އަދީބުގެ ދައުވާތަށް ބާތިލުކުރި ކުރުމާމެދު ހިތްހަމައެއް ނުޖެހޭ، އިސްތިއުނާފު ކުރާނަން: ޕީޖީ
ކުރީގެ ނައިބު ރައީސް އަހުމަދު އަދީބުގެ މައްޗަށް އުފުލާފައިވާ ހަތް ދައުވާއެއް އުފުލާފައިވަނީ ޤާނޫނާއި ޚިލާފަށް ކަމަށް ބުނެ، މިއަދު އެދައުވާތައް ބާތިލުކުރި ކުރުމާމެދު ހިތްހަމަޖެހި ވަޑައި ނުގަންނަވާ ކަމަށާއި ކްރިމިނަލް ކޯޓުގެ އެހުކުމް ހައިކޯޓުގައި އިދްތިއުނާފު ކުރައްވާނެ ކަމަށް ޕްރޮސެކިއުޓާ ޖެނެރަލް ޙުސެއިން ޝަމީމް ވިދާޅުވެއްޖެއެވެ.
ޕީޖީ އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ޕީޖީ ޝަމީމް ވިދާޅުވީ މާދަމާ ނުވަތަ އަނެއް ދުވަހު އިސްތިއުނާފް މައްސަލައިގެ ލިޔުންތައް ހައިކޯޓަށް ހުށަހަޅުއްވާނެ ކަމަށެވެ.
އަދީބުގެ މައްޗަށް އުފުލީ ހިޔާނާތްތެރިވުމުގައި ބައިވެރިވުމުގެ ދެ ދައުވާއަކާއި، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ދެ ދައުވާއަކާއި، މަނީ ލޯންޑަރިންގެ ދެ ދައުވާއަކާއި ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާއެކެވެ.
ދައުލަތާއެކު ހަދާފައިވާ އެއްބަސްވުމެއްގެ ދަށުން އެ ހަތް މައްސަލައިގައިވެސްް އަދީބު ދައުވާއަށް އިއުތިރާފުވާނެ ކަމަށް މީގެ ކުރިން ފުލުހުން ވެސް ވަނީ ވިދާޅުވެފައެވެ.
އަދީބުގެ މައްޗަށް އުފުލިފައިމިވާ ހުރިހާ މައްސަލައެއް ނިމެންދެން އޭނާ ބަންދު ކުރަން މީގެކުރިން ނިންމެވި ކަމުގައިވިޔަސް މިމައްސަލަތައް މިއަދު ވަނީ ބާތިލު ކޮށްފައެވެ. އެހެންކަމުން އަދީބު މިއަދު ވަނީ މިނިވަންވެފައެވެ.
ކްރިމިނަލް ކޯޓުގައި އަދީބުގެ މައްސަލަ މިއަދު ބެއްލެވި ގާޒީއަށް ފާޑު ވިދާޅުވަމުން ޕީޖީ ޝަމީމް ވިދާޅުވީ ހުކުމްގައި ހުރި ބައެއް ވާހަކަތައް ހަމަނުޖެހޭ ކަމަށެވެ.
އެގޮތުން އަދީބު އެންމެ ފުރަތަމަ ހައްޔަރު ކުރީ 6 އޮކްޓޯބަރ 2015 ގައި ކަމަށާއި އެއިރު ހައްޔަރު ކުރިއިރުގެ ލިޔެކިޔުންތައް ޝަރީއަތަށް ހުށަހަޅާފައި ނުވާނެ ކަމަށް ވެސް ޕީޖީ ވިދާޅުވިއެވެ.
"މީން އެއްވެސް ލިޔުމެއް، ހައްޔަރުކުރި ދުވަހުގެ މައުލޫމާތެއް ވެސް، ހައްޔަރުކުރި ކުށުގެ މައުލޫމާތެއް ވެސް، ތުހުމަތު ކުރެވުނު ސަބަބެއް ވެސް، މި މައުލޫމާތު ތަކަކީ އަޅުގަނޑުމެން މި މައްސަލައިގައި ކްރިމިނަލް ކޯޓާ ހިއްސާކުރި މައުލޫމާތެއް ނޫން. ކްރިމިނަލް ކޯޓަށް ހުށަހަޅާފައި ހުރި މައުލޫމާތެއް ނޫން. އެހެން ނަމަވެސް މި ހުކުމްގައި ވަރަށް ތަފްސީލްކުރި ހައްޔަރުުކުރި ދުވަހާ ހައްޔަރުކުރި ސަބަބާ ތުހުމަތު ކުރެވުނު ކަންތަކާ ހުރި. އަޅުގަނޑަކަށް ނޭނގޭ ފަނޑިޔާރު އެ އެއްޗެހި ހޯއްދެވީ ކޮންތާކުން ކަމެއް ވެސް،" ޕީޖީ ޝަމީމް ވިދާޅުވިއެވެ.
