ހުކުރު ދުވަހު އިދިކޮޅުން އަނެއްކާ ވެސް ބޮޑު މުޒާހަރާއެއް
ޕްރޮގްރެސިވް ޕާޓީ އޮފް މޯލްޑިވްސް ، ޕީޕީއެމްއާއި ޕީޕަލްސް ނެޝަނަލް ކޮންގްރެސް ، ޕީއެންސީ ހިމެނޭ ޕްރޮގްރެސިވް ކޯލިޝަނުން ، ކުރިއަށް އޮތް ހުކުރު ދުވަހު އަނެއްކާ ވެސް ބޮޑު މުޒާހަރާއެއް ބާއްވަން ނިންމައިފިއެވެ.
އިދިކޮޅުން މިއަދު ބޭއްވި ނޫސްވެރިންގެ ބައްދަލުވުމެއްގައި ހާމަ ކުރެއްވީ މި މުޒާހަރާއަކީ އިދިކޮޅު ލީޑަރު އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ހައްޔަރުގައި ހުންނެވުމާއި ، ރައްޔިތުންގެ އެތައް ޙައްޤުތަކެއް ސަރުކާރުން ނިގުޅައިގެންފައި ވާތީ އެ ކޯލިޝަނުން ބާއްވަމުން ގެންދާ "އިންސާފު ކޮބާ؟"އަދި "ކޮބާ މަގޭ ފްލެޓް ؟" ގެ ސިލްސިލާގެ ދަށުން ބޭއްވުމަށް ހަމަޖެހިފައިވާ މުޒާހަރާއެކެވެ.
ހުކުރު ދުވަހު އިދިކޮޅުގެ ފަރާތުން ބޮޑު މުޒާހަރާއެއް އޮންނާނެކަން އިއުލާނު ކުރައްވާ ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވީ، ބިރު ދެއްކިއަސް އަދި އިންޒާރު ދިނަސް ރައީސް ޔާމީނާއި ރައްޔިތުންގެ ހައްގުގައި ކުރަމުން ގެންދާ އެ މަސައްކަތަށް އެއްވެސް މަޑު ޖެހުމެއް ނާންނާނެ ކަމަށެވެ.
މިމުޒާހަރާ ފެށުމަށް ހަމަޖެހިފައިވަނީ ޕީޕީއެމް އޮފީސް ދޮރުމަތިން، ހުކުރު ދުވަހުގެ ހަވީރު 4:00 ގައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ނައިބް ރައީސް މުހައްމަދު ނިމާލް ވިދާޅުވީ އެމުޒާހަރާ ގައި ބައިވެރިވުމަށްޓަކައި ރަށްތަކުގައި ތިބި މީހުން ވެސް އެދެމުންދާ ކަމަށާއި އެގޮތުން މުޒާހަރާގައި ބައިވެރިވުމަށްފަހު ރަށަށް އަނބުރާ ގޮސް ކަރަންޓީންގެ މުއްދަތު ފުރިހަމަ ކުރަން ވެސް އެމީހުން ތައްޔާރަށް ތިބި ކަމަށެވެ.
ނަމަވެސް އެއީ އިދިކޮޅުގެ ލީޑަޝިޕުން ވެސް އެހާ ހިތްވަރުދޭ ކަމަކަށް ނުވާތީ އެމީހުން ނުގެންނަން ނިންމާފައިވާ ކަމަށް ވެސް ނިމާލް ވިދާޅުވިއެވެ.
