ތިމަރަފުށި އަނެއްކާ ވެސް މޮނިޓަރިންއަށް ، މިފަހަރު ފައްސިވީ ދަރިވަރެއް
މޮނިޓަރިންއިން ނެގިތާ ގިނަ ދުވަހެއް ނުވެ ، ތ.ތިމަރަފުށީން ކޮވިޑްގެ ފައްސި ވޭދަނައެއް ފެނި އެ ރަށް އަނެއްކާ ވެސް މޮނިޓަރިންއަށް ލައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފައިވާ ގޮތުގައި އެރަށް މޮނިޓަރިންއަށް ކޮވިޑްގެ ފައްސި ވޭދަނައެއް ފެނިގެން މިއަދު މެންދުރުއެވެ. މޮނިޓަރިންއަށް ލުމާއެކު އެޗްޕީއޭގެ ހުއްދަ ނެތި އެ ރަށަށް އަރައި ފޭބުން މަނާ ވާނެއެވެ.
"ދެން"އަށް މައުލޫމާތު ލިބިފައިވާ ގޮތުގައި އެ ރަށުން މި ފަހަރު ފައްސިވީ މަދަރުސާގެ ދަރިވަރެކެވެ. އަދި އޭނާއާ އެއްތާވި މީހުން ގިނަ އަދަދަކަށް އެބަތިބި ކަމަށާއި އެކަން ދެނެގަތުމުގެ މަސައްކަތް ތިމަރަފުށީ ޞިއްޙީ މަރުކަޒުން ކުރިއަށް ގެންދާ ކަމަށް ވެސް މައުލޫމާތު ލިބިފައި ވެއެވެ.
ފައްސިވި ދަރިވަރަކީ ކައިރި މާޒީގައި އެއްވެސް ރަށަކަށް ދަތުރު ކުރި ކުއްޖެއް ނޫނެވެ. އޭނާ ފްލޫ ކްލިނިކަށް ދައްކާ ޓެސްޓްކުރީ ކޮވިޑްގެ ބައެއް ޢަލާމާތްތައް ފެނިގެންނެވެ.
ތިމަރަފުށި ވަނީ މިދިޔަ މަހު ވެސް މޮނިޓަރިންއަށް ލައިފައެވެ. އޭގެ ފަހުން މިމަހުގެ 1 ވަނަ ދުވަހު އެ ރަށުގެ މޮނިޓަރިންގެ ހާލަތު އުވައިލީ ވަކި ތަރުތީބެއް ނެތި ނެގި ސުންކުތައް ކޮވިޑަށް ނައްސިވުމުންނެވެ،
