14 އަހަރުގެ ކުއްޖާގެ ރޭޕް މައްސަލަ: ކުއްޖާއަށް ލިބިފައިވާ އަނިޔާތައް ބަލަމުންދާ ކަމަށް ފުލުހުން ވިދާޅުވެއްޖެ

އުތުރުގެ ރަށެއްގައި އުމުރުން 14 އަހަރުގެ އަންހެން ކުއްޖަކަށް ޖިންސީ ގޯނާ ކުރިކަމުގެ މައްސަލަ ފުލުހުން ބަލަމުން ގެންދަވާ ކަމަށާއި މި ހާދިސާއާ ގުޅިގެން އެ ކުއްޖާއަށް ލިބިފައިވާ އަނިޔާތައް ވެސް ބަލަމުންދާ ކަމަށް ފުލުހުން ވިދާޅުވެއްޖެއެވެ.

Ads by MWSC

ފުލުހުން މިރޭ ނެރުއްވި ބަޔާނެއްގައި ވިދާޅުވެފައިވަނީ މި މައްސަލަ ހުށަހެޅުމާއެކު ކުއްޖާއަށް އެއްވެސް އަނިޔާއެއް ލިބިފައިވޭތޯ ބެލުމަށް އެކުއްޖާ އެރަށު ސިއްޙީ މަރުކަޒަށް ދައްކާފައިވާ ކަމަށެވެ. އަދި އެކުއްޖާ ޚާއްސަ ޑޮކްޓަރުންނަށް ދެއްކުމަކީ މުހިންމު ކަމެއްގެ ގޮތުގައި ބެލެވި، އެރަށް ހިމެނޭ ރީޖަނަލް ހޮސްޕިޓަލުގެ ސްޕެޝަލިސްޓުންނަށް ދައްކާފައިވާ ކަމަށް ވެސް ފުލުހުން ވިދާޅުވެފައިވެއެވެ.

މި މަހުގެ 3 ވަނަ ދުވަހު ހުށަހެޅުނު އެމައްސަލައާ ގުޅިގެން، އެ މައްސަލައިގެ ތަހުގީގަށް ބޭނުންވާ އިތުރު އެސެސްމަންޓް ހެދުމަށްޓަކައި އެކުއްޖާ މާލެ ގެނެސް، ނަފްސާނީ އަނިޔާއެއް ލިބިފައިވޭތޯ ބެލުމަށް ސައިކޭޓްރިސްޓަކަށް ދައްކައި، ސްއިކޭޓްރިކް އެސެސްމަންޓް ހެދުމުގެ މަސައްކަތް ވެސް ފުލުހުން ކުރައްވަމުން ގެންދަވާކަމަށް ބަޔާނުގައި ވިދާޅުވެފައިވެއެވެ.

އުމުރުން 14 އަހަރުގެ އެ އަންހެން ކުއްޖާއަށް ޖިންސީ ގޯނާ ކުރިކަމުގެ ތުހުމަތު އުފުލާފައިވަނީ ސްކޫލެއްގެ ޓީޗަރަކާއި އިތުރު 3 މީހަކަށެވެ. އެމީހުން އަދިވެސް ހައްޔަރު ކޮށްފައި ނުވުމުން އެރަށުގައި މިއަދު ވެސް ވަނީ މުޒާހަރާ ކޮށްފައެވެ.