އިންޑިއާއަށް ޗައިނާއާއި އެމެރިކާއިން އެހީތެރިކަން ފޯރުކޮށްދެނީ

އަވައްޓެރި އިންޑިއާގައި ފެތުރެމުންދާ ކޮވިޑް-19ގެ އާ ވޭރިއަންޓްގެ ސަބަބުން ސިއްޙީ ގޮތުން އެ ޤައުމުގެ ދަށަށް ގޮސްފައިވާތީ، އިންޑިއާއަށް އެހީތެރިކަން ފޯރުކޮށްދޭން ތައްޔާރަށް އޮތް ކަމަށް ޗައިނާ އަދި އެމެރިކާއިން ބުނެފިއެވެ.

Ads by MWSC

އެގޮތުން އެމެރިކާގެ ޚާރިޖީ ވަޒީރު އެންޓަނީ ބްލިންކަން ވިދާޅުވީ އިންޑިއާއަށް ކުރިމަތިލާން ޖެހިފައިވާ ކޮވިޑްގެ ހާލަތާ ގުޅިގެން، އެމެރިކާއިން އިންތިހާއަށް ކަންބޮޑުވާ ކަމަށާއި އިންޑިއާއަށް ބޭނުންވާ ސިއްހީ އެހީތައް ދޭން އެމެރިކާ އޮތީ ތައްޔާރަށް ކަމަށެވެ.

ވައިޓްހައުސްއިން ބުނީ އިންޑިއާއަށް ކުރިމަތިލާން ޖެހިފައިވާ ކޮވިޑް ސާޖާ ގުޅިގެން އިންޑިއާގެ ސަރުކާރާއި އެގައުމުގެ ސިއްހީ ޚިދުމަތްތެރިންނަށް ބޭނުންވާ އެހީތައް ފޯރުކޮށްދިނުމާ ބެހޭގޮތުން، ދެ ޤައުމުގެ ސަރުކާރުން މަޝްވަރާ ކުރަމުން ގެންދާކަމަށެވެ.

އިންޑިއާއަށް އެހީތެރިވާން ތައްޔާރަަށް އޮތްކަމުގައި ޗައިނާއިން ވެސް ބުނެފައިވީ ނަމަވެސް، ފޯރުކޮށްދޭ އެހީގެ ތަފްސީލު އެ ދެ ޤައުމުން ވެސް ހާމަ ކޮށްފައެއް ނުވެއެވެ.

މިދުވަސްވަރު އިންޑިއާއަށް ކުރިމަތިވެފައިވާ އެންމެ ބޮޑު މައްސަލަކަމަށް ރިޕޯޓުތަކުން ބުނެފައި ވަނީ ކޮވިޑް ގެ ކޭސްތައް އިންޑިއާގައި އާދަޔާ ޚިލާފަށް ގިނަވަމުންދާތީ އެގައުމުގެ ގިނަ ހޮސްޕިޓަލުތަކުން އޮކްސިޖަން ހުސްވެފައިވާ މައްސަލައެވެ. އޮކްސިޖަން ހުސްވުމުގެ ސަބަބުން، ކޮވިޑްގެ ބަލިމީހުން މަރުވުމުގެ ގިނަ ހާދިސާތަކެއް އިންޑިއާގައި ދަނީ ހިނގަމުންނެވެ.

ފާއިތުވީ 24 ގަޑިއިރު ތެރޭގައި އިންޑިއާގައި 2700އަށް ވުރެ ގިނަ މީހުން ވަނީ ކޮވިޑް ބަލީގައި މަރުވެފައެވެ. އަދި ފާއިތުވި ދެތިން ދުވަހަށް ބަލާއިރު އިންޑިޔާގައި ކޮވިޑަށް ފައްސިވާ މީހުންގެ އަދަދު ވަނީ ދުވާލެއްގެ މައްޗަށް 3 ލައްކައަށްވުރެ މައްޗަށް ގޮސްފައެވެ.