ބިރުވެރި މަންޒަރެއް: އިންޑިއާގައި މަރުވެފައިވާ މީހުންގެ ހަށިތައް ގަންގާ ކޯރަށް ލައްގަނީ
މަރުވެފައިވާ މީހުންގެ ހަށިތައް އިންޑިއާގެ ގަންގާ ކޯރަށް ލައްގާ މައްސަލަ ފެންމަތިވެއްޖެއެވެ.
ބީބީސީ އިން ރިޕޯޓްކޮށްފައިވާ ގޮތުގައި މިހާތަނަށް 40 މީހުންގެ ހަށިގަނޑު ވަނީ ލައްވެ ، ލައްގައިފައެވެ. ނަމަވެސް އިންޑިއާގެ ނޫޙެއް ކަަމަށްވާ އެންޑީޓީވީ އިން ރިޕޯޓްކޮށްފައިވާ ގޮތުގައި ލައްވެފައިވާ ހަށިތަކުގެ އަދަދު 100 އިން މައްޗަށް އަރައެވެ.
މިއީ ކޮން ސަބަބަކާހުރެ މަރުވެފައިވާ ބައެއް ކަމެއް ނުވަތަ ހަށިތައް ލައްވަނީ ކޮން ސަބަބަކާ ހުރެ ކަމެއް ސާފުނުވާ ކަމަށް ބީބީސީން ބުނެއެވެ. ހަށިގަނޑުތައް ލައްގާފައި ވަނީ ބިހާރް އާއި އުއްތަރް ޕްރަދޭޝް ސްޓޭޓް ގުޅޭ ހިސާބުންނެވެ.
އިންޑިއާގެ މީޑިއާތަކުން ރިޕޯޓް ކުރާ ގޮތުގައި ލައްގާފައިވާ ގިނަ މީހުންގެ ހަށިގަނޑު އޮތީ އެއްބައި އަނދާފައެވެ. އަދި އެކި ދިމާ ދިމާއިން ފުއްޕާފައި އޮތުމުން ފެނުގެ ތެރޭގައި ގިނަ ދުވަސްވެފައިވާ ކަން އެނގޭ ކަމަށް ވެސް ނޫސްތަކުން ބުނެއެވެ.
މީޑިއާތަކުން ބުނެފައި ވަނީ، މިއީ ކޮވިޑު ޖެހިގެން މަރުވި މީހުންގެ ހަށިތައް ރަނގަޅަށް އަންދައިފައި ނުވާތީ ދިމާވެގެން އުޅޭ ކަމެއް ކަމަށް ބެލެވޭ ކަމަށެވެ. އެއީ އުއްތަރު ޕްރަދޭޝްގައި ކޮވިޑު ޖެހިގެން މަރުވާ މީހުން އަންދަމުން ދަނީ ގަންގާ ކޯރުގެ އައްސޭރި ފަށުގައި ކަމަށް ވެފައި ލައްވާ ހަށިތަކުގައި ފިހިފައި ހުރި ކަމުގެ ނިޝާންތައް ހުރުމުގެ ސަބަބުންނެވެ.
ކޮވިޑް-19 ބަލިމަޑު ކަމުގެ ސަބަބުން އިންޑިއާގައި މީހުން އަންދާނެ ދަރު ނެތުމުގެ މައްސަލަ ފަހަކަށް އައިސް ވަނީ އިތުރުވެފައެވެ. މި ގޮތުން ބައެއް ހިސާބުތަކުގައި އަންދާނެ ދަރު ނެތުމުގެ ސަބަބުން އާއިލާއިން ހަށިތަކާ ހަވާލު ނުވާ މައްސަލަ ވެސް ދަނީ ފެންމަތިވަމުންނެވެ.
