"އަހަރުމެން އަތުގައި މިހާރު ދަތް އުނގުޅާނެ ބޭހެއް ނެތް، ގައިގަ ލާނެ ސައިބޯންޏެއް ނެތް، އެއްވެސް އެއްޗެއް ނެތް!"
ރާއްޖޭގައި މަސައްކަތް ކުރާ ބިދޭސީންލައްވާ މަސައްކަތް ކުރުވާފައި، އެމީހުންނަށް އެމަސައްކަތުގެ އުޖޫރަ ނުދޭ މައްސަލަ މިދުވަސްކޮޅު ވަރަށް ގިނައިން ފެންމަތިވެއެވެ.
މިގޮތުން މިމަހުގެ 2 ވަނަ ދުވަހު ބ. ބޮޑު ފިނޮޅުގައި ވެސް މިފަދަ މައްސަލައެއްގައި ބިދޭސީންތަކެއް އެތަނުގައި މުޒާހަރާކޮށް ދިވެހިންތަކެއް ރަހީނު ވެސް ކުރިއެވެ.
ދިވެހިންތައް ސަލާމަތްކޮށް އެދުވަހުގެ ބިރުވެރިކަމަށް ނިމުމެއް އައީ ކަމަށް ހީކޮށްގެން ހުއްޓާ މިއަދު މިވަނީ އަނެއްކާވެސް އެފަދަ މައްސަލައެއް ފެންމަތިވެފައެވެ.
ހުޅުމާލޭގައި ފުލުހުންނާއި ސިފައިންގެ ފްލެޓުތައް ހަދަމުންދާ އައިލެންޑް އެކްސްޕާޓް ކުންފުނީގެ ބިދޭސީ މުވައްޒަފުންނަށް މުސާރަ ނުދޭތާ ހަތް މަސް ދުވަސް ވެފައިވާ ކަމަށެވެ.
މުސާރަ ނުދީ އެމީހުންލައްވާ މަސައްކަތް ކުރުވަމުން ގެންދާތީ އެކަމާއި މިއަދު 100 އެއްހާ ބިދޭސީން އެތަނުގައި މުޒާހަރާ ކޮށްފައިވާއިރު، އޭގެ ތެރެއިން އެއްބަޔަކު ބުނެފައިވަނީ މިހާރު އެމީހުންގެ އަތުގައި ދަތް އުނގުޅާ ބޭހާއި، ސައިބޯންޏާއި އެއްވެސް އެއްޗެއް ގަންނާނެ ފައިސާ ވެސް ނެތް ކަމަށެވެ.
އެކުންފުނީގައި މަސައްކަތް ކުރާ 600 އެއްހާ ބިދޭސީން އުޅެއެވެ. އެމީހުންނަށް އެއްވެސް ވަރަކަށް މުސާރަ ނުދީ މަސައްކަތް ކުރުވާތާ މިހާރު ހަތް މަސް ދުވަސް ވެއްޖެއެވެ.
މިއީ ހަގީގަތުގައި ވަރަށް ހިތާމަހުރި ކަމެކެވެ. އަދި ދިވެހިން ލަދުވެސް ގަންނަންޖެހޭ ކަމެކެވެ.
ބިދޭސީން ގިނަ ފަހަރަށް ރާއްޖެ އަންނަނީ އެމީހުންނަށް އަމިއްލަ ޤައުމުގައި އާމްދަނީއެއް ހޯދަން އަދާ ކުރެވޭނެ ވަޒީފާއެއް ނެތިގެންނެވެ. މައިންބަފައިންނާއި އަނބިދަރިން ދޫކޮށްފައި އަންނަނީ އާއިލާ އަށް ޚަރަދު ކުރުމަށް އަތްފައި ކޮށައިގެން މަސައްކަތް ކުރުމަށެވެ. ގިނަ ފަހަރަށް އެމީހުންނަށް ވާންޖެހެނީ ދިވެހީންގެ ދަށުވެފައި ތިބެންޖެހޭ ނޯކަރުންތަކެއް ފަދައިންނެވެ.
އެފަދަ އިހާނެތި ގޮތްގޮތަށް ބިދޭސީންނާއިމެދު ކަންތައް ކުރުމަށްފަހު، އަދި އެމީހުން އެކުރި މަސައްކަތަށް އުޖޫރަވެސް ނުދެނީ ހެއްޔެވެ؟ އިންސަަނިއްޔަތު ކަމަށްޓަކައި ވެސް އެފަދައިން ކަންތައް ނުކުރާށެވެ.
މަޖޫރީން ނުވަތަ މަސައްކަތު މީހުންލައްވާ މަސައްކަތެއް ކުރުވުމަށްފަހު، ލަސްނުކޮށް އެމީހަކަށް އުޖޫރަ ދިނުމަށް އަހަރެމެންގެ ލޮބުވެތި އިސްލާމްދީން ވެސް ބާރު އަޅައެވެ.
