ބޮލުގައި ރިއްސާނަމަ މިކަންކަން ކޮށްލާ!
ބޮލުގައި ރިއްސުމަކީ ގިނަ ބަޔަކު ތަހައްމަލު ކުރަމުން ގެންދާ ބައްޔެކެވެ. ބައެއް ފަހަރު ދިރިއުޅުމުގެ ވައްޓަފާޅި ހުންނަ ގޮތުގެ ސަބަބުން ވެސް ބޮލުގައި ރިއްސުމަށް މަގުފަހިވެއެވެ. ބޮލުގައި ރިހުމަކީ ބޮޑު އަދި ނުރައްކާތެރި ބައްޔެއްގެ އަލާމާތަކަށް ވެސް ވެދާނެއެވެ. ނޫނީ މާބޮޑަށް ކަންކަމާއި ވިސްނުމާއި ހަށިގަނޑަށް ބޭނުންވާ މިނަރަލް މަދުވުމުން ވެސް ބޮލުގައި ރިހުމަށް މަގުފަހިވެއެވެ. މި ހިމަނާލަނީ ބޮލުގައި ރިއްސުމަށް ގޭގައި ދެވިދާނެ ބައެއް ފަރުވާއެވެ.
އިނގުރު: އިނގުރަކީ އެތައް ބައްޔެއްގެ ފަރުވާއަށް ބޭނުން ކުރާ އެއްޗެކެވެ. ހަމައެއާއެކު އެއީ ބޮލުގައި ރިހުމަށް ފަރުވާއަކަށް ވަރަށް ގިނަ މީހުން ބޭނުން ކުރަމުން އަންނަ އެއްޗެކެވެ. ބޮލުގައި ރިހުމަށް ލުއި ހޯދުމަށް އިނގުރު ހިމުންކޮށްގެން ޕޭސްޓް ހަދައިގެން ނިއްކުރީގައި އުނގުޅައިގެންވެސް ބޭނުން ކުރެވިދާނެއެވެ. ނުވަތަ އިނގުރު ދިޔަ އާއި ލުނބޯ ހުތް އެއްކޮށްލުމަށްފަހު ބޯންވެސް ބޭނުން ކުރެވިދާނެއެވެ. މި ދެގޮތުން ތެރެއިން ކޮންމެ ގޮތަކަށް އިނގުރު ބޭނުން ކުރި ނަމަވެސް ބޮލުގެ ރިހުމަށް ވަރަށް އަވަހަށް ލުއި ލިބޭނެއެވެ.
ކަރަންފޫ: ކަރަންފުލަކީ ވެސް ބޮލުގެ ރިހުމަށް ފަސޭހައިން ލުއި ކޮށްދިނުމުގައި މުހިންމު ރޯލެއް ކުޅޭ އެއްޗެކެެވެ. އެގޮތުން ބޮލުގައި ރިއްސާނަމަ ދެތިން ކަރަންފޫ ހަފާލައިގެން ކާވެސް ލެވިދާނެއެވެ. ނުވަތަ ކަރަންފޫ ތަކެއް ފުނޑުކޮށްފަ ފޮތިކޮޅަކަށް އަޅައިގެން އޭގެ ހުންނަ ވަސް ބެލުމުން ވެސް ބޮލުގައި ރިހުމަށް ލުއި ލިބިދެއެވެ. ގަވައިދުން ބޮލުގައި ރިއްސާ މީހުންނަށް ތަންތަނަށް ދާއިރު، ދަބަސް ތެރެއަށް ކަރަންފޫ ފުނޑުކޮށްގެން ފޮތިކޮޅަކަށް އަޅައިގެން ގެންދެވިދާނެއެވެ. މިހެން ހެދުމުން ބޮލުގައި ރިއްސަން ފެށުމުން އޭގެ ވަސް ބެލުމުން އަވަހަށް ލުއި ލިބޭނެއެވެ.
ބެސިލް ލީވްސް: މި ފަތްތަކަކީ ވެސް ބޮލުގެ ރިހުމަށް ފަރުވާ ހޯދުމަށް ބޭނުން ކުރާ އެއްޗެކެވެ. އެގޮތުން، ބޮލުގައި ރިއްސަން ފެށުމުން ބެސިލް ލީވްސްގެ ސައި ބޮވިދާނެއެވެ. އޭރުން ބޮލުގައި ރިހުމަށް ފަރުވާ ލިބޭނެއެވެ. ބެސިލް ލީވްސް އިން ސައި ހަދާނެ ގޮތަކީ ފުރަތަމަ ހަތަރު ވަރަކަށް ބެސިލް ލީވްސް ފެންކޮޅެއްގައި ކައްކާނީއެވެ. އެއަށްފަހު، އެ ކެއްކި ފެންފޮދު ފުރާނާލުމަށް ފަހު އޭގެ ތެރެއަށް މާމުއި އަޅައިގެން އެއްކުރާނީއެވެ.
