ކޮވިޑް-19: ތުޅާދޫން ދެ މީހަކު ފައްސިވެއްޖެ
ބ. ތުޅާދޫގައި ހޯމް ކަރަންޓީނުގައި ތިބި ދެމީހަކު ކޮވިޑް-19 އަށް ފައްސިވެއްޖެއެވެ.
ތުޅާދޫ ސިއްހީ މަރުކަޒުން ބުނީ ފައްސިވެފައި ވަނީ މި މަހުގެ 18 ވަނަ ދުވަހު އެރަށަށް ގޮސް ކަރަންޓީނު ވެފައިވާ ދެމީހުން ކަމަށާއި މި ދެމީހުން ފައްސިވެފައިވާ ކަން އެނގިފައިވަނީ މިއަދު ކަރަންޓީނު ނިންމުމަށް ފަހު ނެގި ސާމްޕަލްއިން ކަމަށެވެ.
ހެލްތް ސެންޓަރުން އިތުރަށް ބުނީ މި މީހުންގެ ކޮންޓެކްޓް ޓްރޭސިންގެ މަސައްކަތް މިހާރު ނިމިފައިވާއިރު، އިތުރު މީހަކާ ބައްދަލުވެފައި ނުވާ ކަން ފާހަގަވެފައިވާ ކަމަށެވެ.
ރާއްޖެއިން ކޮވިޑް-19 އަށް ފައްސިވަމުން އަންނަ މީހުންގެ އަދަދު އިތުރުވަމުން އަންނައިރު، މާލޭގެ އިތުރުން އަތޮޅު ތެރެއިންނާއި ރިސޯޓުތަކުން ފައްސިވާ މީހުންގެ އަދަދު ވެސް އަންނަނީ އިތުރުވަމުންނެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ވެސް މާލެއިން 117 މީހުންނާއި، އަތޮޅުތެރެއިން 4 މީހަކާއި ހިންގަމުން އަންނަ ރިސޯޓުތަކުން 12 މީހެކެވެ.
