ގޭތެރޭ މަސައްކަތް ކުރަން ފިރިހެނުންނާ ހަވާލު ނުކުރަން އުޅެނީ ކީއްވެ؟
ވަރަށް ގިނައިން ފިރިހެނުން ކުރާ ޝަކުވާއެކެވެ.
"ގޭތެރޭ މަސައްކަތްތައް ކުރަން އަހަރުމެންނާ ހަވާލު ނުކުރަނީ ކީއްވެ؟"
ބައެއް ފަހަރު ކޮންމެހެން ގޭތެރޭގައި އެހީތެރިވެދޭން ނޫން ކަމުގައި ވިޔަސް، ކަމެއް ހަވާލު ނުކުރަން އުޅޭތީ، ނުވަތަ އަމިއްލައަށް ކުދިކުދި ކަންކަން ކުރަން އުޅުމުން ވެސް ދުރުކޮށްލާތީ، އެކަމާ ބައެއް ފިރިހެނުން ހިތްހަމައެއް ނުޖެހެއެވެ.
އެމެރިކާގެ "ކިއުޒީ ޑޮޓް ކޮމް" އިން ވަނީ މިކަމާ ބެހޭގޮތުން ސާވޭއެއް ހަދާފައެވެ. އެ ސާވޭގައި ބައެއް އަންހެނުންނާއި ސުވާލު ކޮށްފައިވަނީ އެމީހުންގެ ފިރިން ނުވަތަ ބައިވެރިޔާއާއި ގޭތެރޭގެ މަސައްކަތް ކުރަން ހަވާލު ނުކުރަނީ ކީއްވެތޯއެވެ.
"އަހަރެންގެ ފިރިމީހާއާ ކުރީ ދުވަހު ހަވާލު ކުރިން އަހަރުމެންގެ ހަތަރު އަހަރުގެ ފިރިހެން ދަރިފުޅު ބޭރަށް ގެންދަން ތައްޔާރު ކުރަން. އާންމުގޮތެއްގައި އަހަރެން ދަރިފުޅު ފެންވަރުވާ، ރީތިކޮށް، ތައްޔާރުކޮށް ނިންމަން 15 މިނެޓު ވެސް ނުނިމެނީސް. އެކަމަކު އެދުވަހު ބައި ގަޑިއިރު ވާން ކައިރިވީއިރު ވެސް ނުނިމޭތީ ބަލައިލިއިރު ފިރިމީހާ މުޅި ކޮޓަރީގައި ދަރިފުޅު ފަހަތުން ދުވަނީ. ބުނީ ދަރިފުޅު ސަކަރާތް ޖަހާތީ އަދިވެސް ހަމަ ތައްޔާރު ނުކުރެވިގެން ކަމަށް. އޭރު ދަރިފުޅު ހުރީ ހަމައެކަނި ޖަންގިޔާކޮޅު ލައިގެން. ފިރިމީހާ ވެސް ފެށީ ދަރިފުޅާ އެކީ ކުޅެން. އެހެންވެ ދެން އެންމެ ފަހުން އަހަރެން ބުނިން ދޭށޭ އަހަރެން އަތަށް. އެކަން ކޮށްލަފާނަމޭ." ސޭރާ ވޯލްޓާސް ނަމަކަށް ކިޔާ މީހަކު ބުނެފައިވެއެވެ.
"އަަހަރެންގެ ފިރިމީހާއަށް ދުވަހަކު ވެސް ގޭތެރޭގެ އެއްވެސް ކަމެއް ރަނގަޅަކަށް ނުކުރެވޭ. އެއްޗެހި ދޮންނަން ހަވާލު ކޮށްފިއްޔާ ހެދުންތައް ހަލާކުކޮށްލާ، ކައްކަން ހަވާލު ކުރިއްޔާ އެ އެއްޗެއް ހުންނަނީ ރަނގަޅަށް ރޯ ނުފިލާ އެހެން ނޫނީ ލޮނުގަދަ ވެފަ، ބައެއް ކާ އެއްޗެހި ތައްޔާރު ކުރަން އެނގުނަސް ކައްކާ ނިމޭއިރު މުޅި ބަދިގެ އޮންނަނީ ހަޑި ކޮށްލާފަ. ގޭތެރޭ މަސައްކަތްތަކަކީ ފިރިހެނުންނަށް ކުރެވޭނެ ކަންތައްތަކެއް ނޫން." ކެރޮލް މެތިއުސް ބުނެފައިވެއެވެ.
މީގެއިތުރުން މިޝޭލް ބޯންސް ކިޔާ މީހަކު ބުނެފައި ވަނީ، އޭނާގެ ފިރިމީހާއާ ގޭތެރޭގެ މަސައްކަތެއް ކުރަން ހަވާލު ނުކުރަނީ ކަމެއް ކޮށްދީފައި ވެސް ފަހުން އެކަމުގެ ކަލަ ގޮވާތީ ކަމަށެވެ.
"މުޅި ދުވަހު ގޭތެރޭގެ މަސައްކަތްތައް ކުރަނީ އަހަރެން. ފިރިިމީހާ ކައިރީގައި ގޭތެރެ ކުނި ކަހާލަ ދޭން ބުނީމަ ކަހައި ދޭނެ. އެކަމަކު ނިދަން އައިސްފައި އެކަމާ ބެހޭގޮތުން ޝަކުވާކޮށް ކަލަ ގޮވާނެ. އެއަށްވުރެ ބޮލަށް ފަސޭހަ ހުރިހާ ކަމެއް އަމިއްލައަށް ކުރިއްޔާ" މިޝޭލް ބުނެފައިވެއެވެ.
ކޮންމެއަކަސް މި ސާވޭގައި ބައިވެރިވި ގިނަ އަންހެނުން ބުނާ ގޮތުގައި ގޭތެރޭގެ މަސައްކަތްތައް ކުރަން ފިރިހެނުންނާ ހަވާލު ކުރުމަކީ ކުރުން ބުއްދިވެރި ކަމެއް ވެސް ނޫނެވެ. އަދި ގޭތެރޭގެ މަސައްކަތްތައް ރަނގަޅަށް ކުރުމަކީ ފިރިހެނުންނަށް ކުރެވޭވަރު ކަމެއް ވެސް ނޫނެވެ.
ތިހެން ނުބުނޭ ތިހެން ނުބުނޭ ކޮންމެވެސް. މާ މޮޅެތި ހައްގުތަކެއް ހޯދަދޭން އުޅޭ މީހުން ލޮލަށް ނިދިވެސް ނާންނާނެ.