި ޕްރެސްއެއްގައި ވެސް ފްލެޓާ ގުޅޭ ގޮތުން ވާހަކަފުޅު ދައްކަވާފައެވެ.
އެގޮތުން ކުރީގެ ވެރިކަމުގައި ފްލެޓް ބަހާލާފައި ވަނީ ޕީޕީއެމްގެ މީހުންނަށް ކަމަށް ދެކެވޭ ވާހަކައާ ގުޅޭ ގޮތުން މުއިއްޒު ވިދާޅުވީ ރައީސް ޔާމީންގެ ސަރުކާރުން ފްލެޓު ދިނުމާ ގުޅޭގޮތުން އެންމެ ގިނަ ބަޔަކު ދެއްކި އެއް ވާހަކައަކީ، ރައީސް ޔާމީން ސަރުކާރުގައި ފްލެޓު ދީފައިވަނީ ޕާޓީއަށް ބަލައިގެން ކަމަށެވެ. އެފަދަ އިލްޒާމު އަޅުވާތީ، މިވެރިކަން އައުމުން ފްލެޓު ލިބުނު މީހުން ނިސްބަތް ވަނީ ކޮން ޕާޓީއަކަށްތޯ ވަރަށް މަސައްކަތުން ބެއްލެވި ކަމަށެވެ.
"7000 މީހުންގެ ތެރެއިން 3591 މީހުންނަކީ އެމްޑީޕީ މީހުން. 1959 މީހުންނަކީ ޕީޕީއެމް މީހުން. އެކިއެކި ޕާޓީއަށް ނިސްބަތްވާ 517 މީހުން. ބާކީތިބި 933 މީހުންނަކީ އެއްވެސް ޕާޓީއަކަށް ނިސްބަތް ނުވާ މީހުން. އެހެންވީމަ ކޮބައިތޯ އަޅުގަނޑުމެން ޕީޕީއެމް މީހުންނަށް އިސްކަން ދެވިފަ؟" ޑރ. މުޢިއްޒު ވިދާޅުވިއެވެ.
މުއިއްޒު މިފަދައިން ވިދާޅުވިއިރު ކުރީގެ އިދިކޮޅު ފަރާތްތަކުން ވަނީ ހިޔާ މަޝްރޫއަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވާފައެވެ. އެގޮތުން އެއީ އިންސާނުން ދިރިއުޅެން ކަމުދާ ތަނެއް ނޫން ކަމަށާއި އެތަންތަނަކީ ކޮތަރުކޮށިތަކެއްގެ ގޮތުގައި އެބޭފުޅުން ވަނީ ސިފަ ކުރައްވާފައެވެ. ނަމަވެސް ކުރީގެ ސަރުކާރުން ފްލެޓް ލިބޭނެ ކަމަށް ކަނޑައެޅި ލިސްޓަށް ، ބޮޑު ބަދަލެއް ގެނެސް ، މި ސަރުކާރުން އިއުލާން ކުރެއްވިއިރު މި ސަރުކާރުގެ އަދި މި ސަރުކާރަށް ތާއީދު ކުރައްވާ ގިނަ ބަޔަކަށް ފްލެޓް ދެއްވާފައި ވެއެވެ. އޭގެ ތެރޭގައި ރައީސް ސޯލިހްގެ ކޮއްކޯފުޅު އައިޝަތު މުޙައްމަދު ސޯލިހާއި ދީނީ ޢިލްމުވެރިޔާ ޝައިޚް ޒައިދާއި އެމަނިކުފާނުގެ އަނބިކަނބަލުންގެ އިތުރުން ރައީސް ޔާމީނަށް ހުކުމް ކުރެއްވި ގާޟީ އަލީ ރަޝީދާއި އެމަނިކުފާނުގެ އާއިލީ ބޭފުޅުން ވެސް ހިމެނެއެވެ.
