ސަމާލު ނުވެވިއްޖެ ނަމަ ހޮސްޕިޓަލުތައް ފުރިދާނެ: މަބްރޫކް
ކޮވިޑް-19އިން ރައްކާތެރިވެ ބަލި ކޮންޓްރޯލު ކުރުމަށް ސަމާލު ނުވެވިއްޖެނަމަ ހޮސްޕިޓަލުތައް ފުރިދާނެ ކަމަށް ރައީސް އޮފީހުގެ ތަރުޖަމާނު މަބްރޫކް އަބްދުލްއަޒީޒް ވިދާޅުވެއްޖެއެވެ.
ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) ގެ ފަރާތުން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ ރާއްޖޭގައި ކޮވިޑަށް ފައްސިވަމުން އަންނަ އަދަދުތައް އިތުރުވާ ކަމަށާއި އެ ގޮތުން އިއްޔެ 508 މީހުން ފައްސި ވެފައިވާއިރު މިއަދު 586 މީހުން ފައްސި ވެފައިވާ ކަމަށެވެ.
"ކޮވިޑްގެ އަދަދުތައް މިދަނީ މައްޗަށް، ހޮސްޕިޓަލުތަކުގައި އެޑްމިޓު ކުރެވޭ މީހުންގެ އަދަދުތައް މައްޗަށް އެބަދޭ. މިކަމުގެ ސަބަބުން އަޅުގަނޑުމެން ދެކެން ބޭނުން ނުވި ދުވަހެއް އަޅުގަނޑުމެންގެ ކުރިމައްޗަށް އައިސްދާނެ. ހޮސްޕިޓަލުތައް ފުރިދާނެ، އަދި މިކަންކަމާ އަޅުގަނޑުމެންނަށް ސަމާލު ނުވެވިއްޖެނަމަ އަޅުގަނޑުމެންނަށް ހިތާމަވެރި އަދި މިއަށް ވުރެ ވެސް ދަތި ދުވަސްތަކެއް ކުރިމަތިވެދާނެ" މަބްރޫކް ވިދާޅުވިއެވެ.
މީގެ އިތުރުން މަބްރޫކް ވިދާޅުވީ އެފަދަ ދުވަހެއް ނުދެއްކެވުމަށް ދުއާ ކުރައްވާ ކަމަށާއި އަދި ކޮވިޑް-19 ކޮންޓްރޯލު ކުރުމަށް ކުރާ މަސައްކަތްތައް ކާމިޔާބުވެ، އާންމު ހާލަތަށް ރުޖޫއަވެވި، ކުރިން ދީފައިހުރި ލުއިތަކާއެކު އިތުރު ލުއިތައް ވެސް ދެއްވަން އުންމީދު ކުރައްވާ ކަމަށެވެ.
Ads by STO
