އެހެން ދާއިރާއެއްގެ ބަޔަކު ގާދިއްފުށީ ކެންޑިޑޭޓުންނަށް ވޯޓުލީ މައްސަލައެއް ހުށަހަޅައިފި
މި މަހުގެ 10 ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބުގައި ތ. ގާދިއްފުށީ ކައުންސިލަށް ކުރިމަތިލެއްވި ކެންޑިޑޭޓުންނަށް އެހެން ދެ ރަށެއްގެ ދެ މީހަކު ވޯޓުލީކަމުގެ ޝަކުވާ، އެމްޑީޕީގެ ކެނޑިޑޭޓެއްގެ ފަރާތުން އިލެކްޝަންސް ކޮމިޝަން (އީސީ)އަށް ހުށަހަޅައިފި އެވެ.
ގާދިއްފުށީ ކައުންސިލަށް ކުރިމަތިލެއްވި އެމްޑީޕީ ކެންޑިޑޭޓެއްގެ މަންދޫބަކު އޮންލައިން ނޫހަކަށް މިރޭ މައުލޫމާތު ދެއްވަމުން ވިދާޅުވީ އެހެން ދެ ދާއިރާއެއްގެ ދެ މީހަކު ގާދިއްފުށީ ކައުންސިލަށްް ވޯޓުދިން ކަމަށް ބެލެވުނީ ވޯޓުލައި ނިމުނު އިރު އެ ދެ ދާއިރާގެ ވޯޓު ކަރުދާސް ބާކީ އޮތުމުން ކަމަށެވެ.
ގާދިއްފުށީ ކައުންސިލުގެ ނައިބު ރައީސް ޢަބްދުލްމުހައިމިން ޢަބްދުއްރަޙީމް "ދެން" އަށް މައުލޫމާތު ދެއްވަމުން ވިދާޅުވީ، އެހެން ދާއިރާއެއްގެ ބަޔަކު ޕީޕީއެމްގެ ކެންޑިޑޭޓުންތަކަކަށް ވޯޓު ދިން ކަމަށެވެ.
"އެހެނިހެން ދާއިރާތަކަކަށް ވޯޓުލާ ދެ މީހަކު ވޯޓުލައިފައި ވަނީ. އެ ޝަކުވާ އިލެކްޝަންސް ކޮމިޝަނަށް ހުށަހަޅާފައި ވަނީ" ޢަބްދުލްމުހައިމިން ވިދާޅުވިއެވެ.
މި ފަހަރުގެ ލޯކަލް ކައުންސިލްތަކުގެ އިންތިހާބުގެ ވަގުތީ ނަތީޖާ ދައްކައި ގޮތުން އިދިކޮޅަށް ގިނަ ގޮނޑިތަކެއް ލިބުނު އިރު ވެރިކަން ކުރާ ކޯލިޝަނުގެ މައި ޕާޓީ އެމްޑީޕީއަށް ވަނީ ކުރިން އެ ޕާޓީއަށް ތާއީދު ބޮޑު ބައެއް ދާއިރާތައް ގެއްލިފައެވެ.
