ރާއްޖޭގެ ބޯޑަރުތައް ހުޅުވާލުމަށް ވަމުންދާ ފަހުގެ ތައްޔާރީތައް ރައީސް ބައްލަވާލައްވައިފި
ރާއްޖޭގެ ބޯޑަރުތައް ހުޅުވާލުމަށްވަމުންދާ އެންމެފަހުގެ ތައްޔާރީތައް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައްލަވާލައްވައިފިއެވެ.
ވެލާނާ އިންޓަނޭޝަނަލް އެއާޕޯޓަށް ކުރެއްވި ޙާއްސަ ޒިޔާރަތެއްގައި ރައީސް ސޯލިހު ވަނީ ރާއްޖޭގެ ބައިނަލްއަގްވާމީ ބޯޑަރުތައް އަލުން ހުޅުވާލުމަށްވަމުންދާ އެންމެފަހުގެ ތައްޔާރީތައް ބައްލަވާލައްވާފައެވެ. ރައީސްގެ އަރިހުގައި ފޮރިން މިނިސްޓަރު އަބްދުﷲ ޝާހިދު އާއި ސަރުކާރުގެ އިސް ބޭފުޅުން ވަޑައިގެންނެވިއެވެ.
ރާއްޖޭގެ ބޯޑަރު ފަތުރުވެރިންނަށް މާދަމާ އަނެއްކާވެސް ހުޅުވާލާއިރު، މައުލޫމާތު ލިބޭ ގޮތުގައި ރާއްޖެ އަށް މާދަމާ ތިން ފްލައިޓެއް އައުމަށް ވަނީ ހަމަޖެހިފައެވެ. އޭގެތެރެއިން އެއް ފްލައިޓަކީ ގަތަރު އެއާވޭސްގެ ފްލައިޓެކެވެ. އަނެއް ދެ އެއާލައިނަކީ ސްރީލަންކަން އެއާލައިންސް އާއި ބަންގްލަދޭޝް އިން ރާއްޖެ އަންނަ މޯލްޑިވިއަންގެ ފްލައިޓެކެވެ.
މި ތިން ފްލައިޓުގައި ގާތްގަނޑަކަށް 200 އަށް ވުރެ ގިނަ މީހުން ރާއްޖެ އަންނާނެ ކަމަށް މައުލޫމާތު ލިބެއެވެ. ބޯޑަރު ހުޅުވުމަށް މާދަމާ ވެލާނާ އެއާޕޯޓުގައި ހާއްސަ ރަސްމިއްޔާތެއް ވެސް ބޭއްވުމަށް ހަމަޖެހިފައިވެއެވެ.
