ވިސްނާލާ! މަޝްހޫރު މީހަކަށް ވުމަކުން ކޮވިޑުން ސަލާމަތެއް ނުވެވޭ!
މުޅި ދުނިޔެއަށް ވެސް މިހާރު ޖެހިފައިވާ އެންމެ ބޮޑު އެއް ވަބާއަކީ ކޮވިޑް-19 ގެ ވަބާއެވެ. އެންޓާކްޓިކާ ނޫން އެހެން ހުރިހާ ޤައުމަކަށް މިބަލި ފެތުރިފައިވާއިރު މުޅިއަކު 15 މިލިއަނަށްވުރެ ގިނަ މީހުން ވަނީ ކޮވިޑް އަށް ފައްސިވެފައެވެ.
މިބަލީގެ ނުރައްކާތެރިކަން ދުނިޔޭގެ ސިއްޙަތު ޖަމިއްޔާއިން ވެސް ހާމަކުރަމުން ގެންދާއިރު، މިއީ ރައްކާތެރި ވެގެން ނުތިބެއްޖެނަމަ ހަމަ ކޮންމެ މީހަކަށް ވެސް ޖެހިދާނެ ބައްޔެއްކަން ވެސް މިވަނީ ހާމަ ވެފައެވެ.
އެކަން މިފާއިތުވީ ދުވަސްތަކުގައި މިވަނީ ހާމަވެސް ވެފައެވެ. މަޝްހޫރުވުމަކުން ނުވަތަ ދުނިޔޭގައި އާރާބާރު ލިބިފައިވާ މީހަކަށް ވުމަކުން މިބަލި ނުޖެހި ސަލާމަތް ވެވުނީކީ ނޫނެވެ.
މިސާލަކަށް މިތިބީ މިބައްޔަށް ފައްސިވީ، ބައެއް ނަން މަޝްހޫރު މީހުންނެވެ.
އިނގިރޭސިވިލާތުގެ ޝާހީ އަމީރު ޕްރިންސް ޗާލްސް އަށް ބަލަމާ ހިނގާށެވެ. ރަސްކަމެއްގެ ޠަހުތައް ވެރިވުމުގެ މަގުމަތީގައި ހުރި ބޭފުޅެކެވެ. ބޮޑު ޤައުމެއް އަދި މުޅި ދުނިޔެ ވެސް އެމީހަކަށް ތާއަބަދު އިޚްތިރާމް ކުރާނެ މީހެކެވެ. އޭނާގެ ރައްކަލަކަށްޓަކައި ހަށިފާރަވެރިން ނުތިބޭއިރެއް ނުދެއެވެ. ނަމަވެސް ކޮވިޑް ފަދަ ނުރައްކާތެރި ވައިރަހުން އެހަށިފާރަވެރިންނަށް ވެސް ޕްރިންސް ޗާލްސް ރައްކާތެރިއެއް ނުކުރެވުނެވެ. އުމުރުފުޅުން 71 އަހަރުގައި ޕްރިންސް ޗާލްސް ކޮވިޑަށް ފައްސިކަން ހާމަވީ މާރޗް މަހުގައެވެ.
ކޮވިޑްގެ ނުރައްކަލުން ސަލާމަތް ނުވެވުނީ ޝާހީ އާއިލާއަށް އެކަންޏެއް ނޫނެވެ. ވެރިކަން ކުރާ ރައީސުންނަށް ބަލާއިރު ބްރެޒިލްގެ ރައީސް ޖެއިލް ބޮލްސޮނާރޯ ވެސް ވަނީ މިބައްޔަށް ފައްސިވެފައެވެ. ޖުލައި މަހުގެ 7 ވަނަ ދުވަހު އެމަނިކުފާނު ވަނީ މިކަންް އާއްމުކޮށް އަންގާ އިއުލާނު ކޮށްފައެވެ. އަދި ބަލިހާލަތު އެހާ ގޯސް ނޫން ކަމަށް ވެސް ވިދާޅުވެފައެވެ.
ވެރިކަން ކުރާ މީހުންނާއި ޝާހީ މީހުންގެ އިތުރުން، މުނިފޫހިފިލުވުމުގެ ދާއިރާގައި އުޅޭ މީހުންނަކީ ވެސް ވަރަށް ބޮޑު މަޝްހޫރުކަމެއް ދުނިޔޭގައި ހޯދާފައިވާ ބައެެކެވެ. އެގޮތުން ބޮލީވުޑްގެ ތަރިންނަކީ މުޅި ދުނިޔެއަށް ވެސް މަޝްހޫރު ބައެކެވެ.
އޭގެ ތެރެއިން ވެސް އެންމެ ފާހަގަ ކޮށްލެވެނީ އިންޑިއާގެ އިތުރުން ދުނިޔޭގެ ގިނަ ބައެއްގެ އިޚްތިރާމް ލިބިފައިވާ "ބަޗަން" އާއިލާ އަށެވެ.
އާއްމު ދިރިއުޅުމުގެ ވައްޓަފާޅިވެސް ވަކި ޚާއްސަ ގޮތަކަށް ބަހައްޓާ ބަޗަން އާއިލާގެ ބަންގްލޯ ތެރެއަށް ވެސް ޓަކި ޖެހުމަކާއި ދައުވަތަކާއި ނުލާ މިވަނީ ކޮވިޑް-19 ވަދެފައެވެ.
އަމީތާބް ބަޗަން އާއި އަބީޝޭކް ގެ އިތުރުން އައިޝްވާރްޔާ އަދި އާރަދްޔާ ވެސް ވަނީ މިބައްޔަށް ފައްސިވެ ހާލު ދެރަވެގެން އެޑްމިޓުވެސް ކޮށްފައެވެ.
މިބުނި މީހުންގެ އިތުރުން ވެސް ވަރަށް ގިނަ މަޝްހޫރު މީހުން ވަނީ މިބައްްޔަށް ފައްސި ވެފައެވެ. އޭގެ ތެރޭގައި އިނގިރޭސި ބޮޑުވަޒީރު ބޮރިސް ޖޯންސަން އާއި ސާރބިއާ ގެ މަޝްހޫރު ޓެނިސް ކުޅުންތެރިޔާ ނޮވާކް ޖޮކޮވިކް، ބްރިޓިޝް އެކްޓަރ އިދްރިސް އެލްބާ، އޮސްކާ އެވޯޑް ހާސިލް ކޮށްފައިވާ އެކްޓަރު ޓޮމް ހޭންކްސް އާއި އޭނަގެ އަންހެނުން ރީޓާ ވިލްސަން، ކެނެޑާގެ ބޮޑުވަޒީރު ޖަސްޓިން ތްރޫދޫގެ އަންހެނުން ސޯފީ ތްރޫދޫ އާއި ލަވަކިޔުންތެރިޔާ ކެނީ ބޭބީފޭސް އެޑްމޮންޑްސް އާއި އޭނަގެ އަންހެނުން ވެސް ވަނީ މިބައްޔަށް ފައްސިވެފައެވެ
މިހުރިހާ ކަމަކުން ވެސް އަންގައިދެނީ އެންމެ ކަމެކެވެ. މަޝްހޫރު ވުމަކުން، އާރާއިބާރު ހުރުމަކުން މިބަލިން ސަލާމަތް ނުވެވޭ ކަމެވެ. ކޮވިޑް-19 ގެ ނުރައްކަލުން ސަލާމަތްވާން ބޭނުުންނަމަ ސިއްޙީ މާހިރުން ދެއްވާ އިރުޝާދުތަކަށް ރަނގަޅަށް ބޯލަނބާ، ރައްކާތެރިކަމުގެ ފިޔަވަޅުތައް އެޅުން ނޫން ގޮތެއް ނެތެވެ.
