މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ޚިޔާނާތުގެ މައްސަލަ ތަހުގީގު ކުރަން ރައީސް އިބްރާހީމް މުހައްމަދު ޞާލިޙް އުފައްދަވާފައިވާ އެސެޓް ރިކަވަރީ ކޮމިޝަންގެ މަަސައްކަތްތަކަށް އެމްޑީޕީގެ ބައެއް މެމްބަރުން ވަރަށް ބޮޑަށް ފާޑު ވިދާޅުވެއްޖެއެވެ.
Ads by Sosun Fihaara
އެމްއެމްޕީއާރްސީގެ ޚިޔާނާތުގެ މައްސަލަ ދިރާސާކޮށް މަޖިލީހުގެ ޖުޑީޝަރީ ކޮމިޓީއާއި ސަލާމަތީ ހިދުމަތްތަކާ ބެހޭ ސަބް ކޮމިޓީން އެކުލަވައިލި ރިޕޯޓަށް މަޖިލީހުގެ ތަޅުމުގައި މިއަދު ކުރި ބަހުސްގައި އެމްޑީޕީގެ ބައެއް މެމްބަރުން ވަނީ އެސެޓް ރިކަވަރީ ކޮމިޝަންގެ މަސައްކަތްތައް އެކަށީގެންވާ ގޮތަށް ކުރިއަށް ނުދާ ކަމަށް ވިދާޅުވެފައެވެ.
އެ ކޮމިޝަންގެ މަސައްކަތްތަކަށް ފާޑުކިޔުއްވަމުން، އެމްޑީޕީއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގު ވިދާޅުވީ އެސެޓް ރިކަވަރީ ކޮމިޝަންގެ މަސައްކަތްތައް އެކަށީގެންވާ ގޮތަށް ކުރިއަށް ގެންގޮސްފައި ނެތް ކަމަށެވެ. އެމްއެމްޕީއާރްސީގެ ޚިޔާނާތާ ގުޅިގެން ނެރެފައިވާ ލިސްޓުގައި 281 ބޭފުޅުން ހިމެނޭއިރު އޭގެތެރެއިން 176 ބޭފުޅެއްގެ ފުރިހަމަ މައުލޫމާތުތައް އަދިވެސް ކޮމިޝަނަށް ހޯދިފައި ނުވާތީ އޭނާ ވަނީ ކަންބޮޑުވުން ފާޅު ކުރައްވާފައެވެ.
"އަޅުގަނޑު ހިތުގައި އުފެދޭ ސުވާލަކީ އެސެޓް ރިކަވަރީ ކޮމިޝަނުން މިވީހާ ދުވަހު މައުލޫމާތު ނުހޯދުނީތޯއޭ؟ ނޫން ނަމަ ހޯދަން ހުރި ހުރަސްތަކަކީ ކޮބައިތޯއޭ؟ މި ހިސާބަށް މިކަން ދިޔައީ ކީއްވެތޯ؟ އެއީ މުޅި ލިސްޓަށް ބަލާނަމަ 63 ޕަސެންޓް (މައުލޫމާތު ނުހޯދޭ). ދެން އެއާ ޖެހިގެން މި އޮންނަނީ އިންވެސްޓިގޭޝަންގައި 69 ފަރާތެއް. މިއީ 25 ޕަސެންޓް. އެހެންވީމާ އެނގޭ އެސެޓް ރިކަވަރީ ކޮމިޝަނުން އެކަށީގެންވާ މަސައްކަތެއްް ނުކުރެވޭކަން،" ޝަފީގު ވިދާޅުވިއެވެ.
އެމްޑީޕީގެ ހޯރަފުށީ ދާއިރާގެ މެމްބަރު އަހްމަދު ސަލީމް ވެސް ވަނީ އެސެޓް ރިކަވަރީ ކޮމިޝަނަށް ފާޑުވިދާޅުވެފައެވެ. ސަލީމް ވިދާޅުވީ އެ ކޮމިޝަނުން އެކުލަވާލި ލިސްޓު ކިތަންމެ ދިގު ނަމަވެސް ހާސިލްވީ އެއްވެސް އެއްޗެއް ނެތް ކަމަށާއި އެގޮތުން އެ މައްސަލަ ރަނގަޅަށް ތަހުގީގު ނުކުރެވުނު ތަނުގައި ދައުލަަތަށް ގެއްލުނު އެންމެ އެސެޓެއް ވެސް އަނބުރާ ހޯދިފައި ނުވާކަމަށެވެ.
ސަލީމް ހުށަހެޅުއްވީ ކޮމިޝަންގެ މަސައްކަތްތައް މަޖިލީހުން ވަރަށް ގާތުން ބެލުމަށެވެ. އަދި މައްސަލަ ތަހުގީގު ކުރެވޭނެ ޓައިމްލައިންއަކާއި އެސެޓްތައް އަލުން ހޯދޭނެ ޓައިމްލައިނެއް ކޮމިޝަނުން ހުށަހެޅުމަށް ވެސް އޭނާ އެދިވަޑައިގެންނެވިއެވެ.
