ބޯޓުން ބޭލުވި އެއް އާއިލާގެ އާދޭސް: ތުއްތު ދަރިފުޅުގެ އޮޕަރޭޝަން އަވަސް ކުރަންޖެހޭ، އިންތިޒާމު ކޮށްދެއްވާ!
މިމަހުގެ 29 ވަނަ ދުވަހު ބޭސްފަރުވާއަށް އިންޑިއާއަށް ފުރަން އުޅެނިކޮށް ކޮވިޑަށް ފައްސިވީ ބަޔަކު އެފްލައިޓުގައި ތިބުމުން އެންމެން ފްލައިޓުން ވަނީ ބާލުވާފައެވެ.
އެއީ ހުސް ބޭސް ފަރުވާއަށް ފުރަން ހަމަޖެހިފައިވާ މީހުންކަން ވެސް ވަނީ ހާމަވެފައެވެ.
އެގޮތުން ބޭލުވި އެއް ބައެއްގެ ތެރޭގައި ހިމެނެނީ ފުއްޕާމޭގައި ކާއެތިކޮޅެއް ތާށިވުމުގެ ސަބަބުން ވީއެންމެ އަވަހަކަށް އޮޕަރޭޝަން ކުރަންޖެހޭ އެއް އަހަރާއި ދެމަހުގެ ތުއްތު ކުއްޖެކެވެ. އެކުއްޖާއާއި އެކުއްޖާގެ މައިންބަފައިން ފްލައިޓުން ބޭލުވީ އެކުއްޖާގެ މަންމަ ކޮވިޑަށް ފައްސިކަން އެނގުމުންނެވެ.
ނަމަވެސް ކުއްޖާގެ މަންމަގެ ނަތީޖާ ލިބުނީވެސް މާލަހުން ކަމަށް ބުނެ އާއިލާއިން މީހަކު ވަނީ "ލިޔުމެއް" މެދުވެރިކޮށް މައުލޫމާތު ދީފައެވެ. އެލިޔުން ވަނީ "ދެން" އަށް ވެސް ލިބިފައެވެ.
އާއިލާއިން ބުނެފައިވަނީ އަތޮޅުތެރޭގެ ރަށަކަށް ނިސްބަތްވާ އެއާއިލާ، މާލެ އައީ ކުއްޖާގެ ނޭވާލާ ހޮޅީގައި އެތިކޮޅެއް ތާށިވެފައިވާ ކަމަށް އަތޮޅު ހޮސްޕިޓަލުން ބުނެ، އަވަސް މުއްދަތެއްގައި މާލެ އައިސް ޓެސްޓު ހެދުމަށް އަތޮޅު ހޮސްޕިޓަލުން އެންގުމުންނެވެ.
އެމީހުން މާލެ އައީ 28 ޖޫން ގައެވެ. ތުއްތު ކުއްޖާގެ ޓެސްޓު ހެދުމުން އެނގުނީ ކުއްޖާގެ ފުއްޕާމޭގައި ކާއެތިކޮޅެއް ތާށިވެފައިވާކަން ކަމަަށް ވެސް އާއިލާއިން ބުންޏެވެ.
ޖުލައި މަހުގެ 2 ވަނަ ދުވަހު އައިޖީއެމްއެޗް ގެ އެމަޖެންސީ ބައިން މީހަކު ކޮވިޑަށް ފައްސި ވުމުން އެކުއްޖާގެ އޮޕަރޭޝަން ކުރީ ޖުލައި މަހުގެ 5 ގައެވެ. ނަމަވެސް އޮޕަރޭޝަންވީ ނާކާމިޔާބެވެ.
އައިޖީއެމްއެޗުން ބުނި ގޮތުގައި އެއޮޕަރޭޝަން ނާކާމިޔާބުވީ ތުއްތު ކުއްޖާގެ އޮޕަރޭޝަން ހެދުމަށް ބޭނުންވާ "ހިމަ ޓޫލްސް" އެހޮސްޕިޓަލުގައި ލިބެން ނެތުމެވެ. އެހެންކަމުން އެމަޖެންސީކޮށް ބޭރުގެ ޤައުމަކަށް ދިޔުމަށް އެންގިކަމަށް ވެސް ވެއެވެ. ނަމަވެސް ބޭރުގެ ޤައުމަކަށް ދާން އައިޖީއެމްއެޗް ގެ ފަރާތުން ލިޔުން ލިބުނީވެސް، އެހެން ހޮސްޕިޓަލެއްގެ ފަރާތުން "ޕްރެޝަރ" ކޮށްގެން އޭގެ ތިން ދުވަސް ފަހުން ކަމަށް ވެސް އާއިލާއިން ބުންޏެވެ.
އެތަކެއް ދުވަހެއްގެ ދިގު އިންތިޒާރަށްފަހު އެމީހުންނަށް ފަރުވާ އަށް ދާން އުންމީދު އާލާވީ މިދިޔަ ބުދަ ދުވަހުގައެވެ. ނަމަވެސް ތުއްތު ކުއްޖާގެ މަންމަ ބައްޔަށް ފައްސިވުމުން އެމީހުންނަށް ޖެހުނީ ފްލައިޓުން ފައިބާށެވެ.
އާއިލާއިން ބުނި ގޮތުގައި ތުއްތުކުއްޖާގެ އޮޕަރޭޝަން އެންމެ ފަހުން ކުރިފަހުން ވެސް މަހެއް ވަނީއެވެ. ފަރުވާ ލިބޭނެކަމަށް ކުރި ފޮނި އުންމީދުތަށް ވެސް މިހާރު މާޔޫސްކަމަށް ބަދަލު ވަނީއެވެ.
އެދުވަހު ތުއްތު ކުއްޖާގެ މަންމަ ކޮވިޑަށް ފައްސިވުމުން ފްލައިޓުން ބޭލި ނަމަވެސް އެބައްޔަށް ނައްސި ވެފައިވާ އެތުއްތު ކުއްޖާއާއި އެކުއްޖާގެ ބައްޕަ ކަރަންޓީނު ކުރަން ހުޅުމާލޭގެ ގެސްޓްހައުސަކަށް ގެންދަނީކަމަށްބުނެ، އެމްބިއުލޭންސަކަށް ލައިގެން ގެންގޮސް ބޭލީ ކޮވިޑަށް ފައްސިވެފައިތިބި އުމުރުން ދުވަސްވީ މީހުންނަށް ފަރުވާ ދެމުންދާ ތަނަކަށް ކަމަށް ވެސް އާއިލާއިން ބުނެފައިވެއެވެ. އެތަނުގައި އިހުތިޖާޖު ކުރުމުން އޭގެ އެއް ގަޑިއިރު ފަހުން އެހެން ތަނަކަށް ބަދަލުކުރިއިރު އެއީ ވެސް ކޮވިޑް ޖެހިފައިތިބި މީހުން ތިބި ތަނެއްކަން ވަނީ ފާހަގަ ކޮށްފައެވެ.
ްެއާއިލާގެ އެދުމުގެ މަތިން ދެވަނަ ފަހަރަށް އަނެއްކާވެސް ޓެސްޓު ހެދިއެވެ. ތުއްތު ކުއްޖާއާއި އެކުއްޖާގެ ބައްޕަ ބައްޔަށް ނައްސި ކަމަށް ދެއްކިއެވެ. އަދި ޖުލައި 30 ވަނަ ދުވަހުގެ މެންދަމު 1:41 ގައި ކުއްޖާގެ މަންމައަށް އެޗްޕީއޭއިން މެސެޖުކޮށް ބުނެފައިވަނީ 29 ވަނަ ދުވަހު ކުއްޖާގެ މަންމަގެ ނެގި ސާމްޕަލް ނައްސި ކަމަށެވެ.
ނަމަވެސް އާއިލާއިން ބުނެފައިވާ ގޮތުގައި އެތިން މީހުންގެ ވެސް އެންމެ ފުރަތަމަ ސާމްޕަލް ނަގާފައިވަނީ 27 ޖުލައި ގައެވެ.
"ކޮވިޑް ބަލި ނެތިސް 29 ވަނަ ދުވަހުގެ މެންދުރުން ފެށިގެން 30 ވަނަ ދުވަހުގެ އިރުއޮއްސުމާއި ހަމައަށް ހޭދަކުރަން ޖެހުނީ ކޮވިޑް ބައްޔަށް ފަރުވާ ހޯދަމުންދިޔަ ބަޔަކާއެކީ، ރައްކާތެރިކަމެއް ނެތި" އާއިލާގެ ފަރާތުން ބުނެފައިވެއެވެ.
މީގެއިތުރުން އެއާއިލާގެ އެހެން ކަންބޮޑުވުމެއް ވެސް މިހާރުވެއެވެ. އެހާ ގިނަ ދުވަހު މާލޭގައި އެހެން ތިބެން ޖެހުމުގެ ސަބަބުން އެއާއިލާވަނީ މާލީ ދަތިކަމާއި ވަރަށް ބޮޑަށް ކުރިމަތިލާން މިހާރު ޖެހިފައެވެ. ތުއްތު ކުއްޖާއަށް އަވަސް ފަރުވާވެސް ބޭނުންވެއެވެ.
"ތުއްތު ކުއްޖާގެ ފުއްޕާމޭގެ އޮަޕަރޭޝަން ކުރަން ވީއެންމެ އަަވަހަކަށް ރާއްޖެއިން ބޭރަށް ފޮނުވާދެއްވާ ނޫނީ މިއޮޕަރޭޝަން ކުރަން ބޭނުންވާ ހިމަ ޓޫލްސް ލިބޭނެ ގޮތް ހަމަޖައްސައިދީ" އާއިލާއިން އާދޭސް ކުރިއެވެ.
