ރާއްޖެއިން ފެނުނީ ބްލެކް ފަންގަސްއެއް ނޫން: މަބްރޫކް
ރާއްޖެއިން ފެނުނީ ބްލެކް ފަންގަސްއެއް ނޫން ކަމަށް ރައީސް އޮފީހުގެ ތަރުޖަމާނު މަބްރޫކް އަބްދުލްއަޒީޒް ވިދާޅުވެއްޖެއެވެ.
މިއުކޯމައިކޯސިސް ނުވަތަ "ބްލެކް ފަންގަސް"އަށް ޝައްކު ކުރެވޭ މީހަކު މީގެ ތިން ދުވަސް ކުރިން ރާއްޖެއިން ވަނީ ފެނިފައެވެ.
ނޫސްވެރިންނަށް މައުލޫމާތު ދެއްވަމުން މަބްރޫކް ވިދާޅުވީ، އެ މީހާގެ އިތުރަށް ތަހުލީލުތައް ހެދި ކަމަށާއި އަދި އެ މީހާއަށް ޖެހިފައި ވަނީ ބްލެކް ފަންގަސް ނޫންކަން ހޯދިފައިވާ ކަމަށެވެ.
މިއުކޯމައިކޯސިސް ނުވަތަ "ބްލެކް ފަންގަސް" އަކީ ދިފާއީ ނިޒާމު ބަލިކަށި މީހުންނަށް ޖެހޭ ބައްޔެކެވެ. ހަކުރު ބައްޔާ ގުޅުން ހުރި މި ބަލި މިހާތަނަށް ގިނައިން ޖެހިފައި ވަނީ ކޮވިޑް ޖެހިގެން ދިފާއީ ނިޒާމް ބަލިކަށިވެފައިވާ މީހުންނަށެވެ.
މީގެ އިތުރުން އައިސީޔޫގައި ގިނަ ދުވަހު އޮތުމުން ނުވަތަ އެއްބައްޔަށް ވުރެ ގިނަ ބަލިތައް ޖެހުމުން ، އަދި ގިނައިން ބޭސް ކެއުމުގެ ސަބަބުން ދިފާއީ ނިޒާމު ބަލިކަށިވެފައިވާ މީހުންނަށް ވެސް މި ބަލި ޖެހިފައިވާކަން ދެނެގަނެވިފައި ވެއެވެ.
ބްލެކް ފަންގަސް ޖެހޭ މީހުންގެ ފަރާތުން ފެންނަ ޢަލާމާތްތަކުގެ ތެރޭގައި ލޮލުގެ ފެނުން ނުސާފުވުމާއި ނޭފަތުގެ ކުލަ ބަދަލުވުން ، ނުވަތަ ކަޅުވުމާއި މެއަށް ތަދުވުމާއި ނޭވާލާން އުނދަގޫވުމާއި ކެއްސާ ކަރުން ލޭ އައުން ހިމެނެއެވެ.
މީގެ އިތުރުން ނޭފަތް ބެދުމާއި ސައިނަސް ތަދާއި ދަތުގައި ރިއްސުންފަދަ ކަންކަން ވެސް ބްލެކް ފަންގަސްގެ އަލާމާތްތަކުގެ ތެރޭގައި ހިމެނެއެވެ. އިންޑިއާއިން ބުލެކް ފަންގަސް ޖެހުނު މީހުންގެ ތެރެއިން ބައެއް މީހުންގެ ލޯ އިންފެކްޓްވެ ، ލޮލުގެ ފެނުން ގެއްލިފައި ވެއެވެ.
"ބްލެކް ފަންގަސް" އިންޑިއާގެ އެކި ސްޓޭޓްތަކުން ދަނީ ފެންނަމުންނެވެ. ގުޖުރާތުގައި މިބަލީގެ ގިނަ ކޭސްތަކެއް ފެންނަމުންދާއިރު އަވަށްޓެރި ކެރެލާއިން ވެސް ވަނީ މި ބަލި ފެނިފައެވެ. އަދި ޕާކިސްތާނުގެ އެކި ހިސާބުތަކުން ވެސް ބްލެކް ފަންގަސް ފެނިފައި ވެއެވެ.
