ރޭޕް ކުރުން ގޯސް! ހަމަ އެހެންމެ އައުރަ ނިވާ ނުކުރުން ވެސް ގޯސް!
މިރިޕޯޓު ލިޔަން ފެށުމުގެ ކުރިން، އެންމެ ފުރަތަމަ ވެސް ސާފު ކޮށްދޭން ބޭނުންވާ އެއް ކަމަކީ، މިރިޕޯޓުގައި ބުނަން މިއުޅެނީ ރޭޕް ކުރުމަކީ ރަނގަޅު ކަމަކޭ ނޫނީ ރޭޕް ކުރުމާއި އެއްކޮޅެކޭ ނޫނެވެ. ހަގީގަތުގައި މިއުޅެނީ މި ދެ ކަންތަށް އެއްކުރާކަށް ވެސް ނޫނެވެ. ރޭޕް ކުރުން ގޯހެވެ. ވަރަށް ބޮޑަށް ވެސް ގޯހެވެ. އެއްވެސް ގޮތަކަށް އެކަން ކޮށްގެން ނުވާނެއެވެ.
މީސްމީޑިއާގައި މިފަހަކަސް އައިސް ދައުރުވަމުން އަންނަ ފޮޓޯއެކެވެ. ރޭޕް އާއި ދެކޮޅަށް އަޑުއުފުލި މުޒާހަރާއެއްގައި ހުރި އަންހެން ކުއްޖެއްގެ ފޮޓޯ އެކެވެ. އެފޮޓޯގައި އެއަންހެން ކުއްޖާ ލައިގެން ހުރި ހެދުމުގެ ނިވާކަން ކުޑަކަމުން (ދެކޮނޑާއި ކަރު އެއްކޮށް ހާމައަށް އޮތުމުން) އެކިކަހަލަ ބަސްތައް އެކުއްޖާއަށް ވަނީ އަމާޒުވެފައެވެ.
އެގޮތުން އެއްބަޔަކު ބުނެފައިވަނީ ރޭޕް އާއި ދެކޮޅަށް އަޑު އުފުލަން އެއަންހެން ކުއްޖާ ނިކުމެ ހުރީ ރޭޕް ވާނެ ގޮތަށް ހެދުން އަޅައިގެން ކަމަށާއި، ރޭޕް ވަނީ އެފަދަ ގޮތްގޮތަށް ހެދުން އެޅުމުން ކަމަށެވެ.
އެގޮތަށް ވާހަކަ ދައްކާ މީހުންގާތު އަހާލާ ހިތްވާ ސުވާލެއް އެބައޮތެވެ. ކުޑަކުދިންނާއި، ބުރުގާ އަޅައިގެން ތިބޭ މީހުންނާއި، އުމުރުން ދުވަސްވީ މީހުން ރޭޕް ވަނީ ނުވަތަ ޖިންސީ ގޯނާއާއި ފުރައްސާރައާއި ކުރިމަތިލާން ޖެހެނީ އެމީހުން ކޮން ގޮތަކަށް ހެދުން އަޅާތީ ހެއްޔެވެ؟ ދީނުގައި ނަޒަރު ތިރިކުރަން އަންގަވާފައި ނުވޭ ހެއްޔެވެ؟ މީހަކު ހެދުން އަޅާފައި ހުންނަ ގޮތެއްގެ ސަބަބުން، ޝަޚުވާނީ އެދުންތައް ބޮލަށް ވަތް ނަމަވެސް، އެއީ އިބިލީހުގެ ވަސްވާހަށް ހެއްލިގެން ގޮސް ރޭޕް ކުރަންވީ ސަބަބެއް ނޫނެވެ. ތިމާމީހާގެ ވިސްނުމާއި އިހުސާސްތައް އަމިއްލައަށް ކޮންޓްރޯލް ނުކުރެވޭފަދަ ނުކުޅެދޭ މީހަކަށް ނުވާށެވެ.
އެއްވެސް ހާލެއްގައި އަޅުގަނޑު މިބުނަނީ މިފަދައިން ނިވާކަން ކުޑަ ގޮތަށް ހެދުން އެޅުން ރަނގަޅެކޭ ނޫނެވެ. އަންހެންނާއި ފިރިހެނުން ވެސް އަޢުރަ ނިވާ ކުރަން ޖެހެއެވެ. އެއީ ދީނުގައި ވެސް އަންގަވާފައިވާ ގޮތެވެ. ތިމާ މީހާގެ ހަށިގަނޑުގެ ވަނާތައް ފޮރުވާ، އެހެންމީހުންގެ ލޯތަކަށް ވެސް ބަލާލަން ފަސޭހަ ގޮތަކަށް ހެދުން އެޅުމަކީ ތިމާމީހާގެ އަމިއްލަ މިނިވަން ކަމެއް ނެތުމެއް ނޫނެވެ.
ތިމާމީހާއަކީ ބުރުގާ އަޅާ މީހަކަށް ނުވި ކަމުގައި ވިޔަސް، އެވަރަށް ހާމަކަން ބޮޑު ހެދުން ލުމަކީ ހަމަ ގިނަ މީހުންގެ ފުރައްސާރައާއި ކުރިމަތިލާން ޖެހޭނެ ކަމެކެވެ. އަދި އެގޮތަށް ހެދުން އެޅުމަކީ ރީތިވެސް ކަމެއް ނޫނެވެ. އެއީ ތިމާއާއި ދޭތެރޭ މީހުންނަށް ވަރަށް ނުބައިކޮށް ވެސް ދެކެން މެދުވެރިވާ ކަމެކެވެ.
އެހެންކަމުން މިކަންކަމަށް ސަމާލުވެ، އެމީހަކަށް ކުރެވޭ ނުރަނގަޅު ކަންކަން އެހެން މީހުން ބުނެދިނީމަ ޤަބޫލު ކުރުމަކީ ރަނގަޅު ސިފައެކެވެ. ހަމަ އެހެންމެ، އެފަދަ ސިފަތައް ބުނެދޭ މީހުންވެސް، އެހެން މީހުންނަށް ކަމެއް އުފަލާއެކީ ޤަބޫލު ކުރެވޭނެ ފަދައިން ބުނުން ރަނގަޅެވެ. ވިސްނާލާށެވެ.
