ސަރުކާރުން ކައުންސިލްތަކަށް ފުރިހަމަ އެއްބާރުލުން ދޭނެ: މަބްރޫކް
ސަރުކާރުން ކައުންސިލްތަކަށް ފުރިހަމަ އެއްބާރުލުން ދެއްވާނެ ކަމަށް ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވިދާޅުވެއްޖެއެވެ.
މަބްރޫކް މިހެން ވިދާޅުވެފައި ވަނީ މިއަހަރު އިންތިހާބު ކުރެވުނު ހަތަރުވަނަ ދައުރުގެ މޭޔަރު އަދި ކައުންސިލަރުން ހުވާ ކުރުމާއި އަންހެނުން ތަރައްގީއަށް މަސައްކަތްކުރާ ކޮމެޓީގެ މެންބަރުން އިގްރާރުވުމުގެ ރަސްމިއްޔާތު މިއަދު ބާއްވައިފައި ވަނިކޮށެވެ.
އަވަސް ނޫހުން ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީ ކައުންސިލްތައް އެމީހުންގެ އަމިއްލަ ބާރުވެރި ކަމުގައި ރަނގަޅު މަސައްކަތްތަކެއް ކުރާ މަންޒަރު ފެނުމަކީ ސަރުކާރުން ދެކެން ބޭނުންވާ މަންޒަރެއް ކަމަށެވެ.
މީގެ އިތުރުން ކައުންސިލްތަކުން ބޭނުންވާ ކަންކަން ކުރުމަށް ސަރުކާރުގެ އެހީތެރިކަން ބޭނުންވާ ކަންކަމުގައި އެ އެހީތެރިކަމެއް ހުރިހާ ކައުންސިލްތަކަށް ވެސް ފޯރުކޮށްދޭނެ ކަމުގެ ޔަގީންކަން ވެސް މަބްރޫކް ވަނީ ދެއްވާފަ އެވެ.
މިއަހަރު އިންތިހާބު ކުރެވުނު ހަތަރުވަނަ ދައުރުގެ މޭޔަރު އަދި ކައުންސިލަރުން ހުވާ ކުރުމާއި އަންހެނުން ތަރައްގީއަށް މަސައްކަތްކުރާ ކޮމެޓީގެ މެންބަރުން އިގްރާރުވުމުގެ ރަސްމިއްޔާތު ބާއްވާފައި ވަނީ މިއަދު ހެނދުނު 09:00 ޖެހިއިރު އޮންލައިންކޮށެެވެ.
ލޯކަލް ކައުންސިލްތަކުގެ އިންތިހާބުގައި ވެރިކަންކުރާ އެމްޑީޕީން 400 ގޮނޑިއާ އެކު ކައުންސިލުތަކުގެ އަގުލަބިއްޔަތު ނެގިއިރު އިދިކޮޅު ޕީޕީއެމް/ޕީއެންސީ ކޯލިޝަނުން 325 ގޮނޑި ކާމިޔާބުކުރިއެވެ.
މަބްރޫކްއެެވެ. ސަރުކާރުން ޔަގީންކަން ދީފައިހުރި އެތައްކަމެއް ބަނގުރޫޓް ވެއްޖެއެވެ. ޕީޕީއެމްގެ ކައުންސިލްތަކަށް މިސަރުކާރުން އެއްބާރުން ދޭނޭކަމަކަށް މިތޫރި ނުދެކެމެ. މިތޫރި މިހެން މިބުނީ މާޒީގައި ކަންހިނގާފައިވާ ގޮތަށް ބަލާފައެވެ.